ວັນອັງຄານທີ 4 ເມສາ 2023 ຢູ່ທີ່ຫ້ອງປະຊຸມສະພາປະຊາຊົນແຂວງ, ຄະນະປະຈໍາສະພາປະຊາຊົນແຂວງ ໄດ້ເປີດກອງປະຊຸມປະຈໍາເດືອນ ມີນາ 2023, ໂດຍການເປັນປະທານຂອງທ່ານ ຄໍາດີ ວົງລ້ອມ ຮອງເລຂາພັກແຂວງ, ປະທານສະພາປະຊາຊົນແຂວງ, ມີທ່ານ ຄໍາເຜີຍ ງອນວັນຄໍາ ກໍາມະການປະຈໍາພັກແຂວງ, ຮອງປະທານສະພາປະຊາຊົນແຂວງ ແລະ ບັນດາທ່ານໃນຄະນະປະຈໍາສະພາປະຊາຊົນແຂວງ ເຂົ້າຮ່ວມ.

ພາຍາຫຼັງໄດ້ຮັບຟັງການຜ່ານຮ່າງບົດສະຫຼຸບຕີລາຄາການເຄື່ອນໄຫວວຽກງານປະຈໍາເດືອນ ມີນາ ແລະ ວາງທິດທາງແຜນການ ປະຈໍາເດືອນ ເມສາ 2023 ແລະ ຮ່າງບົດສະຫຼຸບປະຈໍາໄຕມາດ I ປີ 2023 ຂອງຄະນະປະຈໍາສະພາປະຊາຊົນແຂວງ ແລະ ປະກອບຄໍາຄິດເຫັນໃສ່ 2 ຮ່າງບົດສະຫຼຸບດັ່ງກ່າວຢ່າງກົງໄປກົງມາ. ຫຼັງຈາກນັ້ນ, ບັນດາທ່ານໃນຄະນະປະຈໍາສະພາປະຊາຊົນແຂວງ ໄດ້ຄົ້ນຄວ້າ, ປຶກສາຫາລື ກ່ຽວກັບບັນດາຄໍາສະເໜີຂອງຜູ້ມີສິດເລືອກຕັ້ງ ໃນການລົງເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ຢູ່ອ້ອມຂ້າງແຂວງ ແລະ 7 ເມືອງ, ເຊິ່ງບັນດາຄໍາສະເໜີ ສ່ວນຫຼາຍແມ່ນຕິດພັນກັບການພັດທະນາ ແລະ ປັບປຸງພື້ນຖານໂຄງລ່າງເປັນຕົ້ນ: ບັນຫາເສັ້ນທາງເປເພ, ລະບົບນໍ້າລິນ-ນໍ້າໃຊ້ບໍ່ພຽງພໍ, ການຂະຫຍາຍສັນໂທລະສັບ, ການຂະຫຍາຍຕາຂ່າຍໄຟຟ້າ, ປັບປຸງກໍ່ສ້າງອາຄານຮຽນ, ສຸກສາລາ, ການປູກ-ການລ້ຽງ, ບ່ອນທໍາການຜະລິດ, ບັນຫາປະກົດການຫຍໍ້ທໍ້, ການຕັດໄມ້-ຖາງປ່າ ແລະ ບັນຫາອື່ນໆ ທີ່ຕິດພັນກັບຊີວິດການເປັນຢູ່ປະຈໍາວັນຂອງປະຊາຊົນ, ເຊິ່ງບັນດາຄໍາສະເໜີເຫຼົ່ານັ້ນ ແມ່ນໄດ້ສັງລວມຄືນ ແລະ ນໍາເຂົ້າມາປຶກສາຫາລືກັນໃນກອງປະຊຸມຄະນະປະຈໍາຄັ້ງນີ້ ເພື່ອມອບໃຫ້ບັນດາຄະນະກໍາມະການນໍາສົ່ງໃຫ້ພາກສ່ວນທີ່ກ່ຽວຂ້ອງ ກໍາໄດ້ສະພາບການ, ຄົ້ນຄວ້າພິຈາລະນາ, ແກ້ໄຂຕາມລະບຽບການ ແລະ ທັນເວລາ.

ພ້ອມນັ້ນ, ກອງປະຊຸມຍັງໄດ້ປະກອບຄໍາເຫັນ ແລະ ປຶກສາຫາລືວຽກງານພົ້ນເດັ່ນອື່ນໆ ອີກຈໍານວນໜຶ່ງ.

 ພາບ/ຂ່າວ: ແສງພອນ ອິນນະລົງ.