(ສພຊ) ໃນຕອນບ່າຍວັນທີ 29 ມີນາ 2023 ທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ໄດ້ເຂົ້າຮ່ວມ ແລະ ມີຄໍາເຫັນໂອ້ລົມ ຕໍ່ກອງປະຊຸມໃຫຍ່ ຜູ້ພິພາກສາທົ່ວປະເທດ ຄັ້ງທີ XI ຢູ່ທີ່ສູນການຮ່ວມມືສາກົນ ແລະ ການເຝິກອົບຮົມ (ICTC) ນະຄອນຫຼວງວຽງຈັນ, ຈັດໂດຍ ສານປະຊາຊົນສູງສຸດ ພາຍໃຕ້ຫົວຂໍ້: ““ຍົກສູງຄວາມຮັບຜິດຊອບ ໃນການໂຕ້ແຍ່ງ-ໂຕ້ຖຽງ ໃຫ້ລະອຽດ, ຄົບຖ້ວນ ຮັບປະກັນໃຫ້ການຕັດສິນ, ພິພາກສາຄະດີ ຖືກຕ້ອງ ແລະ ຍຸຕິທຳ” ໂດຍການເປັນປະທານຂອງທ່ານ ສຈ. ປອ. ນາງ ວຽງທອງ ສີພັນດອນ ເລຂາທິການສູນກາງພັກ, ປະທານສານປະຊາຊົນສູງສຸດ, ມີບັນດາຮອງປະທານສານປະຊາຊົນສູງສຸດ, ຜູ້ພິພາກສາຂອງສານປະຊາຊົນສູງສຸດ, ຜູ້ພິພາກສາອາວຸໂສ, ຄະນະປະທານສານປະຊາຊົນພາກ, ສານທະຫານຂັ້ນສູງ, ສານປະຊາຊົນແຂວງ-ນະຄອນຫຼວງວຽງຈັນ, ສານປະຊາຊົນເຂດ, ຜູ້ພິພາກສາຂອງສານປະຊາຊົນທ້ອງຖິ່ນ, ແຂກທີ່ຖືກເຊີນ ຈາກສະພາແຫ່ງຊາດ, ອົງການໄອຍະການປະຊາຊົນສູງສຸດ, ກະຊວງປ້ອງກັນຄວາມສະຫງົບ ແລະ ກະຊວງຍຸຕິທຳ ພ້ອມດ້ວຍຄະນະຮັບຜິດຊອບກອງປະຊຸມເຂົ້າຮ່ວມ.

ກອງປະຊຸມດັ່ງກ່າວ, ໄດ້ຮັບຟັງບົດສະຫຼຸບຕີລາຄາຜົນຂອງກອງປະຊຸມໃຫຍ່ຜູ້ພິພາກສາ ຄັ້ງທີ X ແລະ ທິດທາງແຜນການກອງປະຊຸມໃຫຍ່ຜູ້ພິພາກສາ ທົ່ວປະເທດ ຄັ້ງທີ XI (2023-2025) ຈາກທ່ານ ບຸນຂວາງ ທະວີສັກ ຮອງປະທານສານປະຊາຊົນສູງສຸດ. ຈາກນັ້ນ, ປະທານກອງປະຊຸມ ໄດ້ມີຄຳເຫັນເຈາະຈີ້ມ. ຈາກນັ້ນ ໄດ້ແບ່ງກຸ່ມຄົ້ນຄວ້າອອກເປັນ 3 ກຸ່ມ ເຊິ່ງແຕ່ລະກຸ່ມໄດ້ຄົ້ນຄວ້າ ບົດສະຫຼຸບຕີລາຄາຜົນຂອງກອງປະຊຸມໃຫຍ່ຜູ້ພິພາກສາ ຄັ້ງທີ X ແລະ ທິດທາງແຜນການກອງປະຊຸມໃຫຍ່ຜູ້ພິພາກສາ ທົ່ວປະເທດ ຄັ້ງທີ XI (2023-2025) ພ້ອມທັງຄົ້ນຄວ້າກ່ຽວກັບຄຳຖາມ-ຄຳຕອບ ຫຼັງຈາກນັ້ນ, ແຕ່ລະກຸ່ມໄດ້ລາຍງານຜົນຂອງການຄົ້ນຄວ້າ ແລະ ປະກອບຄຳເຫັນເຊິ່ງກັນ ແລະ ກັນ; ໄດ້ຮັບຟັງການລາຍງານສັງລວມຄຳຕອບ ທັງສາມກຸ່ມ ຈາກທ່ານ ແສງແກ້ວ ວິລະພົນເດດ ຫົວໜ້າກອງເລຂາ; ກອງປະຊຸມຍັງໄດ້ຮັບຟັງລາຍງານຫຍໍ້ຂອງການດຳເນີນກອງປະຊຸມ ຈາກທ່ານ ສຈ. ປອ. ນາງ ວຽງທອງ ສີພັນດອນ ອີກດ້ວຍ.

