(ສພຊ) ເພື່ອຍົກລະດັບຄວາມຮັບຮູ້ກ່ຽວກັບພາລະບົດບາດຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໃຫ້ແກ່ສະມາຊິກສະພາປະຊາຊົນຂັ້ນແຂວງ (ສສຂ) ແນໃສ່ເຮັດໃຫ້ສາມາດປະຕິບັດໜ້າທີ່ການເມືອງຂອງ ສສຂ ແລະ ເພື່ອເຮັດໃຫ້ ສສຂ ມີຄວາມຮັບຮູ້, ຄວາມເຂົ້າໃຈ ແລະ ສາມາດນຳໄປຈັດຕັ້ງປະຕິບັດກ່ຽວກັບການສ້າງນິຕິກຳ, ການແກ້ໄຂຄຳຮ້ອງຂໍຄວາມເປັນທຳຂອງປະຊາຊົນ ແລະ ທັກສະດ້ານຕ່າງໆຕາມພາລະບົດບາດ; ເພື່ອເປັນການຄົ້ນຄວ້າປຶກສາຫາລື ແລະ ແລກປ່ຽນບົດຮຽນລະຫວ່າງ ສສຂ ດ້ວຍກັນ ເພື່ອຮັບປະກັນໃຫ້ການເຄື່ອນໄຫວວຽກງານໃຫ້ມີປະສິດທິຜົນ, ໃນລະຫວ່າງວັນທີ 14-15 ມີນາ 2022 ທີ່ນະຄອນປາກເຊ ແຂວງຈຳປາສັກ, ສະຖາບັນຄົ້ນຄວ້ານິຕິກຳສະພາແຫ່ງຊາດ (ສນສ) ໄດ້ເປີດກອງປະຊຸມເຝິກອົບຮົມການຍົກສູງຂີດຄວາມສາມາດໃຫ້ ສສຂ 4 ແຂວງພາກໃຕ້ຄື: ສາລະວັນ, ຈຳປາສັກ, ເຊກອງ ແລະ ອັດຕະປື ໂດຍການເປັນປະທານຂອງທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ມີທ່ານ ຢ່າງກູ້ ຢ່າງລືໄຊ ຫົວໜ້າ ສນສ, ເລຂາທິການສະພາແຫ່ງຊາດ, ປະທານກໍາມາທິການວຽກງານສະມາຊິກສະພາແຫ່ງຊາດ, ຮອງຫົວໜ້າ ສນສ, ຮອງເລຂາທິການສະພາແຫ່ງຊາດ ແລະ ພາກສ່ວນກ່ຽວຂ້ອງເຂົ້າຮ່ວມ.

ໃນໂອກາດນີ້, ທ່ານ ປອ. ນາງ ສູນທອນ ໄຊຍະຈັກ ໄດ້ມີຄຳເຫັນກ່າວເປີດກອງປະຊຸມວ່າ: ການຍົກ​ສູງ​ຂີດ​ຄວາມ​ສາ​ມາດໃຫ້ແກ່ ສສຂ ຄັ້ງ​ນີ້ ແມ່ນ​ການ​ສືບ​ຕໍ່​ປະ​ຕິ​ບັດ​ຕາມ​ແຜນ​ການ ເພື່ອ​ເຮັດ​ໃຫ້ ສສຂ ​ຜູ້​ໃໝ່ ເຊິ່ງມາ​ຈາກຫລາຍ​ສາ​ຂາ​ອາ​ຊີບ​ທີ່​ແຕກ​ຕ່າງ​ກັນ​ນັ້ນ ໄດ້ມີ​ໂອ​ກາດ​​ເຊື່ອມ​ຊຶມ, ມີ​ຄວາມ​ຮັບ​ຮູ້, ເຂົ້າ​ໃຈ ແລະ ກຳ​ແໜ້ນ​ເນື້ອ​ໃນ​ບັນ​ຫາ​ທີ່​ຈຳ​ເປັນ ໃນ​ການ​ປະ​ຕິ​ບັດ​ພາ​ລະ​ບົດ​ບາດ, ສິດ ແລະ ໜ້າ​ທີ່​ຂອງ​ຕົນ ກໍ​ຄືຂອງສະພາປະຊາຊົນ​ຂັ້ນແຂວງ ໃຫ້​ມີປະສິດທິພາບ ແລະ ປະສິດທິຜົນ; ພ້ອມນັ້ນ, ທ່ານຍັງໄດ້ຮຽກຮ້ອງມາຍັງບັນດາທ່ານຜູ້​ແທນກອງ​ປະ​ຊຸມ ຈົ່ງໄດ້ເຊີດຊູຄວາມຮັບຜິດຊອບສູງ ໃນ​ການ​ເຊື່ອມ​​ຊຶມ, ຮຽນຮູ້, ກໍາແໜ້ນບົດຮຽນທີ່​ດີ ທີ່​ໄດ້ສະເໜີຕໍ່ກອງປະຊຸມ ພ້ອມ​ທັງເອົາ​ໃຈ​ໃສ່​ແລກ​ປ່ຽນ​ຄຳ​ຄິ​ດ​ຄໍາເຫັນ ​ໃຫ້ມີ​ເນື້ອ​ໃນເລິກເຊິ່ງ ແລະ ​ເປັນ​ປະ​ໂຫຍດ ເຮັດໃຫ້ກອງປະຊຸມເຝິກອົບຮົມຄັ້ງນີ້ບັນລຸຜົນສໍາເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້.

