ໃນລະຫວ່າງວັນທີ 27-28 ມີນາ 2024 ຜ່ານມາ, ທ່ານ ດຣ ຄໍາຈັນ ໂສຕາປະເສີດ ກໍາມຄະນະປະຈໍາສະພາແຫ່ງຊາດ, ປະທານກໍາມາທິການບັນດາເຜົ່າ, ຄະນະຮັບຜິດຊອບປັບປຸງກົດໝາຍ ໃນຂົງເຂດສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວເຮັດວຽກຮ່ວມກັບ ສະພາປະຊາຊົນແຂວງໄຊສົມບູນ ໂດຍຖືກຕ້ອນຮັບຈາກ ທ່ານ ພັອ ວິໄຊທໍ່ ເພຍຫຼວງຈົ່ງເສີ ຄະນະ ສສຊ ປະຈໍາເຂດເລືອກຕັ້ງທີ 18, ຮອງປະທານສະພາປະຊາຊົນແຂວງ ແລະ ໃຫ້ກຽດເຂົ້າຮ່ວມຂອງ ທ່ານ ຕົ່ງມົວ ຊົ່ວໂກ້ ຮອງເລຂາພັກແຂວງ, ຮອງເຈົ້າແຂວງໄຊສົມບູນ ມີບັນດາທ່ານ ສສຂ ແລະ ມີຄະນະພັກ-ຄະນະນໍາຂອງແຂວງໄຊສົມບູນ ກໍໃຫ້ກຽດເຂົ້າຮ່ວມໃນຄັ້ງນີ້ດ້ວຍ.

ໃນໂອກາດນີ້, ທ່ານ ດຣ ຄໍາຈັນ ໂສຕາປະເສີດ ປະທານກອງປະຊຸມ ໄດ້ກ່າວເປີດກອງປະຊຸມ ທ່ານ ໄດ້ໃຫ້ຮູ້ຄື: ໂດຍປະຕິບັດຕາມພາລະບົດບາດ, ສິດ ແລະໜ້າທີ່ຂອງ ຄະນະຮັບຜິດຊອບປັບປຸງກົດໝາຍ ທີ່ສະພາແຫ່ງຊາດ ໄດ້ກໍານົດນໍາໃຊ້ ໃນໄລຍະຜ່ານມາ ທີ່ເຫັນວ່າ: ບໍ່ສອດຄ່ອງກັບການປະຕິບັດຕົວຈິງນັ້ນ ຈຶ່ງຕ້ອງປັບປຸງຄືນ ໃນຫຼາຍມາດຕາຂອງ ກົດໝາຍວ່າດ້ວຍສະພາແຫ່ງຊາດ, ກົດໝາຍວ່າດ້ວຍສະພາປະຊາຊົນຂັ້ນແຂວງ, ກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ. ໂດຍຄະນະປະຈໍາສະພາແຫ່ງຊາດ ໄດ້ແຕ່ງຕັ້ງຄະນະຮັບຜິດຊອບວຽກນີ້ ໂດຍສະເພາະ ເພື່ອລົງເຄື່ອນໄຫວທາບທາມ ຮ່າງກົດໝາຍ 03 ສະບັບ ໃນແຕ່ລະທ້ອງຖິ່ນ. ແລ້ວທ່ານ ໄດ້ນໍາສະເໜີບົດລາຍງານກ່ຽກັບ ການປັບປຸງກົດໝາຍ ວ່າດ້ວຍສະພາແຫ່ງຊາດ, ກົດໝາຍວ່າດ້ວຍສະພາປະຊາຊົນຂັ້ນແຂວງ, ກົດໝາຍວ່າດ້ວຍການເລືອກຕັ້ງສະພາແຫ່ງຊາດ ແລະ ກົດໝາຍວ່າດ້ວຍການເລືອກຕັ້ງສະພາປະຊາຊົນຂັ້ນແຂວງ (ສະບັບປັບປຸງ), ພ້ອມທັງເຈາະຈີ້ມ ແລະໃຫ້ທິດຊີ້ນໍາໃນການປະກອບຄໍາເຫັນຕໍ່ຮ່າງກົດໝາຍ ວ່າດ້ວຍສະພາແຫ່ງຊາດ ແລະ ສະພາປະຊາຊົນຂັ້ນແຂວງ.

ໃນໂອກາດດຽວກັນນັ້ນ, ບັນດາທ່ານ ຜູ້ແທນກອງປະຊຸມໄດ້ຜັດປ່ຽນກັນ ປະກອບຄໍາເຫັນຕໍ່ຮ່າງກົດໝາຍ 03 ສະບັບ, ຢ່າງຄຶກຄື້ນ ແບບກົງໄປກົງມາ ແລະ ທ່ານ ປະທານກອງປະຊຸມ ໄດ້ສະຫຼຸບ-ສັງລວມ ການປະກອບຄໍາຕໍ່ບົດລາຍງານ ກ່ຽວກັບການປັບປຸງກົດໝາຍ ທີ່ມີຫຼາຍຈຸດ, ຫຼາຍມາດຕາທີ່ຕ້ອງໄດ້ປັບປຸງຄືນ ຕາມການສະເໜີຂອງຜູ້ແທນ ແລະ ພາກສ່ວນຮັບຜິດຊອບປັບປຸງກົດໝາຍ ຈະນໍາເອົາຂໍ້ມູນອັນລະອຽດນັ້ນ ເພື່ອນໍາໄປລາຍງານໃຫ້ແກ່ສະພາແຫ່ງຊາດ ຮັບຊາບ ແລະ ປັບປຸງກົດໝາຍ 03 ສະບັບ ຕາມການສະເໜີມານີ້ຢ່າງເໝາະສົມ.

(ນາງ ອໍາໄພພອນ ແກ້ວວິໄລ)