ສ​ພ​ຊ) ເພື່ອຕອບສະໜອງຄວາມຮຽກຮ້ອງຕ້ອງ ການຂອງການຈັດຕັ້ງປະຕິບັດໜ້າທີ່ວຽກງານ ແລະ ການເລັ່ງທວງຂອງສະພາບການໃນໄລຍະໃໝ່ ຈຶ່ງມີຄວາມຈຳ ເປັນຕ້ອງໄດ້ສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງ ໃນວຽກງານຈັດຕັ້ງ-ພະນັກງານ ໃຫ້ມີປະສິດທິພາບ ແລະ ປະສິດທິຜົນດີຂຶ້ນ; ໃນ​ວັນ​ທີ 20 ກຸມ​ພາ 2024 ທີ່ຫ້ອງວ່າການແຂວງຈໍາປາສັກ, ຄະ​ນະ​ເລ​ຂາ​ທິ​ການ​ສະ​ພາ​ແຫ່ງ​ຊາດ ໄດ້​ຈັດ​ຊຸດ​ເຝິກ​ອົບ​ຮົມ​ກ່ຽວ​ກັບ​ວຽກ​ງານ​ວິ​ເຄາະ, ພັດ​ທະ​ນາ​ການ​ຈັດ​ຕັ້ງ ແລະ ການ​ຄຸ້ມ​ຄອງ​ບຸກ​ຄະ​ລາ​ກອນ ໃຫ້​ແກ່​ພະ​ນັກ​ງານ-ລັດ​ຖະ​ກອນຂອງ​ກົມ​ຈັດ​ຕັ້ງ​-ພະ​ນັກ​ງານ ແລະ ສະ​ພາ​ປະ​ຊາ​ຊົນ​ຂັ້ນແຂວງ (ສພຂ) 9 ແຂວງ​ຄື: ນະ​ຄອນຫຼວງວຽງ​ຈັນ, ວຽງ​ຈັນ, ບໍ​ລິ​ຄຳ​ໄຊ, ຄຳ​ມ່ວນ, ສະ​ຫວັນ​ນະ​ເຂດ, ສາ​ລະ​ວັນ, ຈຳ​ປາ​ສັກ, ເຊກອງ ແລະ ອັດ​ຕະ​ປື ໂດຍ​ການ​ເປັນ​ປະ​ທານ​ຂອງ​ທ່ານ ນາງ ປິ່ງ​ຄຳ ລາ​ຊະ​ສິມ​ມາ ກຳ​ມະ​ການ​ສູນ​ກາງ​ພັກ, ເລ​ຂາ​ທິ​ການ​ສະ​ພາ​ແຫ່ງ​ຊາດ; ເຂົ້າ​ຮ່ວມມີ​ຫົວ​ໜ້າ​-ຮອງ​ຫົວ​ໜ້າກົມ​ ແລະ ພະນັກງານ-ລັດຖະກອນຂອງກົມຈັດ​ຕັ້ງ-ພະ​ນັກ​ງານ, ເລ​ຂາ​ທິ​ການ-ຮອງເລ​ຂາ​ທິ​ການ ແລະ ພະ​ນັກ​ງານ​ທີ່​ຮັບ​ຜິດ​ຊອບ​ວຽກ​ງານ​ຈັດ​ຕັ້ງ-ພະ​ນັກ​ງານ​ຂອງຄະ​ນະ​ເລ​ຂາ​ທິ​ການ ສພຂ 9 ແຂວງ ພ້ອມດ້ວຍວິ​ທະ​ຍາ​ກອນຈາກກະຊວງພາຍໃນ.

