(ສພຊ) ໃນລະຫວ່າງ ວັນທີ 28-29 ທັນວາ 2021 ທີ່ເມືອງວັງວຽງ ແຂວງວຽງຈັນ ສະຖາບັນຄົ້ນຄ້ວານິຕິກໍາສະພາແຫ່ງຊາດ (ສພຊ) ໄດ້ມີກອງປະຊຸມເຝິກອົບຮົມກ່ຽວກັບພາລະບົດບາດຂອງ ສພຊ ແລະ ສະພາປະຊາຊົນຂັ້ນແຂວງ (ສພຂ) ໃຫ້ແກ່ສະມາຊິກສະພາປະຊາຊົນຂັ້ນແຂວງ (ສສຂ) 4 ແຂວງຄື: ຜົ້ງສາລີ, ຫຼວງນ້ຳທາ, ອຸດົມໄຊ ແລະ ບໍ່ແກ້ວ ພາຍໃຕ້ການເປັນປະທານຂອງທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ; ມີທ່ານ ປອ. ຢາງກູ້ ຢາງລືໄຊ ຫົວຫນ້າສະຖາບັນຄົ້ນຄວ້ານິຕິກໍາສະພາແຫ່ງຊາດ; ເຂົ້າຮ່ວມມີເລຂາ-ຮອງເລຂາທິການສະພາແຫ່ງຊາດ; ປະ ທານ-ຮອງປະທານກຳມາທິການ, ຮອງຫົວຫນ້າສະຖາບັນຄົ້ນຄວ້ານິຕິກຳສະພາແຫ່ງຊາດ, ສສຂ ຈາກ 4 ແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
​ທັງນີ້, ເພື່ອຍົກລະດັບຄວາມສາມາດໃຫ້ແກ່ ສສຂ ຊຸດທີ II ແນ່ໃສ່ປະຕິບັດພາລະບົດບາດຂອງ ສພຊ ແລະ ສພຂ ຕາມທີ່ໄດ້ກຳນົດໄວ້ໃນກົດຫມາຍ ໃຫ້ມີປະສິດທິຜົນຍິ່ງໆຂຶ້ນ; ເປັນເວທີປຶກສາຫາລືພົບປະ, ແລກປ່ຽນບົດຮຽນເຊິ່ງກັນແລະກັນ ລະຫວ່າງ ສພຂ ທັງເພື່ອແນ່ໃສ່ເປັນບ່ອນອີງໃຫ້ແກ່ຄະນະຮັບຜິດຊອບຊີ້ນຳລວມ ໃນການຕິດຕາມ, ຊຸກຍູ້ ແລະ ແກ້ໄຂວຽກງານໃນການຈັດເຝິກອົບຮົມການສ້າງຂີດຄວາມສາມາດໃຫ້ ສສຂ ຢູ່ບັນດາແຂວງພາກເໜືອ ໃຫ້ສຳເລັດຕາມແຜນການທີ່ວາງໄວ້; ກອງປະຊຸມໄດ້ຮັບຟັງການສະເໜີກ່ຽວກັບພາລະບົດບາດ, ສິດ ແລະ ໜ້າທີ່ ຂອງ ສພຊ ແລະ ສະມາຊິກສະພາແຫ່ງຊາດ; ພາລະບົດບາດ, ສິດ ແລະ ໜ້າທີ່ ຂອງ ສພຂ ແລະ ສສຂ, ບົດຮຽນໃນການປະຕິບັດ ໜ້າທີ່ດ້ານນິຕິບັນຍັດ ແລະ ບົດຮຽນກ່ຽວກັບການແກ້ໄຂຄຳຮ້ອງທຸກຂອງພົນລະເມືອງ.
​ໂອກາດດັ່ງກ່າວ, ທ່ານ ນາງ ສູນທອນ ໄຊຍະຈັກ ໄດ້ມີຄຳເຫັນໂອ້ລົມຕໍ່ກອງປະຊຸມວ່າ: ສະເໜີໃຫ້ນັກວິທະຍາ ກອນເອົາໃຈໃສ່ລົງເລິກອະທິບາຍຊີ້ແຈງບາງບັນຫາທີ່ເຫັນວ່າມີຄວາມສໍາຄັນ ແລະ ຈໍາເປັນ ຕໍ່ນັກສໍາມະນາກອນ ເພື່ອໃຫ້ກໍາໄດ້ເນື້ອໃນທີ່ສຳຄັນ ແລະ ໃຫ້ມີເວລາໃນການສົນທະນາ, ແລກປ່ຽນບົດຮຽນ ແລະ ເຝິກຫັດເຮັດຕົວຈິງນຳກັນໃຫ້ຫລາຍ; ທັງນີ້ກໍເພື່ອເຮັດໃຫ້ການຄົ້ນຄວ້າ, ການສັງລວມ, ການຂຽນເອກະສານສຳຄັນຕ່າງໆ ມີປະສິດທິພາບ ແລະ ປະສິດທິຜົນສູງ, ສາມາດຕອບສະໜອງໃຫ້ກັບຄວາມຮຽກຮ້ອງຕ້ອງການຂອງໜ້າທີ່ວຽກງານຕົວຈິງ ແລະ ເຊື່ອໝັ້ນວ່າບັນ ດານັກສຳມະນາກອນ ທີ່ມາເຂົ້າຮ່ວມກອງປະຊຸມຄັ້ງນີ້ ຈະໄດ້ສຸມຄວາມພະຍາຍາມ ແລະ ເອົາໃຈໃສ່ໃຊ້ເວລາທີ່ຈຳກັດ ໃຫ້ເປັນປະໂຫຍດສູງສຸດ ເພື່ອເກັບກຳ, ຮຽນຮູ້ ແລະ ແລກປ່ຽນບົດຮຽນເຊິ່ງກັນແລະກັນ, ປະກອບຄຳຄິດຄຳເຫັນ ແລະ ຊັກຖາມໃນບັນຫາຕ່າງໆທີ່ວິທະຍາກອນໄດ້ກະກຽມນໍາມາສະເໜີ ໃຫ້ມີຄວາມເຂົ້າໃຈຢ່າງເລິກເຊິ່ງ ແລະ ເຮັດໃຫ້ກອງປະຊຸມໄດ້ຮັບຜົນສຳເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້ ພາຍຫລັງກັບໄປປະຕິບັດໜ້າທີ່ການເມືອງຂອງຕົນ ສາມາດນຳເອົາຄວາມຮູ້, ບົດຮຽນດັ່ງກ່າວໄປນໍາໃຊ້ ແລະ ປະຕິບັດໃຫ້ເກີດດອກອອກຜົນຫລາຍຂຶ້ນ.
(ພາບ ແລະ ຂ່າວ: ອານຸສອນ ພູມມີທອນ)