ໃນໂອກາດເຂົ້າຮ່ວມກອງປະຊຸມດັ່ງກ່າວ ທ່ານ ປອ. ໄຊສົມພອນ ພົມວິຫານ ໄດ້ມີຄຳເຫັນໂອ້ລົມຕໍ່ກອງປະຊຸມໃຫຍ່ຜູ້ພິພາກສາທົ່ວປະເທດ ຄັ້ງທີ XI ວ່າ: ກອງປະຊຸມໃຫຍ່ຜູ້ພິພາກສາທົ່ວປະເທດໃນຄັ້ງນີ້ ເຫັນວ່າມີຄວາມໝາຍຄວາມສໍາຄັນຫຼາຍ ສະນັ້ນ, ຂໍຮຽກຮ້ອງມາຍັງບັນດາການນໍາ ກໍຄືຜູ້ພິພາກສາຂອງສານປະຊາຊົນທຸກຂັ້ນ ຈົ່ງເສີມຂະຫຍາຍມູນເຊື້ອອັນດີງາມ ແລະ ເພີ່ມທະວີຄວາມສາມັກຄີເປັນປຶກແຜ່ນ, ເປັນໃຈກາງໃນການຮັກສາຄວາມຍຸຕິທໍາ ເພື່ອເຮັດໃຫ້ການຕັດສິນ ແລະ ພິພາກສາຄະດີ ມີປະສິດທິພາບ ແລະ ໄດ້ຮັບປະສິດທິຜົນສູງຂຶ້ນກວ່າເກົ່າ ຕ້ອງນໍາໃຊ້ວັດຖຸເຕັກນິກທີ່ທັນສະໄໝ ເຂົ້າໃສ່ວຽກງານການບໍລິຫານສານ-ບໍລິຫານຄະດີ ໃຫ້ມີຄວາມວ່ອງໄວ ປະຊາຊົນເຂົ້າເຖິງຂະບວນການຍຸຕິທໍາ ໂດຍຫັນລະບົບສານປະຊາຊົນໃຫ້ເປັນສານດີຈີຕອນ, ເອົາໃຈໃສ່ປັບປຸງແບບແຜນການນໍາພາ ແລະ ວິທີເຮັດວຽກຂອງຕົນໃຫ້ມີຄວາມຄ່ອງໂຕ ແລະ ສະດວກຍິ່ງຂຶ້ນ ບົນພື້ນຖານລະບຽບກົດໝາຍ, ປະຕິບັດລະບອບປະຊຸມ, ປຶກສາຫາລືກັບພາກສ່ວນກ່ຽວຂ້ອງ ແລະ ໃຫ້ມີລັກສະນະແທດຕົວຈິງ, ມີຈຸດສຸມ, ມີການຕິດຕາມ, ກວດກາ ແລະ ສະຫຼຸບຖອດຖອນບົດຮຽນຢ່າງເປັນປະຈຳ; ຊອກໃຫ້ໄດ້ຜູ້ພິພາກສາດີ-ຜູ້ພິພາກສາເກັ່ງ. ຊອກຫາບຸກຄົນທີ່ພົ້ນເດັ່ນໃນຂະບວນການຕົວຈິງ ເພື່ອເປັນແບບຢ່າງນໍາໜ້າໃນຂະບວນການຂອງວຽກງານ ກໍຄືການດຳລົງຊີວິດ ທີ່ປອດໃສຂາວສະອາດ, ດຸໝັ່ນຄົ້ນຄວ້າຮ່ຳຮຽນ, ປະຢັດມັດທະຍັດ, ບໍ່ອາດຍາສິດ ແລະ ສະແຫວງຫາຜົນປະໂຫຍດສ່ວນຕົວ ທີ່ບໍ່ຊອບທຳ.

(ພາບ ແລະ ຂ່າວ: ນາງ ນິດຕາ ຄຸນປາກດີ)