(ສພຊ) ລະຫວ່າງວັນທີ 19-22 ພຶດສະພາ 2023 ຄະນະມິດຕະພາບລັດຖະສະພາລາວ-ສ.ເກົາຫຼີ ນຳໂດຍທ່ານ ຮສ. ປອ. ລິນຄຳ ດວງສະຫວັນ ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ທັງເປັນປະທານຄະນະມິດຕະພາບລັດຖະສະພາລາວ-ສ.ເກົາຫຼີ ພ້ອມດ້ວຍຄະນະ ໄດ້ເດີນທາງຢ້ຽມຢາມ ສ.ເກົາຫຼີ.
ໃນການຢ້ຽມຢາມຄັ້ງນີ້ ຄະນະມິດຕະພາບລັດຖະສະພາລາວ-ສ.ເກົາຫຼີ ໄດ້ເຂົ້າຢ້ຽມຂໍ່ານັບ ທ່ານ Chung Woo Taik ຮອງປະທານສະພາແຫ່ງຊາດ ແຫ່ງ ສ.ເກົາຫຼີ ໂດຍທ່ານໄດ້ກ່າວຕ້ອນຮັບຄະນະຜູ້ແທນ ຄະນະມິດຕະພາບລັດຖະສະພາລາວ-ສ.ເກົາຫຼີ ຢ່າງອົບອຸ່ນ ແລະ ໄດ້ຕີລາຄາສູງ ຕໍ່ສາຍພົວພັນຮ່ວມມື ທີ່ມີມູນເຊື້ອອັນດີງາມ ມາແຕ່ດົນນານ ລະຫວ່າງ ສອງປະເທດ ສ.ເກົາຫຼີ-ລາວ ກໍຄື ລະຫວ່າງສອງສະພາແຫ່ງຊາດ ທີ່ໄດ້ມີການພົວພັນປະສານງານ ແລະ ສະໜັບສະໜູນ ເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ ພ້ອມນັ້ນ, ທັງສອງປະເທດ ກໍໄດ້ມີການຮ່ວມມືກັນຫຼາຍດ້ານ ເປັນຕົ້ນ: ດ້ານການລົງທຶນ, ການຄ້າ, ການສຶກສາ, ການທ່ອງທ່ຽວ ແລະ ທ່ານ ໄດ້ເນັ້ນຕໍ່ຄະນະມິດຕະພາບ ລັດຖະສະພາລາວ-ສ.ເກົາຫຼີ ຂອງສະພາແຫ່ງຊາດລາວ ໃນການສືບຕໍ່ສົ່ງເສີມການຮ່ວມມື ລະຫວ່າງ ສອງປະເທດ ກໍຄື ສອງອົງການນິຕິບັນຍັດໃຫ້ມີການຂະຫຍາຍຕົວຫຼາຍຂຶ້ນກວ່າເກົ່າ.
ໃນໂອກາດດັ່ງກ່າວ, ທ່ານ ຮສ. ປອ. ລິນຄຳ ດວງສະຫວັນ ຫົວໜ້າຄະນະຜູ້ແທນລາວ ກໍໄດ້ກ່າວສະແດງຄວາມຂອບໃຈ ຕໍ່ທ່ານຮອງປະທານສະພາແຫ່ງຊາດ ແລະ ສະພາແຫ່ງຊາດ ສ.ເກົາຫຼີ ທີ່ໄດ້ໃຫ້ການຕ້ອນຮັບແກ່ຄະນະຜູ້ແທນລາວ ເປັນຢ່າງດີ ແລະ ໄດ້ຕີລາຄາສູງ ຕໍ່ສາຍພົວພັນຮ່ວມມືທີ່ມີມູນເຊື້ອອັນດີງາມ ມາແຕ່ດົນນານ ລະຫວ່າງ ສອງປະເທດ ລາວ-ສ.ເກົາຫຼີ ກໍຄື ສອງອົງການນິຕິບັນຍັດ ຂອງສອງປະເທດ. ທ່ານຫົວໜ້າຄະນະຜູ້ແທນລາວ ໄດ້ກ່າວສະໜັບສະໜູນການເປັນເຈົ້າພາບງານ World Expo 2030 ທີ່ເມືອງ Busan, ໄດ້ສະແດງຄວາມຂອບໃຈ ແລະ ໄດ້ຕີລາຄາສູງ ທີ່ ສ.