ໃນວາລະເຂົ້າຮ່ວມກອງປະຊຸມສະໄໝສາມັນເທື່ອ 4 ຂອງສະພາແຫ່ງຊາດ ຊຸດທີ IX, ທ່ານ ນາງ ຄໍາພອນ ພິມມະຈັນ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 04 ແຂວງອຸດົມໄຊ, ຮອງປະທານສະພາປະຊາຊົນແຂວງ ໄດ້ຕາງໜ້າຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 04 ສືບຕໍ່ໃຫ້ສຳພາດຕໍ່ກົມສື່ມ່ວນຊົນສະພາແຫ່ງຊາດ ກ່ຽວກັບ ຄາດໝາຍສູ້ຊົນຂອງຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ວ່າ:
ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ທີ 04 ແຂວງອຸດົມໄຊ ຈະໄດ້ສືບຕໍ່ຈັດຕັ້ງຜັນຂະຫຍາຍບັນດາມະຕິຂອງສູນກາງພັກ, ມະຕິຂອງສະພາແຫ່ງຊາດ ໃຫ້ໄດ້ຮັບຜົນດີບໍ່ວ່າຈະເປັນດ້ານການເມືອງ, ເສດຖະກິດ ໃຫ້ມີຄວາມໝັ້ນທ່ຽງ, ສັງຄົມມີຄວາມເປັນລະບຽບຮຽບຮ້ອຍ, ປະຊາຊົນມີຄວາມສາມັກຄີປອງດອງເປັນປຶກແຜ່ນ, ຮັບປະກັນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໄປຕາມຄາດໝາຍທີ່ສະພາແຫ່ງຊາດໄດ້ຮັບຮອງໃຫ້ໄດ້ຮັບຜົນດີ ແລະ ມີປະສິດທິພາບປະສິດທິຜົນ, ເພີ່ມທະວີເອົາໃຈໃສ່ປັບປຸງດ້ານອ່ອນ, ຂໍ້ຄົງຄ້າງໃນໄລຍະຜ່ານມາໃຫ້ກ້າວໜ້າ ແລະ ເປັນຮູບປະທໍາ ໃຫ້ດີກວ່າເກົ່າ ຕິດພັນກັບການຍົກສູງສູງ, ສ້າງລະດັບຄວາມຮູ້ຄວາມສາມາດຂອງຊັບພະຍາກອນຂອງຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ໃຫ້ມີຄຸນນະພາບຂື້ນກວ່າເກົ່າ.
ດ້ານນິຕິບັນຍັດ: ສືບຕໍ່ກຳນົດຈຸດສຸມເປົ້າໝາຍການລົງໂຄສະນາເຜີຍແຜ່ກົດໝາຍ ແລະ ນິຕິກໍາໃຕ້ກົດໝາຍ ທີ່ຕິດພັນກັບຜົນສໍາເລັດກອງປະຊຸມສະໄໝສາມັນເທື່ອທີ 4-5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ຕາມແຜນການທີ່ວາງໄວ້, ພ້ອມທັງເກັບກໍາເອົາຄໍາຄິດຄໍາເຫັນຂອງປະຊາຊົນ, ປະສານສົມທົບກັບຄະນະປະຈໍາສະພາປະຊາຊົນແຂວງ ໃນການຊຸກຍູ້ພາກສວນກ່ຽວຂ້ອງຄົ້ນຄວ້າບັນດາຮ່າງນິຕິກໍາຂອງອົງການປົກຄອງແຂວງ ເພື່ອນໍາເຂົ້າພິຈາລະນາໃນກອງປະຊຸມສະໄໝສາມັນຂອງສະພາປະຊາຊົນແຂວງອຸດົມໄຊ ຊຸດທີ II; ຕັ້ງໜ້າຫັນລົງຮາກຖານເພື່ອນໍາເນື້ອໃນຜົນສຳເລັດກອງປະຊຸມ, ພ້ອມທັງຫັນເອົາແຜນນະໂຍບາຍຂອງພັກ, ກົດໝາຍຂອງລັດລົງໄປໂຄສະນາເຜີຍແຜ່ ໃຫ້ປະຊາຊົນຮັບຮູ້ເຂົ້າໃຈຢ່າງກວ້າງຂວາງ; ຄະນະສະມາຊິກສະພາແຫ່ງຊາດ ສືບຕໍ່ປະສານສົມທົບກັບຄະນະປະຈໍາສະພາປະຊາຊົນແຂວງ ແລະ ພາກສ່ວນທີ່ກ່ຽວຂ້ອງໃນການແກ້ໄຂບັນດາຄໍາສະເໜີ, ໂທລະສັບສາຍດ່ວນ ໃຫ້ຖືກຕ້ອງຕາມລະບຽບການ ແລະ ທັນເວລາ.