ບົດ​ຮຽນ​ທີ່​ວິທະຍາກອນນຳ​ມາ​ສະ​ເໜີ​ໃນ​ຄັ້ງ​ນີ້ມີ: 1. ຫຼັກສູດການວິເຄາະ ແລະ ພັດທະນາການຈັດຕັ້ງ ປະ​ກອບ​ມີ 5 ບົດ​ຄື: 1) ຄວາມເຂົ້າໃຈກ່ຽວກັບການວິເຄາະການຈັດຕັ້ງ, 2) ຄວາມເຂົ້າໃຈກ່ຽວກັບຂະບວນການພັດທະນາການຈັດຕັ້ງ, 3) ການນຳໃຊ້ເຄື່ອງມື ແລະ ວິທີວິເຄາະອົງ ການຈັດຕັ້ງ, 4) ການວາງແຜນ ແລະ ການປະຕິບັດ ການພັດທະນາອົງການຈັດຕັ້ງ, 5) ການຕິດຕາມ ແລະ ການປະເມີນຜົນກິດຈະກຳການພັດທະນາອົງການຈັດຕັ້ງ; 2. ຫຼັກສູດການຄຸ້ມຄອງບຸກຄະລາກອນ ປະ​ກອບ​ມີ 2 ບົດ​ຄື: 1) ການບໍລິຫານຊັບພະຍາກອນມະນຸດ, 2) ຍົກສູງຄຸນນະ ພາບກ່ຽວກັບການຄຸ້ມຄອງພະນັກງານ.

ທ່ານ ນາງ ປິ່​ງ​ຄຳ ລາ​ຊະ​ສິມ​ມາ ໄດ້​ມີ​ຄຳ​ເຫັນ​ກ່າວ​ເປີດຊຸດ​ເຝິກ​ອົບ​ຮົມ​ທີ່ມີບ​າງ​ຕອນ​ສຳ​ຄັນ​ວ່າ: ວຽກງານວິ ເຄາະ, ພັດທະນາການຈັດຕັ້ງ ແລະ ການຄຸ້ມຄອງບຸກຄະລາກອນ ເຊິ່ງເປັນຂໍກຸນແຈວຽກທີ່ມີຄວາມສຳຄັນ ແລະ ຈຳ ເປັນທີ່ສຸດຢູ່ໃນກະຊວງ, ອົງການຕ່າງໆ ກໍຄືສະພາແຫ່ງ ຊາດ ແລະ ສະພາປະຊາຊົນຂັ້ນແຂວງ ທັງເປັນວຽກລະ ອຽດອ່ອນທີ່ພົວພັນເຖິງສິດຜົນປະໂຫຍດ ແລະ ການປະ ຕິບັດໜ້າທີ່ວຽກງານໂດຍກົງຂອງພະນັກງານ-ລັດຖະກອນ ເນື່ອງຈາກພະນັກງານ-ລັດຖະກອນ ແມ່ນມີສ່ວນສຳຄັນໃນການຕັດສິນຜົນໄດ້, ຜົນເສຍຂອງການປະຕິບັດໜ້າທີ່ການເມືອງຂອງການຈັດຕັ້ງ ທັງເປັນກຳລັງແຮງໃນການຂັບເຄື່ອນກົງຈັກໃຫ້ກ້າວໄປສູ່ຄວາມສຳເລັດ; ເພື່ອຮັບປະກັນເຮັດໃຫ້ການດຳເນີນຊຸດ​ເຝິກ​ອົບ​ຮົມ​ບັນລຸຜົນສຳເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້ນັ້ນ, ຮຽກຮ້ອງມາຍັງບັນດາ ທ່ານຜູ້ເຂົ້າຮ່ວມ ຈົ່ງເອົາໃຈໃສ່ຕິດຕາມຮັບຟັງການສະເໜີ, ຄົ້ນຄວ້າ, ແລກປ່ຽນຄຳເຫັນຕໍ່ເນື້ອໃນເອກະສານຕ່າງໆທີ່ວິທະຍາກອນນຳມາສະເໜີ ເພື່ອເປັນບົດຮຽນໃຫ້ແກ່ການແກ້ໄຂບັນຫາໃນຕໍ່ໜ້າໃຫ້ມີປະສິດ ທິພາບສູງ.

ການຈັດເຝິກອົບຮົມຄັ້ງ​ນີ້ ຈະດໍາເນີນໄປຮອດວັນທີ 23 ກຸມພາ 2024 ຈຶ່ງຈະສໍາເລັດ.

(ພາບ ແລະ ຂ່າວ: ນາງ ສຸ​ມົນ​ທາ ງາ​ໄຊ)