(ສພຊ) ຕອນເຊົ້າວັນທີ 28 ທັນວາ 2022 ທີ່ສະພາແຫ່ງຊາດ ນະຄອນຫຼວງວຽງຈັນ, ທ່ານ ສົມມາດ ພົລເສນາ ຮອງປະທານສະພາແຫ່ງຊາດ ໄດ້ຕາງໜ້າຄະນະປະຈໍາສະພາແຫ່ງຊາດ ຖະແຫຼງຂ່າວກ່ຽວກັບຜົນການພິຈາລະນາວຽກງານຂອງອົງການກວດກາແຫ່ງລັດ ແລະ ອົງການກວດສອບແຫ່ງລັດ ກ່ຽວກັບການຈັດຕັ້ງປະຕິບັດ ແຜນການເຄື່ອນໄຫວວຽກງານ ປະຈຳປີ 2022 ແລະ ທິດທາງ ປີ 2023 ໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ວ່າ: ໃນວາລະດໍາເນີນກອງປະຊຸມ ລະຫວ່າງວັນທີ 22-23 ທັນວາ 2022 ໂດຍການເປັນປະທານຂອງທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ, ກອງປະຊຸມໄດ້ຮັບຟັງການລາຍງານ ຂອງອົງການກວດສອບແຫ່ງລັດ ແລະ ອົງການກວດກາແຫ່ງລັດ ກ່ຽວກັບສະຫຼຸບການເຄື່ອນໄຫວວຽກງານ ປະຈຳປີ 2022 ແລະ ທິດທາງແຜນການເຄື່ອນໄຫວ ປະຈໍາປີ 2023, ບົດລາຍງານ ຜົນການກວດສອບບົດສະຫຼຸບຂາດຕົວ ການຈັດຕັ້ງປະຕິບັດ ແຜນງົບປະມານແຫ່ງລັດ ປະຈຳປີ 2021 ແລະ ບົດລາຍງານ ຜົນການກວດກາ ຕາມມະຕິສະພາແຫ່ງຊາດ ຈາກທ່ານປະທານ ຂອງສອງອົງການດັ່ງກ່າວ. ຫຼັງຈາກນັ້ນ ຜູ້ຕາງໜ້າຄະນະປະຈໍາສະພາແຫ່ງຊາດ ໄດ້ປະກອບຄໍາເຫັນ ແລະ ບັນດາທ່ານ ສະມາຊິກສະພາແຫ່ງຊາດ ກໍໄດ້ປະກອບຄຳຄິດຄຳເຫັນຢ່າງກົງໄປກົງມາ, ລົງເລິກຄົ້ນຄວ້າ, ວິເຄາະ-ວິໄຈ ດ້ວຍຄວາມຮັບຜິດຊອບສູງ, ມີບັນຍາກາດທີ່ຟົດຟື້ນ, ມີຈຸດສຸມ, ຍົກໃຫ້ເຫັນ ດ້ານດີ, ດ້ານອ່ອນ-ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້, ເພື່ອໃຫ້ອົງການກວດກາແຫ່ງລັດ ແລະ ອົງການກວດສອບແຫ່ງລັດ ນໍາໄປປັບປຸງແກ້ໄຂໃຫ້ມີປະສິດທິພາບ ແລະ ປະສິດທິຜົນສູງຂຶ້ນກວ່າເກົ່າ, ຂໍສັງລວມໂດຍຫຍໍ້ບັນຫາທີ່ພົ້ນເດັ່ນ ດັ່ງນີ້:
- ກອງປະຊຸມ ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ ອົງການກວດສອບແຫ່ງລັດ ແລະ ອົງການກວດກາແຫ່ງລັດ ທີ່ໄດ້ເອົາໃຈໃສ່ປະຕິບັດພາລະບົດບາດ, ສິດ ແລະ ໜ້າທີ່ຂອງຕົນຕາມກົດໝາຍ ໃນການຈັດຕັ້ງປະຕິບັດວຽກງານ ປີ 2022 ດ້ວຍຜົນສໍາເລັດ, ທັນເວລາ ແລະ ສາມາດລາຍງານຕໍ່ກອງປະຊຸມສະພາແຫ່ງຊາດ;