ດ້ານການຕົກລົງບັນຫາສໍາຄັນ: ເປັນເຈົ້າການເຂົ້າຮ່ວມແຕ່ຫົວທີໃນການຄົ້ນຄວ້າ, ວິເຄາະ, ວິໄຈ ແລະ ສັງລວມບັນຫາຕ່າງໆ ທີ່ຕິດພັນກັບບົດລາຍງານຂອງລັດຖະບານທີ່ເກີດຂື້ນໃນເຂດເລືອກຕັ້ງຂອງຕົນ, ເພື່ອເປັນບ່ອນອີງໃນການຄົ້ນຄວ້າ ແລະ ປະກອບຄຳເຫັນ, ເຂົ້າຮ່ວມກອງປະຊຸມ ເພື່ອຄົ້ນຄວ້າພິຈາລະນາ ແລະ ຮັບຮອງແຜນພັດທະນາເສດຖະກິດ-ສັງຄົມ, ງົບປະມານແຫ່ງລັດ ແລະ ບັນຫາສໍາຄັນຕ່າງໆ ໃນກອງປະຊຸມສະໄໝສາມັນເທື່ອທີ່ 5-6 ຂອງສະພາແຫ່ງຊາດ ຊຸດທີ IX; ເປັນເຈົ້າການເຂົ້າຮ່ວມກອງປະຊຸມຕາມແຈ້ງການເຊີນຂອງສູນກາງ ແລະ ທ້ອງຖີ່ນຈັດຂື້ນໃນແຕ່ລະໄລຍະ.
ດ້ານການຕິດຕາມກວດກາ: ເປັນເຈົ້າການປະສານສົມທົບກັບຄະນະປະຈຳສະພາແຫ່ງຊາດ, ບັນດາກຳມາທິການຂອງສະພາແຫ່ງຊາດ ທີ່ລົງມາເຄື່ອນໄຫວຕິດຕາມກວດກາຢູ່ແຂວງອຸດົມໄຊ; ສືບຕໍ່ຊີ້ນໍາວຽກງານຂະແໜງວຽກງານສະມາຊິກສະພາແຫ່ງຊາດ ແລະ ປະສານສົມທົບກັບບັນດາຄະນະກໍາມະການຂອງສະພາປະຊາຊົນແຂວງ, ໃນການຕິດຕາມກວດກາການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍ, ແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ, ແຜນເງິນຕາ, ໂຄງການລົງທຶນຂະໜາດໃຫ່ຍທີ່ສົ່ງຜົນກະທົບ ຕໍ່ການດໍາລົງຊີວິດຂອງປະຊາຊົນ ໂດຍສະເພາະແມ່ນໂຄງການຂຸດຄົ້ນແຮ່ທາດ, ການເຄົາລົບ ແລະ ປະຕິບັດກົດໝາຍຂົງເຂດຍຸຕິທໍາ ແລະ ປກຊ-ປກສ ແລະ ບັນຫາອຶ່ນໆ; ປະສານສົມທົບກັບຄະນະປະຈຳສະພາປະຊາຊົນແຂວງ ແກ້ໄຂຄຳຮ້ອງຂໍຄວາມເປັນທຳຂອງພົນລະເມືອງໃຫ້ຮັບປະກັນຄວາມຖືກຕ້ອງຕາມກົດໝາຍ, ຍຸຕິທຳ, ໂປ່ງໃສ, ແລະ ທັນເວລາ.
ພ້ອມນັ້ນ, ທ່ານໄດ້ມີຂໍ້ສະເໜີຫາອົງການຈັດຕັ້ງລັດ ແລະ ພາກສ່ວນກ່ຽວຂ້ອງຄື: ສະເໜີເຖີງລັດຖະບານຊ່ວຍຄົ້ນຄວ້າ ກ່ຽວກັບ ການເພີ່ມເງິນເດືອນຂັ້ນພື້ນຖານໃຫ້ພະນັກງານ-ລັດຖະກອນໃນຂອບເຂດທົ່ວປະເທດ; ສະເໜີລັດຖະບານແບ່ງປັນງົບປະມານໃຫ້ແຂວງອຸດົມໄຊ ເພື່ອນໍາເຂົ້າໃນການຟື້ນຟູພື້ນຖານໂຄງລ່າງທີ່ຖືກໄພພິບັດນໍ້າຖ້ວມ ໃນທ້າຍເດືອນ ສິ່ງຫາ 2022 ທີ່ຜ່ານມາ.
ພາບ/ຂ່າວ: ແສງພອນ ອິນນະລົງ.