(ສພຊ) – ເພື່ອເປັນການກະກຽມໃຫ້ແກ່ການເປັນເຈົ້າພາບກອງປະຊຸມໃຫຍ່ໄອປາ ຄັ້ງທີ 45 ທີ່ຈະຈັດຂຶ້ນທີ່ ນະຄອນຫຼວງວຽງຈັນ ລະຫວ່າງວັນທີ 17-23 ຕຸລາທີ່ຈະມາເຖິງນີ້ ດໍາເນີນໄປຕາມກໍານົດເວລາ ແລະ ບັນລຸຜົນສຳ ເລັດ; ວັນທີ 09 ສິງຫາ 2024 ທີ່ສະພາແຫ່ງຊາດ, ທ່ານ ສັນຍາ ປຣະເສີດ ປະທານກຳມາທິການການຕ່າງປະເທດ ໄດ້ນຳພາຄະນະປະທານກອງປະຊຸມກຳມາທິການປະຈຳໄອປາ, ຫົວໜ້າຄະນະຜູ້ແທນລາວ ແລະ ຜູ້ບັນທຶກລາຍງານຂອງກອງປະຊຸມກຳມາທິການປະຈຳຕ່າງໆຂອງໄອປາ ພົບປະເຮັດວຽກ ແລະ ປຶກສາຫາລືກັບທ່ານ ນາງ ຊິຕິ ໂຣໄຊເມຣິຢັນຕີ ດາໂຕະ ຮາຈິ ອັບດຸນ ຣາມັນ ເລຂາທິການໃຫຍ່ໄອປາ ພ້ອມດ້ວຍຄະນະ.
ທ່ານ ສັນຍາ ປຣະເສີດ ໄດ້ແຈ້ງໃຫ້ຊາບຜົນສຳເລັດການກຳນົດຫົວຂໍ້ ແລະ ຮ່າງບັນທຶກແນວຄວາມຄິດ (Concept Notes) ຂອງກອງປະຊຸມສະມັດຊາໃຫຍ່ໄອປາ-45 ແລະ ກອງປະຊຸມປິ່ນອ້ອມຕ່າງໆ ລວມທັງໄດ້ກະ ກຽມຮ່າງມະຕິໃນນາມສະພາແຫ່ງຊາດລາວ ທີ່ຈະສະເໜີເຂົ້າພິຈາລະນາໃນກອງປະຊຸມກຳມາທິການວຽກງານຕ່າງໆ ຂອງໄອປາ 45 ຈຳນວນ 9 ຮ່າງມະຕິ; ປັດຈຸບັນ, ພວມດຳເນີນການຮ່າງຕາຕະລາງການເຄື່ອນໄຫວ ແລະ ບັດເຊີນເຂົ້າຮ່ວມກອງປະຊຸມໃຫຍ່ໄອປາ-45 ລວມທັງປະສານງານໃນການສ້າງຕາຕະລາງການເຄື່ອນໄຫວຂອງກອງປະຊຸມພົບປະ ລະຫວ່າງຜູ້ນຳໄອປາ ກັບ ຜູ້ນຳອາຊຽນ (AIPA-ASEAN Leaders Interface) ນອກຈາກນັ້ນ, ຍັງໄດ້ປະສານສົມທົບກັບໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຫຼື ສະເຕັບສ໌ (STEPs) ໃນການຈັດເຝິກອົບຮົມທັກສະໃນການຮັບໃຊ້ກອງປະຊຸມໃຫຍ່ໄອປາ ໃຫ້ແກ່ພະນັກງານຂອງສະພາແຫ່ງຊາດ ທີ່ຈະຈັດຂຶ້ນໃນລະຫວ່າງວັນທີ 18-24 ສິງຫາ, ຈັດກອງປະຊຸມສຳມະນາກ່ຽວກັບທັກສະໃຫ້ແກ່ສະມາຊິກສະພາແຫ່ງຊາດ ລະຫວ່າງວັນທີ 27-28 ສິງຫານີ້ ຈຶ່ງສະເໜີໃຫ້ກອງເລຂາໄອປາ ມາຊ່ວຍນໍາສະເໜີບົດຮຽນ ແລະ ແລກ ປ່ຽນປະສົບການຕົວຈິງກັບຄະນະຜູ້ແທນລາວ ກ່ຽວກັບພາລະບົດບາດຂອງໄອປາ, ກົນໄກການດຳເນີນກອງປະຊຸມ, ການບັນຊາ ແລະ ການອຳນວຍຄວບຄຸມກອງປະຊຸມໄອປາ; ພ້ອມກັນນັ້ນ, ກໍສະເໜີທ່ານເລຂາທິການໃຫຍ່ໄອປາ ຢືນຢັນຄືນກ່ຽວກັບຄວາມຮັບຜິດຊອບໃນການສ້າງເອກະສານເຊັ່ນ: ບົດບັນທຶກລາຍງານກອງປະຊຸມຂອງກຳມາທິການປະຈຳຕ່າງໆ (Committee Reports), ຮ່າງຖະແຫຼງການຮ່ວມກອງປະຊຸມ (Joint Communique) ລວມທັງຜູ້ຕີພິມ, ຮຽບຮຽງ ແລະ ແປງເອກະສານກັບທີ່ໃນແຕ່ລະກອງປະຊຸມຂອງກຳມາທິການປະຈຳຕ່າງໆ. ຈາກນັ້ນ, ບັນດາຜູ້ເຂົ້າຮ່ວມ ໄດ້ມີຄຳຄິດຄຳເຫັນ, ຍົກບັນຫາ ແລະ ຄວາມສົນໃຈຂອງຕົນ ແລກປ່ຽນກັບທີມງານກອງເລຂາໄອປາຢ່າງກົງໄປກົງມາ.
ໃນຕອນບ່າຍຂອງວັນດຽວກັນ, ທ່ານ ສັນຍາ ປຣະເສີດ ຫົວໜ້າກອງເລຂາແຫ່ງຊາດໄອປາ-45 ໄດ້ສືບຕໍ່ເຮັດວຽກກັບທ່ານເລຂາທິການໃຫຍ່ໄອປາ ໃນຂົງເຂດວຽກງານເລຂານຸການ ເຊິ່ງໄດ້ປຶກສາຫາລືກ່ຽວກັບການກະກຽມໃຫ້ແກ່ກອງປະຊຸມໄອປາ-45 ໂດຍສະເພາະເປົ້າໝາຍການເຊີນບັນດາແຂກຜູ້ເຂົ້າຮ່ວມ ແລະ ປະເທດສັງເກດການໃໝ່, ການປັບປຸງທຳມະນູນຂອງໄອປາ ທັງປຶກສາຫາລືການກະກຽມເປົ້າໝາຍຜູ້ເຂົ້າຮ່ວມໃນກອງປະຊຸມລະຫວ່າງຜູ້ນຳໄອປາ ກັບ ຜູ້ນຳອາຊຽນ ເຊິ່ງຈະຈັດຂຶ້ນໃນລະຫວ່າງກອງປະຊຸມສຸດຍອດອາຊຽນ (ASEAN Summit) ທີ່ຈະຈັດຂຶ້ນໃນວັນທີ 09 ຕຸລາ 2024.
ທ່ານ ນາງ ຊິຕິ ໂຣໄຊເມຣິຢັນຕີ ດາໂຕະ ຮາຈິ ອັບດຸນ ຣາມັນ ຍັງໄດ້ເຮັດວຽກຮ່ວມກັບຄະນະສະມາຊິກສະ ພາແຫ່ງຊາດເພດຍິງລາວ ນຳໂດຍທ່ານ ນາງ ທຸມມາລີ ວົງພະຈັນ ປະທານຄະນະສະມາຊິກສະພາແຫ່ງຊາດເພດຍິງ, ປະ ທານກອງປະຊຸມສະມາຊິກລັດຖະສະພາເພດຍິງໄອປາ ຫຼື ໄວປາ (WAIPA) ເພື່ອປຶກສາຫາລືກ່ຽວກັບການຫ້າງຫາກະ ກຽມກອງປະຊຸມວຽກງານໄວປາ ແລະ ວຽກງານປິ່ນອ້ອມອີກຈຳນວນໜຶ່ງ.
(ຂ່າວ: ນາງ ອາລິນ ສຸພິມມະປະດິດ, ພາບ: ສອນສັກ ວັນວິໄຊ)