(ສພຊ) ຄະນະຜູ້ແທນສະພາແຫ່ງຊາດລາວ ນຳໂດຍທ່ານ ຄຳສິງ ໄຊສົມແພງ ຮອງປະທານກຳມາທິການວຽກງານສະມາຊິກສະພາແຫ່ງຊາດ ພ້ອມດ້ວຍຄະນະ ໄດ້ສຳເລັດການເຂົ້າຮ່ວມສັງເກດການ ການເລືອກຕັ້ງທົ່ວໄປຂອງຣາຊະອານາຈັກກຳປູເຈຍ, ຢູ່ນະຄອນຫຼວງພະນົມເປັນ, ຣາຊະອານາຈັກກຳປູເຈຍ, ໃນລະຫວ່າງວັນທີ 20-24 ກໍລະກົດ 2023. ການເລືອກຕັ້ງທົ່ວໄປ ແມ່ນຈະຈັດຂຶ້ນ ໃນທຸກ 5 ປີ ໂດຍແມ່ນຄະນະກຳມະການການເລືອກຕັ້ງ ຂອງຣາຊະອານາຈັກກຳປູເຈຍ ເປັນຜູ້ຮັບຜິດຊອບ ແລະ ການເລືອກຕັ້ງຄັ້ງນີ້ ແມ່ນການເລືອກຕັ້ງສະມາຊິກສະພາແຫ່ງຊາດກຳປູເຈຍ ຊຸດທີ VII ຂອງຣາຊະອານາຈັກກຳປູເຈຍ.

ການເລືອກຕັ້ງສະມາຊິກສະພາແຫ່ງຊາດກຳປູເຈຍຄັ້ງນີ້ ມີພັກການເມືອງເຂົ້າຮ່ວມຈຳນວນທັງໝົດ 18 ພັກຄື: ພັກສັງຄົມປະຊາທິປະໄຕ, ພັກສະຫະກອນຂະເໝນ, ພັກສັນຊາດກຳປູເຈຍ, ພັກລວມຊາດຂະເໝນ, ພັກພະລັງປະຊາທິປະໄຕ, ພັກຊາວນາ, ພັກແມ່ຍິງເພື່ອແມ່ຍິງ, ພັກຕໍ່ຕ້ານຄວາມທຸກຍາກຂະເໝນ, ພັກຟຸນຊິນຟິກ, ພັກພະລັງທຳ, ພັັກປະຊາທິປະໄຕຕົນຫຍ້າ, ພັກເປົ້າໝາຍປະຊາຊົນ, ພັກພັດທະນາເສດຖະກິດຂະເໝນ, ພັກເອກະພາບຂະເໝນ, ພັກອະນຸລັກນິຍົມຂະເໝນ, ພັກເຍົາວະຊົນກຳປູເຈຍ, ພັກປະຊາທິປະໄຕປະຊາຊົນກຳປູເຈຍ ແລະ ພັກປະຊາຊົນກຳປູເຈຍ ໂດຍຜູ້ມີສິດເລືອກຕັ້ງທັງໝົດຈຳນວນ 9.710.655 ຄົນ.

ຄະນະສັງເກດການຂອງສະພາແຫ່ງຊາດລາວ ໄດ້ເຂົ້າຮ່ວມພິທີປິດການໂຄສະນາຫາສຽງເລືອກຕັ້ງຂອງຜູ້ສະໝັກຮັບເລືອກຕັ້ງ, ຮັບຟັງຄໍາເຫັນຂອງນາຍົກລັດຖະມົນຕີຮຸນເຊັນ, ເຂົ້າຮ່ວມປະຊຸມລະຫວ່າງປະເທດວ່າດ້ວຍສັນຕິພາບ ແລະ ປະຊາທິປະໄຕ ເພື່ອຮັບຟັງ ແລະ ກຳໄດ້ເນື້ອໃນກ່ຽວກັບພາລະບົດບາດ, ໜ້າທີ່ ຂອງຄະນະກໍາມາທິການການເລືອກຕັ້ງ; ເຂົ້າຮ່ວມສັງເກດການການເປີດຫີບປ່ອນບັດ, ຂະບວນການປ່ອນບັດ, ການປິດໜ່ວຍປ່ອນບັດ, ຂະບວນການນັບຄະແນນສຽງຕົວຈິງຢູ່ໜ່ວຍເລືອກຕັ້ງຂອງເຂດເລືອກຕັ້ງເມືອງພະນົມເປັນ, ນະຄອນຫຼວງພະນົມເປັນ ແລະ ເຂົ້າຮ່ວມຖະແຫຼງຂ່າວກັບຜູ້ເຂົ້າຮ່ວມສັງເກດການຈາກ 80 ປະເທດ ແລະ 21 ອົງການຈັດຕັ້ງສາກົນ.

ຜ່ານການສັງເກດການຄັ້ງນີ້ ເຫັນວ່າ ການກະກຽມ ແລະ ດຳເນີນການເລືອກຕັ້ງແຕ່ຕົ້ນຕະຫຼອດປາຍ ມີຄວາມເປັນລະບຽບຮຽບຮ້ອຍ, ມີຄວາມສະຫງົບ, ປອດໄພ ແລະ ມີຜົນສຳເລັດເປັນຢ່າງດີ ສະແດງອອກການເລືອກຕັ້ງຄັ້ງນີ້ ມີຜູ້ໄປໃຊ້ສິດເລືອກຕັ້ງຕົວຈິງທັງໝົດ 8.212.918 ຄົນ ເຊິ່ງກວມເອົາປະມານ 84,58% ຂອງຜູ້ໄປໃຊ້ສິດເລືອກຕັ້ງ.

ຄະນະສັງເກດການຂອງສະພາແຫ່ງຊາດລາວ ແມ່ນໄດ້ຫຼາຍບົດຮຽນຈາກເລືອກຕັ້ງຄັ້ງນີ້ ເປັນຕົ້ນ: ພາລະບົດບາດຂອງຄະນະກໍາມາທິການການເລືອກຕັ້ງ, ລະບົບການເລືອກຕັ້ງ, ຂະບວນການຈັດການການເລືອກຕັ້ງ, ການປ້ອງກັນການເຄື່ອນໄຫວທີ່ບໍ່ຖືກຕ້ອງໃນການເລືອກຕັ້ງ; ການຈັດພິທີປະກາດປິດການໂຄສະນາຫາສຽງຂອງຜູ້ສະໝັກຮັບເລືອກຕັ້ງ, ການມີຄູ່ມືກຳນົດຂັ້ນຕອນຂອງການປ່ອນບັດ, ການປິດຫີບບັດ ແລະ ນັບຄະແນນ, ການຕິດຮູບພ້ອມລາຍຊື່ຂອງຜູ້ມີສິດເລືອກຕັ້ງ ແລະ ການໃຫ້ອົງການຈັດຕັ້ງພາຍໃນ ແລະ ສາກົນເຂົ້າຮ່ວມສັງເກດການ.