ເກົາຫຼີ ໄດ້ໃຫ້ການຊ່ວຍເຫຼືອ ແລະ ສະໜັບສະໜູນ ສປປລາວ ມາໂດຍຕະຫຼອດ ພ້ອມດຽວກັນນັ້ນ, ທ່ານຍັງໄດ້ແຈ້ງກ່ຽວກັບການກະກຽມເປັນເຈົ້າພາບ ກອງປະຊຸມສະມັດຊາໃຫຍ່ລັດຖະສະພາ ລະຫວ່າງຊາດອາຊຽນ ຄັ້ງທີ 45 ທີ່ຈະຈັດຂຶ້ນ ຢູ່ ສປປລາວ ໃນປີ 2024 ແລະ ຫວັງຢ່າງຍິ່ງວ່າ ສະພາແຫ່ງຊາດ ສ.ເກົາຫຼີ ຈະໃຫ້ການຊ່ວຍເຫຼືອ ແລະ ສະໜັບສະໜູນ ສະພາແຫ່ງຊາດລາວ ໃນການເປັນເຈົ້າພາບຈັດກອງປະຊຸມໃຫຍ່ຄັ້ງນີ້. ພ້ອມດຽວກັນນັ້ນ, ຄະນະຜູ້ແທນລາວ ຍັງໄດພົບປະ ແລະ ເຮັດວຽກ ກັບທ່ານ Kim Hack Young ປະທານຄະນະມິດຕະພາບລັດຖະສະພາ ສ.ເກົາຫຼີ-ລາວ ພ້ອມດ້ວຍຄະນະ ເຊິ່ງໄດ້ປຶກສາຫາລືກັນ ກ່ຽວກັບການສົ່ງເສີມການຮ່ວມມື ຂອງສອງຄະນະມິດຕະພາບລັດຖະສະພາ ກໍຄືສອງສະພາແຫ່ງຊາດ ໃນຕໍ່ໜ້າ ໃຫ້ມີການແລກປ່ຽນການຢ້ຽມຢາມ ໄປມາຫາສູ່ນຳກັນຢ່າງເປັນປົກກະຕິ; ຊຸກຍູ້ສົ່ງເສີມໃຫ້ລັດຖະບານຂອງສອງປະເທດ ສືບຕໍ່ຈັດຕັ້ງປະຕິບັດບັນດາສັນຍາ, ສົນທິສັນຍາ ແລະ ຂໍ້ຕົກລົງ ທີ່ໄດ້ເຊັນຮ່ວມກັນ ໃຫ້ມີປະສິດທິພາບ ປະສິດທິຜົນ ນຳເອົາຜົນປະໂຫຍດອັນແທ້ຈິງມາສູ່ປະຊາຊົນ ຂອງສອງປະເທດ ແລະ ສືບຕໍ່ໂຄສະນາເຜີຍແຜ່ການພົວພັນຮ່ວມມືທີ່ມີມູນເຊື້ອອັນດີງາມຂອງສອງປະເທດ ທີ່ເປັນທ່າແຮງ ເພື່ອດຶງດູດນັກທຸລະກິດ ຂອງ ສ.ເກົາຫຼີ ເຂົ້າມາລົງທຶນ ຢູ່ ສປປລາວ ໃຫ້ຫຼາຍຂຶ້ນ.
ໃນໂອກາດຢ້ຽມຢາມຄັ້ງນີ້, ຄະນະຜູ້ແທນລາວ ຍັງໄດ້ໄປຢ້ຽມຢາມ ແລະ ເຮັດວຽກຢູ່ເມືອງ Heongsung ແຂວງ Gangwon ເຊິ່ງເປັນເມືອງໜຶ່ງທີ່ມີຊື່ສຽງທາງດ້ານການຜະລິດກະສິກຳ, ຢ້ຽມຢາມສວນປູກພືດຜັກ Oseong ແບບທັນສະໄໝ (Smart Farm), ໂຮງງານຜະລິດເຂົ້າໜົມ Milwon Anheung ແລະ ໃນໂອກາດດັ່ງກ່າວ ຄະນະຜູ້ແທນລາວ ກໍຍັງໄດ້ໄປຢ້ຽມຢາມ ບໍລິສັດຜະລິດລົດຍົນ ຂອງບໍລິສັດ KIA ທີ່ເມືອງ Hwaseong-si ແຂວງ Gyeonggi-do ຕື່ມອີກ.