ກອງປະຊຸມເຝິກອົບຮົມການຍົກສູງຂີດຄວາມສາມາດໃຫ້ແກ່ສະມາຊິກສະພາແຫ່ງຊາດ (ສສຊ) ແລະ ສະມາຊິກສະພາປະຊາຊົນແຂວງ (ສສຂ) ກ່ຽວກັບການຕິດຕາມກວດກາຂົງເຂດວຽກງານຍຸຕິທຳ, ການຕິດຕາມກວດກາການປະເມີນການຈັດຕັ້ງປະຕິບັດກົດໝາຍ ແລະ ການຕິດຕາມກວດກາວຽກງານຂອງອົງການກວດສອບ ໄດ້ຈັດຂຶ້ນໃນລະຫວ່າງວັນທີ 7-8 ກຸມພາ 2024 ທີ່ແຂວງໄຊຍະບູລີ ໂດຍການເປັນປະທານຂອງທ່ານ ນາງ ປິ່ງຄໍາ ລາຊະສິມມາ ເລຂາທິການສະພາແຫ່ງຊາດ; ເຂົ້າຮ່ວມມີທ່ານ ຄໍາແພງ ວິລະພັນ ປະທານກໍາມາທິການຍຸຕິທຳ, ທ່ານ ອໍາໄພ ຈິດມານົນ ຮອງປະທານກຳມາທິການກົດໝາຍ, ທ່ານ ທັນຕາ ກອງຜາລີ ຮອງປະທານກໍາມາທິການແຜນການ, ການເງິນ ແລະ ການກວດສອບ ພ້ອມດ້ວຍ ສສຊ ແລະ ສສຂ ແຂວງບໍ່ແກ້ວ, ແຂວງຫຼວງພະບາງ, ແຂວງໄຊຍະບູລີ ແລະ ພະ ນັກງານທີ່ກ່ຽວຂ້ອງ.

ໃນວາລະຂອງກອງປະຊຸມ, ທ່ານ ເພັງນິລັນ ຄໍາພັນເພັງ ປະທານສະພາປະຊາຊົນແຂວງໄຊຍະບູລີ ໄດ້ລາຍງານໂດຍຫຍໍ້ກ່ຽວກັບແຂວງໄຊຍະບູລີ ໂດຍຍົກໃຫ້ເຫັນຈຸພິເສດທີ່ພົ້ນເດັ່ນ, ສິ່ງທ້າທາຍ, ຂໍ້ສະດວກ, ຂໍ້ຫຍຸ້ງຍາກຂອງແຂວງໃນໄລຍະ 1 ປີຜ່ານມາ. ຈາກນັ້ນ, ໄດ້ຮັບຟັງການສະເໜີບົດທັກສະການຕິດຕາມກວດກາວຽກງານແຜນການ, ການເງິນ ແລະ ການກວດສອບ ຈາກທ່ານ ທັນຕາ ກອງຜາລີ; ການຕິດຕາມກວດກາການປະເມີນການຈັດຕັ້ງປະຕິບັດກົດໝາຍ ຈາກທ່ານ ອໍາໄພ ຈິດມານົນ ແລະ ການຕິດຕາມກວດກາຂົງເຂດວຽກງານຍຸຕິທຳ ຈາກທ່ານ ຄໍາແພງ ວິລະພັນ. ຫຼັງຈາກນັ້ນ, ຜູ້ເຂົ້າຮ່ວມກໍໄດ້ພ້ອມກັນສຸມໃສ່ຄົ້ນຄວ້າ, ປະກອບຄໍາເຫັນຕໍ່ກັບເນື້ອໃນຂອງບັນດາບົດດັ່ງກ່າວຢ່າງກົງໄປກົງມາ ໂດຍສົມທຽບໃສ່ກັບວຽກງານພາຍໃນແຂວງຂອງຕົນ ຈຶ່ງເຮັດໃຫ້ບັນດາຄໍາເຫັນຕ່າງໆມີຄວາມຈະແຈ້ງ ທັງເປັນການແລກ ປ່ຽນບົດຮຽນ ແລະ ປະສົບການ ເຮັດໃຫ້ການປະຕິບັດວຽກງານ ກໍຄືການເຄື່ອນໄຫວວຽກງານທີ່ຕິດພັນກັບການປະຕິບັດພາລະບົດບາດ, ສິດ ແລະ ໜ້າທີ່ຂອງສະພາແຫ່ງຊາດ, ສະພາປະຊາຊົນແຂວງ ໃຫ້ນັບມື້ນັບມີປະສິດທິພາບ ແລະ ປະສິດ ທິຜົນດີຍິ່ງໆຂຶ້ນ.