- ກອງປະຊຸມ ໄດ້ເປັນເອກະພາບ ແລະ ຕີລາຄາວ່າ ການລະເມີດກົດໝາຍທີ່ກ່ຽວຂ້ອງ ຂອງບັນດາຫົວໜ່ວຍງົບປະມານ ມີລັກສະນະຊຳເຮື້ອ, ເປັນບັນຫາເກົ່າ ເຊິ່ງການແກ້ໄຂຜົນການກວດສອບ-ກວດກາ ຍັງແກ້ໄຂໄດ້ໜ້ອຍ, ແກ້ໄຂບໍ່ເດັດຂາດ, ບໍ່ທັນຂາດຕົວ, ບໍ່ທັນການ ແລະ ແກ່ຍາວເວລາຫຼາຍປີ ເປັນຕົ້ນ ການເກັບກູ້ລາຍຮັບທີ່ກວດເຫັນເພີ່ມ, ການເກັບກູ້ໜີ້ຕ້ອງຮັບ, ການຊຳລະສະສາງເງິນຈ່າຍລ່ວງໜ້າໃນຄັງເງິນແຫ່ງຊາດ ແລະ ບັນຫາອື່ນໆ;
- ກອງປະຊຸມໄດ້ສະເໜີ ໃຫ້ອົງການກວດສອບແຫ່ງລັດ ແລະ ອົງການກວດກາແຫ່ງລັດ ເອົາໃຈໃສ່ຄົ້ນຄວ້າ, ວິເຄາະ, ວິໄຈບັນຫາ ໃຫ້ລະອຽດ ເລິກເຊິ່ງ ເພື່ອໃຫ້ເຫັນໄດ້ສາເຫດຂອງການລະເມີດ ແລະ ມີມາດຕະການແກ້ໄຂທີ່ຖືກຕ້ອງ, ເຂັ້ມງວດ, ເດັດຂາດ ຕໍ່ຫົວໜ່ວຍງົບປະມານທີ່ລະເມີດ; ພ້ອມກັນນັ້ນ, ໃຫ້ເອົາໃຈໃສ່ວຽກການສ້າງຄວາມເຂັ້ມແຂງ ທາງດ້ານວິຊາສະເພາະ, ຍົກສູງຈັນຍາບັນຈັນຍາທໍາ ຂອງພະນັກງານ ແລະ ນັກກວດສອບ-ກວດກາ ໃຫ້ມີຄວາມເດັດຂາດ, ເປັນມືອາຊີບ ແລະ ຫັນເປັນທັນສະໄໝ ຮັບປະກັນການສະໜອງຂໍ້ມູນ ໃຫ້ເປັນລະບົບ, ຄົບຖ້ວນ ແລະ ທັນເວລາ;
- ສຳລັບການກຳນົດເປົ້າໝາຍກວດສອບ-ກວດກາ ໃນປີ 2023, ກອງປະຊຸມໄດ້ ສະເໜີໃຫ້ 2 ອົງການດັ່ງກ່າວ ເອົາໃຈໃສ່ຈັດຕັ້ງປະຕິບັດຕາມແຜນກໍານົດ ໂດຍມີຈຸດສຸມ ແລະ ສຸມໃສ່ເປົ້າໝາຍທີ່ຕິດພັນກັບການສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານແຫ່ງລັດ ປີ 2022, ເປົ້າໝາຍທີ່ຕິດພັນກັບວາລະແຫ່ງຊາດ, ກອງທຶນທາງ, ໂຄງການລົງທຶນຕາມເປົ້າໝາຍພັດທະນາແບບຍືນຍົງ, ໂຄງການລົງທຶນຂອງລັດຂະໜາດໃຫຍ່, ການພັດທະນາຊົນນະບົດ ແລະ ລຶບລ້າງຄວາມທຸກຍາກ ແລະ ການແກ້ໄຂໄພພິບັດທາງທຳມະຊາດ;
- ກອງປະຊຸມ ສະເໜີໃຫ້ເອົາໃຈໃສ່ການປະສານສົມທົບ ແລະ ປັບປຸງກົນໄກການປະສານງານ ລະຫວ່າງ ອົງການກວດສອບແຫ່ງລັດ, ອົງການກວດກາແຫ່ງລັດ ກັບພາກສ່ວນກ່ຽວຂ້ອງ ເປັນຕົ້ນ ສະພາແຫ່ງຊາດ, ສະພາປະຊາຊົນຂັ້ນແຂວງ ໃຫ້ມີຄວາມກົມກຽວ, ຄ່ອງຕົວ, ການສະໜອງ, ແລກປ່ຽນຂໍ້ມູນ-ຂ່າວສານ ເປັນລະບົບ, ຄົບຖ້ວນ ແລະ ທັນການ ເພື່ອຮັບປະກັນໃຫ້ວຽກງານກວດສອບ-ກວດກາ ມີປະສິດທິພາບ, ປະສິດທິຜົນ ແລະ ມີຜົນສັກສິດ;
