(ສພຊ) ເພື່ອປຶກສາຫາລື ບັນຫາສໍາຄັນ ແລະ ຮີບດ່ວນຂອງສັງຄົມ ໃຫ້ມີຄວາມເປັນເອກະພາບ ແລະ ຊີ້ນໍາບັນດາກະຊວງ, ອົງການທີ່ກ່ຽວຂ້ອງ ໃນການຈັດຕັ້ງປະຕິບັດ ໃຫ້ໄດ້ຮັບຜົນສໍາເລັດ ແລະ ທັນເວລານັ້ນ, ກອງປະຊຸມຮ່ວມ ລະຫວ່າງ ຄະນະປະຈໍາສະພາແຫ່ງຊາດ ແລະ ຄະນະລັດຖະບານ ຄັ້ງທີ II ປະຈໍາປີ 2023 ໄດ້ດໍາເນີນຂຶ້ນ ໃນວັນທີ 12 ຕຸລາ 2023 ຢູ່ທີ່ຫໍປະຊຸມແຫ່ງຊາດ ໂດຍການເປັນປະທານຮ່ວມຂອງທ່ານ ປອ. ສອນໄຊ ສີພັນດອນ ກຳມະການກົມການເມືອງສູນກາງພັກ, ນາຍົກລັດຖະມົນຕີ ແລະ ທ່ານ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດ; ເຂົ້າຮ່ວມມີບັນດາທ່ານ ຮອງປະທານຄະນະປະຈຳສະພາແຫ່ງຊາດ, ບັນດາຮອງນາຍົກລັດຖະມົນຕີ, ບັນດາກຳມະການຄະນະປະຈຳສະພາແຫ່ງຊາດ, ຄະນະລັດຖະບານ ພ້ອມດ້ວຍພາກສ່ວນກ່ຽວຂ້ອງ.

ໃນກອງປະຊຸມໄດ້ຄົ້ນຄວ້າປຶກສາຫາລືບັນຫາສຳຄັນຕ່າງໆຂອງຊາດ ເປັນຕົ້ນ: (1) ບົດລາຍງານຜົນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ແຜນເງິນຕາໃນໄລຍະ 9 ເດືອນຕົ້ນປີ, ຄາດຄະເນໝົດປີ 2023, ທິດທາງແຜນການ 3 ເດືອນທ້າຍປີ 2023 ແລະ ສະເໜີທິດທາງແຜນການໃນປີ 2024; ແຜນຈຸດສຸມໂຄງການລົງທຶນຂອງລັດປີ 2024 ແລະ ສະເໜີບັນຊີໂຄງການຕ້ານຕາຝັ່ງເຈື່ອນ ແລະ ໂຄງການສ້ອມແປງເສັ້ນທາງຫຼວງແຫ່ງຊາດ ແລະ ທາງຫຼວງຂອງແຂວງ ທີ່ເປັນບຸລິມະສິດ ໃນປີ 2024. (2) ບົດ ລາຍງານຜົນສໍາເລັດທີ່ພົ້ນເດັ່ນໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ ແລະ ສະເໜີແຜນວຽກຈຸດສຸມໃນຕໍ່ໜ້າ; (3) ບົດລາຍງານຜົນສໍາເລັດພົ້ນເດັ່ນໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໃນໄລຍະຜ່ານມາ ແລະ ສະເໜີແຜນວຽກຈຸດສຸມໃນຕໍ່ໜ້າ. (4) ບົດລາຍງານການແກ້ໄຂຄວາມຫຍຸ້ງຍາກທາງດ້ານເສດຖະກິດ ໃນໄລຍະ 3 ເດືອນ ແລະ ສະເໜີທິດທາງມາດຕະການແຕ່ນີ້ຮອດໝົດປີ 2023; (4) ບົດລາຍງານການຈັດຕັ້ງປະຕິບັດ ໂຄງການສໍາປະທານຕ່າງໆ ໃນໄລຍະຜ່ານມາ ແລະ ສະເໜີທິດທາງມາດຕະການໃນການຄຸ້ມຄອງໃນຕໍ່ໜ້າ ລວມທັງການສະເໜີ ການແບ່ງຂັ້ນໃນການອະນຸມັດ ແລະ ຄຸ້ມຄອງໂຄງການສຳປະທານ ລະຫວ່າງ ສູນກາງ ແລະ ທ້ອງຖິ່ນ ໃນຕໍ່ໜ້າ; ບົດລາຍງານແຜນການສ້າງ ແລະ ປັບປຸງກົດໝາຍໃນໄລຍະແຕ່ປີ 2024-2025, ປຶກສາຫາລືວາລະທີ່ຕິດພັນກັບຄວາມຮັບຜິດຊອບຂອງລັດຖະບານ ທີ່ຈະລາຍງານຕໍ່ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ສະຫຼຸບຕີລາຄາກົນໄກປະສານງານ ລະຫວ່າງ ລັດຖະບານ ແລະ ສະພາແຫ່ງຊາດ ໃນໄລຍະຜ່ານມາ ແລະ ທິດທາງປັບປຸງໃນຕໍ່ໜ້າ.