ເພື່ອຕິດຕາມກວດກາ ແລະ ເກັບກໍາຂໍ້ມູນກ່ຽວກັບການຈັດຕັ້ງປະຕິບັດນິຕິກໍາ,ຕິດພັນກັບການຂຸນຄົ້ນແຮ່ທາດ,ການມີສ່ວນຮ່ວມເຂົ້າໃນການບູລະນະສ້ອມແປ່ງເສັ້ນທາງຈາກການຂົນສົ່ງແຮ່ທາດ, ຊອກໃຫ້ເຫັນໄດ້ດ້ານດີທີ່ຄວນເສີມຂະຫຍາຍຊຸກຍູ້ ແລະ ດ້ານອ່ອນຂໍ້ຄົງຄ້າງຈະຕ້ອງໄດ້ຊອກຫາວີທີທາງແກ້ໄຂ ໃນການຈັດຕັ້ງປະຕິບັດວຽກງານ ແນໃສ່ໃຫ້ພາກສ່ວນທີ່ກ່ຽວຂ້ອງຈັດຕັ້ງປະຕິບັດໃຫ້ຖືກຕ້ອງຕາມກົດໝາຍ ແລະ ແຜນພັດທະນາເສດຖະກິດ-ສັງຄົມ ແຕ່ລະໄລຍະ, ໃນວັນທີ 18 ທັນວາ 2024, ກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ລົງຕິດຕາມກວດກາ ການຂົນສົ່ງແຮ່ທາດ ແລະ ການມີສ່ວມຮ່ວມເຂົ້າໃນການບູລະນະສ້ອມແປ່ງເສັ້ນທາງ ຮ່ວມກັບສະພາປະຊາຊົນແຂວງ ແລະ ພາກສ່ວນທີ່ກ່ຽວຂ້ອງ, ເຊິ່ງໄດ້ຈັດກອງປະຊຸມຂື້ນທີ່ດ່ານສາກົນພູເກືອ ແຂວງອັດຕະປື,ໂດຍການເປັນປະທານຂອງທ່ານ ນາງ ປີ່ງຄໍາ ລາຊະສິມມາ ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ມີທ່ານ ປອ ເກດແກ້ວ ສີຫາລາດ ຮອງປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ, ທ່ານ ສຸກສໍາລານ ໄຊຍະແສງ ຮອງປະທານສະພາປະຊາຊົນແຂວງ, ທັງເປັນປະທານຄະນະກໍາມະການເສດຖະກິດແຜນການ ແລະ ການເງີນ, ມີບັນດາທ່ານພາກສ່ວນຈາກດ່ານສາກົນພູເກືອ, ພະແນກການທີ່ກ່ຽວຂ້ອງ, ຄະນະຈາກສະພາແຫ່ງຊາດ ແລະ ສະພາປະຊາຊົນແຂວງເຂົ້າຮ່ວມ.

ໃນກອງປະຊຸມ ທ່ານ ນາງ ປີ່ງຄໍາ ລາຊະສິມມາ ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ໄດ້ເຈາະຈີ້ມໃຫ້ພາກສ່ວນທີ່ກ່ຽວຂ້ອງລາຍງານເປັນຕົ້ນ: ການຈັດຕັ້ງປະຕິບັດການອະນຸມັດໂຄງການກໍ່ສ້າງ, ບູລະນະສ້ອມແປງເສັ້ນທາງ ປີ 2024, ການນໍາໃຊ້ ງົບປະມານເຂົ້າໃນໂຄງການ , ການຄຸ້ມຄອງນໍ້າໜັກລົດຂົນສົ່ງ ສິນຄ້າ, ຂົນສົ່ງແຮ່ທາດ ຢູ່ພາຍໃນແຂວງ, ກົນໄກການຄຸ້ມຄອງ, ຕິດຕາມກວດກາ, ການປະຕິບັດມາດຕະການຕໍ່ຜູ້ລະເມີດ, ການຕິດຕາມ ກວດກາ ແລະ ເກັບກໍາ ສະພາບເສັ້ນທາງທີ່ເປ່ເພ, ເສຍຫາຍ ຈາກການຂົນສົ່ງ ແຮ່ທາດ, ເຄື່ອງອຸປະກອນ, ເຄື່ອງຈັກ ທີ່ນໍາມາຮັບໃຊ້ບັນດາໂຄງການລົງທຶນຂະໜາດໃຫຍ່, ການມີສ່ວນຮ່ວມ ແລະ ປະກອບພັນທະເຂົ້າໃນການກໍ່ສ້າງ ແລະ ບູລະນະສ້ອມແປງ ເສັ້ນທາງ ທີ່ເປ່ເພຈາກການນໍາໃຊ້ຂອງບັນດາໂຄງການລົງທຶນຂະໜາດໃຫຍ່, ໂຄງການຂຸດຄົ້ນ ແລະ ປຸງແຕ່ງ ແຮ່ທາດ, ບໍລິສັດຂົນສົ່ງແຮ່ທາດ, ການຈັດຕັ້ງປະຕິບັດ ກົດໝາຍ, ນິຕິກໍາໃຕ້ກົດໝາຍ ທີ່ຕິດພັນກັບການຈັດຕັ້ງປະຕິບັດວຽກງານ ການກໍ່ສ້າງ, ບູລະນະສ້ອມແປງເສັ້ນທາງ ແລະ ວຽກງານຂົນສົ່ງ ເປັນຕົ້ນ ກົດໝາຍວ່າດ້ວຍ ທາງຫຼວງ, ການຈັດຊື້-ຈັດຈ້າງ ດ້ວຍທຶນຂອງລັດ, ການລົງທຶນຂອງລັດ, ການຂົນສົ່ງທາງບົກ ແລະ ນິຕິກໍາອື່ນທີ່ກ່ຽວຂ້ອງ, ຈາກນັ້ນ, ຜູ້ເຂົ້າຮ່ວມກອງປະຊຸມຍັງໄດ້ສົນທະນາແລກປ່ຽນປະກອບຄໍາຄິດຄໍາເຫັນ ຢ່າງກົງໄປກົງມາ ແທດເໝາະກັບສະພາບຕົວຈິງ ເຫັນໄດ້ດ້ານດີດ້ານອ່ອນ, ບັນຫາຄົງຄ້າງ ແລະ ຊອກຫາວິທີແກ້ໄຂ ກ່ຽວກັບການຈັດຕັ້ງປະຕິບັດ ແລະ ການມີສ່ວນຮ່ວມໃນການບູລະນະສ້ອມແປງເສັ້ນທາງເປ່ເພ ຈາກການຂົນສົ່ງແຮ່ທາດ ເພື່ອເປັນຂໍ້ມູນພື້ນຖານໃນການສັງລວມລາຍງານຕໍ່ກອງປະຊຸມສະໄໝສາມັນຂອງສະພາແຫ່ງຊາດ ແລະ ຄະນະປະຈໍາສະພາແຫ່ງຊາດ.

ນອກຈາກນີ້ທາງຄະນະຍັງໄດ້ລົງເບິ່ງພາກສະໜາມຈຸດທ້ອນໂຮມແຮ່ທາດ (ແຮ່ເຫຼັກ) ຂອງບໍລິສັດ ຂຸດຄົ້ນບໍ່ແຮ່ ຈໍາກັດ ໂອກາດນີ້ໄດ້ຮັບຟັງການລາຍງານການຈັດຕັ້ງປະຕິບັດເຄື່ອນໄຫວດໍາເນີນຂອງໂຄງການໂດຍຫຍໍ້ ໃນນັ້ນໄດ້ຍົກໃຫ້ເຫັນການມີສ່ວນຮ່ວມໃນການພັດທະນາເຂດບ້ານຕິດກັບໂຄງການເປັນຕົ້ນຊ່ວຍດ້ານງົບປະມານບໍລິຫານບ້ານ, ປະກອບສ່ວນອຸປະກອນການຮຽນ ແລະ ອຸປະກອນກິລາ ແລະ ອື່ນໆ ເຊິ່ງໃນແຜນປີ 2025 ທາງໂຄງການຍັງຈະໄດ້ສົມທົບກັບພາກສ່ວນທີ່ກ່ຽວຂ້ອງສຶບຕໍ່ສ້ອມແປງເສັ້ນທາງທີ່ເປ່ເພແຕ່ຫຼັກ 100 ເຂດເຊຊຸ ຫາ ດ່ານສາກົນພູເກືອ.                                  (ວິນັດ ສີສຸລາດ)