- ກອງປະຊຸມ ໄດ້ມີຄຳເຫັນເນັ້ນໃສ່ຄວາມເດັດຂາດ ໃນການແກ້ໄຂຜົນການກວດສອບ-ກວດກາ ໂດຍເປັນເອກະພາບ ສະເໜີໃຫ້ລັດຖະບານ ເອົາໃຈໃສ່ຊີ້ນຳ-ນຳພາ ຫົວໜ່ວຍງົບປະມານ ແກ້ໄຂຜົນການກວດສອບ-ກວດກາ ຢ່າງຈິງຈັງ, ເດັດຂາດ ແລະ ຂາດຕົວ ໂດຍໃຫ້ຖືເອົາການແກ້ໄຂ ຜົນການກວດສອບ-ກວດກາ ເປັນເງື່ອນໄຂ ແລະ ບ່ອນອີງ ໃນການຕີລາຄາ, ປະເມີນຜົນງານ ຫຼື ປະຕິບັດນະໂຍບາຍຕໍ່ການຈັດຕັ້ງ ແລະ ພະນັກງານ-ລັດຖະກອນ. ພ້ອມກັນນັ້ນ ໃຫ້ລັດຖະບານ ຈັດສັນງົບປະມານ ແລະ ສະໜອງເຄື່ອງມືອຸປະກອນທີ່ຈຳເປັນ ຕໍ່ວຽກງານກວດສອບ-ກວດກາ ເພື່ອຍົກສູງຄຸນນະພາບ, ເຕັກນິກ ແລະ ມາດຕະຖານຕ່າງໆ ຂອງວຽກງານກວດສອບ-ກວດກາ ໃຫ້ມີປະສິດທິພາບ ແລະ ປະສິດທິຜົນ.
ສະຫຼຸບລວມແລ້ວ ບັນຫາຕົ້ນຕໍ ແມ່ນຄວາມບໍ່ເດັດຂາດ ແລະ ບໍ່ເປັນເຈົ້າການ ໃນການແກ້ໄຂຜົນການກວດສອບ-ກວດກາ ຂອງທຸກພາກສ່ວນ ຈຶ່ງເຮັດໃຫ້ເປັນການແກ່ຍາວ ແລະ ຊຳເຮື້ອມາເປັນເວລາຫຼາຍປີ ຍິ່ງໄປກວ່ານັ້ນ ເປົ້າໝາຍທີ່ລະເມີດ ກໍຍັງສືບຕໍ່ລະເມີດ ເຊິ່ງທ່ານປະທານສະພາແຫ່ງຊາດ ກໍໄດ້ເນັ້ນວ່າ ຕໍ່ບັນຫາດັ່ງກ່າວ ຮຽກຮ້ອງໃຫ້ ພວກເຮົາ ຕ້ອງໄດ້ຮ່ວມກັນ ເອົາຈິງເອົາຈັງ ໃນການແກ້ໄຂ, ສະພາແແຫ່ງຊາດ ກໍຕ້ອງເປັນເຈົ້າການ ໃນການຕິດຕາມກວດກາ ແລະ ຊຸກຍູ້. ຜູ້ເປັນຫົວໜ້າ ຂອງເປົ້າໝາຍຖືກກວດສອບ-ກວດກາ ຕ້ອງຍົກສູງຄວາມຮັບຜິດຊອບ ໂດຍຖືເອົາການແກ້ໄຂຜົນການກວດສອບ-ກວດກາ ເປັນໜຶ່ງໃນໜ້າທີ່ອັນສຳຄັນ ໃນການຊີ້ນຳ-ນໍາພາຂອງຕົນ. ພ້ອມນີ້, ສະພາແຫ່ງຊາດ ຍັງໄດ້ສະເໜີໃຫ້ ທ່ານນາຍົກລັດຖະມົນຕີ ໃນຖານະເປັນຫົວໜ້າຄະນະລັດຖະບານ ຊີ້ນໍາສະມາຊິກລັດຖະບານ ໃຫ້ຍົກສູງຄວາມຮັບຜິດຊອບດ້ານການເມືອງ ໃນການແກ້ໄຂຜົນການກວດສອບ-ກວດກາ, ຖືເອົາການແກ້ໄຂຜົນການກວດສອບ-ກວດກາ ເປັນເງື່ອນໄຂ ແລະ ບ່ອນອີງ ໃນການຕີລາຄາ, ປະເມີນຜົນງານ ຫຼື ປະຕິບັດນະໂຍບາຍ ຕໍ່ການຈັດຕັ້ງ ແລະ ພະນັກງານ-ລັດຖະກອນ; ທີ່ກ່າວມານັ້ນ ແມ່ນບາງຄຳເຫັນຂອງ ສະມາຊິິກສະພາແຫ່ງຊາດ ກໍຄືກອງປະຊຸມສະພາແຫ່ງຊາດ ຕໍ່ບົດລາຍງານຂອງອົງການກວດກາແຫ່ງລັດ ແລະ ອົງການກວດສອບແຫ່ງລັດ.
ໃນກອງປະຊຸມຄັ້ງນີ້ ນອກຈາກຮັບຟັງການລາຍງານຂອງ ອົງການກວດສອບແຫ່ງລັດ ແລະ ອົງການກວດກາແຫ່ງລັດແລ້ວ, ຍັງມີກະຊວງແຜນການ ແລະ ການລົງທຶນ, ກະຊວງການເງິນ, ກະຊວງໂຍທາທິການ ແລະ ຂົນສົ່ງ ແລະ ທະນາຄານ ແຫ່ງ ສປປລາວ ໄດ້ມາຊີ້ແຈງອະທິບາຍ ຕາມການປະກອບຄໍາເຫັນ, ຕາມຄຳຊັກຖາມ ຂອງສະມາຊິກສະພາແຫ່ງຊາດ ທີ່ໄດ້ຍົກຂຶ້ນໃນວາລະກອງປະຊຸມ ແລະ ບັນຫາທີ່ສັງຄົມໃຫ້ຄວາມສົນໃຈ.
ອີງຕາມວາລະກອງປະຊຸມ ໃນວັນທີ 30 ທັນວາ 2022 ທີ່ຈະມາເຖິງ ສະມາຊິກສະພາແຫ່ງຊາດ ຈະໄດ້ລົງຄະແນນຮັບຮອງເອົາ ມະຕິ ກ່ຽວກັບບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການ ປະຈໍາປີ 2023 ຂອງອົງການກວດສອບແຫ່ງລັດ ແລະ ອົງການກວດກາແຫ່ງລັດ.
ອີກເທື່ອໜຶ່ງ ຕາງໜ້າຄະນະປະຈຳສະພາແຫ່ງຊາດ, ສະແດງຄວາມຂອບໃຈມາຍັງບັນດາທ່ານ ຜູ້ຊົມ, ທ່ານຜູ້ຟັງ ກໍຄືບັນດາທ່ານ ພໍ່ແມ່ພີ່ນ້ອງ, ປະຊາຊົນລາວບັນດາເຜົ່າ ໃນທົ່ວປະເທດ ແລະ ພີ່ນ້ອງຊາວລາວທີ່ອາໄສຢູ່ຕ່າງປະເທດ ທີ່ໄດ້ຕິດຕາມການດຳເນີນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ຄັ້ງນີ້.
ຂໍສະແດງຄວາມຂອບໃຈ ແລະ ຊົມເຊີຍຢ່າງຈິງໃຈ ມາຍັງສື່ມວນຊົນທຸກພາກສ່ວນ ໂດຍສະເພາະ ໂທລະພາບແຫ່ງຊາດ ແລະ ວິທະຍຸກະຈາຍສຽງແຫ່ງຊາດ, ສື່ສິ່ງພິມປະເພດຕ່າງໆ ທີ່ໄດ້ຕິດຕາມຢ່າງໃກ້ຊິດ ເພື່ອເກັບກຳຂ່າວ ແລະ ເຜີຍແຜ່ຢ່າງທັນການ ກ່ຽວກັບການດຳເນີນກອງປະຊຸມໃນຄັ້ງນີ້ ໃຫ້ສັງຄົມໄດ້ຮັບຊາບຢ່າງທົ່ວເຖິງ.