ກອງປະຊຸມ, ໄດ້ຮັບຟັງກ່ຽວກັບພາລະບົດບາດ, ສິດ ແລະ ໜ້າທີ່ຂອງສະພາແຫ່ງຊາດ, ສະພາປະຊາຊົນຂັ້ນແຂວງ, ຂອງສະມາຊິກສະພາແຫ່ງຊາດ ແລະ ສສຂ, ບົດຮຽນການສ້າງນິຕິກຳໃຕ້ກົດໝາຍຂັ້ນທ້ອງຖິ່ນ, ບົດຮຽນວຽກງານແກ້ໄຂຄຳຮ້ອງຂໍຄວາມເປັນທຳຂອງພົນລະເມືອງ, ທັກສະການຊັກຖາມ ແລະ ການປະກອບຄຳເຫັນ ເຊິ່ງສະເໜີໂດຍບັນດາທ່ານ​ວິ​ທະ​ຍາ​ກອນ​ທີ່​ມີ​ປະ​ສົບ​ການ​ຕົວ​ຈິງ ເປັນຕົ້ນແມ່ນອະດີດການນຳຂອງສະພາແຫ່ງຊາດ ຊຸດ​ທີ VIII, ​ປະ​ທານກຳ​ມາ​ທິ​ການ ແລະ ຄະ​ນະ​ກົມທີ່​ກ່ຽວ​ຂ້ອງ​; ພ້ອມດຽວ​ກັນ​ນັ້ນ, ບັນດາ​ຜູ້ເຂົ້າຮ່ວມໄດ້ມີການສົນທະນາແລກປ່ຽນບົດຮຽນເຊິ່ງກັນແລະກັນ, ປະກອບຄໍາຄິດຄໍາເຫັນໃນບັນຫາຕ່າງໆທີ່ວິທະຍາກອນນຳມາສະເໜີ ໃຫ້ມີຄວາມເຂົ້າໃຈຢ່າງເລິກເຊິ່ງ.             ກອງປະຊຸມດັ່ງກ່າວ ແມ່ນໄດ້ຮັບການສະໜັບສະໜູນໂດຍແຜນງານການມີສ່ວນຮ່ວມຂອງປະຊາຊົນຕໍ່ວຽກງານການປົກຄອງທີ່ດີ ແລະ ການສ້າງລັດທີ່ປົກຄອງດ້ວຍກົດໝາຍ (ແຜນງານເຊກາ) ແລະ ງົບປະມານຈາກຄະນະເລຂາທິການສະພາແຫ່ງຊາດ.

(ພາບ ແລະ ຂ່າວ: ກຸກກິກ ບຸດດາໄຊ)