ທ່ານ ນາງ ປິ່ງຄໍາ ລາຊະສິມມາ ໄດ້ໃຫ້ຄໍາເຫັນວ່າ: ຕະຫຼອດໄລຍະການດໍາເນີນກອງປະຊຸມ, ຂ້າພະເຈົ້າຕີລາ ຄາສູງຕໍ່ຜົນສໍາເລັດໃນຄັ້ງນີ້ ເຊິ່ງຜູ້ເຂົ້າຮ່ວມໄດ້ມີຄວາມເອົາໃຈໃສ່ຄົ້ນຄວ້າ ແລະ ສົນທະນາແລກປ່ຽນບົດຮຽນດ້ວຍຄວາມຕັ້ງໜ້າ, ວິທະຍາກອນ ກໍເອົາໃຈໃສ່ຖ່າຍທອດບົດຮຽນ ແລະ ສົມທຽບໃສ່ປະສົບການ ແລະ ພຶດຕິກໍາຕົວຈິງທີ່ມີຄວາມຫຼາກຫຼາຍ, ອຸດົມສົມບູນ ເຮັດໃຫ້ບັນດາທ່ານມີຄວາມຮັບຮູ້, ເຂົ້າໃຈຕໍ່ກັບຫົວຂໍ້ກອງປະຊຸມເລິກເຊິ່່ງຂຶ້ນຕື່ມ; ສຳ ລັບບັນຫາທີ່ຜູ້ເຂົ້າຮ່ວມຍົກຂຶ້ນມາຖາມມາແລກປ່ຽນນັ້ນ, ວິທະຍາກອນ ກໍໄດ້ແລກປ່ຽນອະທິບາຍຊີ້ແຈງບົນພື້ນຖານຫຼັກການຂອງກົດໝາຍ, ບົດຮຽນ ແລະ ພຶດຕິກຳຕົວຈິງທີ່ມີປະສິດທິຜົນດີທີ່ໄດ້ປະຕິບັດຜ່ານມາ ແລະ ກອງເລຂາໄດ້ບັນທຶກເກັບກຳລະອຽດແລ້ວ ເພື່ອນຳໄປເປັນຂໍ້ມູນໃນການປັບປຸງ. ທ່ານເລຂາທິການສະພາແຫ່ງຊາດ ຍັງໄດ້ເນັ້ນອີກວ່າ: ຜົນສໍາເລັດຂອງກອງປະຊຸມໃນຄັ້ງນີ້ ເປັນຜົນສໍາເລັດເບື້ອງຕົ້ນຂອງພວກເຮົາ; ສະນັ້ນ, ເພື່ອເຮັດລ້ອນໜ້າທີ່ການເມືອງອັນມີກຽດທີ່ປະເທດຊາດ ແລະ ປະຊາຊົນມອບໝາຍໃຫ້ ໂດຍສະເພາະແມ່ນການຕິດຕາມກວດກາບັນດາອົງການອໍານາດລັດຕາມທີ່ກໍານົດໄວ້ໃນກົດໝາຍ ແລະ ເພື່ອຮັບປະກັນການປະຕິບັດ 3 ພາລະບົດບາດຂອງສະພາແຫ່ງຊາດ, ສະ ພາປະຊາຊົນຂັ້ນແຂວງ ໃຫ້ມີຄຸນນະພາບດີຂຶ້ນເລື້ອຍໆ, ຂ້າພະເຈົ້າມີຄວາມເຊື່ອໝັ້ນຢ່າງໜັກແໜ້ນວ່າ ບັນດາທ່ານຈະນໍາເອົາເນື້ອໃນ ແລະ ບົດຮຽນຈາກກອງປະຊຸມຄັ້ງນີ້ ໄປຈັດຕັ້ງຜັນຂະຫຍາຍ ແລະ ປະຕິບັດໃຫ້ມີຜົນເປັນຮູບປະທໍາ ໃນວຽກງານຕົວຈິງ, ເປັນປະໂຫຍດສູງສຸດຢູ່ໃນການປະຕິບັດໜ້າທີ່ ແລະ ການຈັດຕັ້ງຂອງຕົນ.

ກອງປະຊຸມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານສົມທົບຈາກມູນນິທິເອເຊຍ ປະ ຈຳ ສປປລາວ.