(ສພຊ) ໃນລະຫວ່າງວັນທີ 24-26 ເມສາຜ່ານມາ, ຄະນະຜູ້ແທນລາວ ນໍາໂດຍທ່ານ ນາງ ທຸມມາລີ ວົງພະຈັນ ປະທານກຳມາທິການວັດທະນະທຳ-ສັງຄົມ ສະພາແຫ່ງຊາດ ແລະ ທ່ານ ສຈ. ປອ. ດຣ. ມາຍຟອງ ມາຍຊາຍ ຮອງອະທິການບໍດີ ມະຫາວິທະຍາໄລ ວິທະຍາສາດສຸຂະພາບ, ກະຊວງສາທາລະນະສຸກ ໄດ້ເຂົ້າຮ່ວມກອງປະຊຸມສາກົນຂອງສະມາຊິກລັດຖະສະພາກ່ຽວກັບວຽກງານປະຊາກອນ ແລະ ການພັດທະນາ ຂອງອົງການເວທີປຶກສາຫາລືສະມາຊິກລັດຖະສະພາອາຊີ ເພື່ອສົ່ງເສີມວຽກງານປະຊາກອນ ແລະ ການພັດທະນາ (AFPPD) ເພື່ອກະກຽມໃຫ້ແກ່ກອງປະຊຸມສຸດຍອດ G7 ຮິໂລຊິມາ ປີ 2023 (GCPPD 2023) ເຊິ່ງຈັດຂຶ້ນທີ່ໂຕກຽວ ປະເທດຍີ່ປຸ່ນ. AFPPD ເປັນເວທີປຶກສາຫາລືເພື່ອໃຫ້ຄໍາແນະນໍາ ແລະ ປະສານງານດ້ານນະໂຍບາຍ ໂດຍມີເປົ້າໝາຍເພື່ອສ້າງອະນາຄົດທີ່ສົດໃສໃຫ້ແກ່ມວນມະນຸດທຸກຄົນ ໂດຍສະເພາະແມ່ນກຸ່ມຄົນທີ່ບອບບາງ ເຊັ່ນ: ແມ່ຍິງ, ເດັກນ້ອຍ, ໄວໜຸ່ມ ແລະ ປະຊາກອນສູງອາຍຸ ເຊິ່ງທີ່ຜ່ານມາກໍໄດ້ມີການຈັດກອງປະຊຸມຂັ້ນສະມາຊິກລັດຖະສະພາ ແລະ ການສໍາມະນາຫຼາຍກວ່າ 10 ຄັ້ງຕໍ່ປີ.
ຈຸດປະສົງຂອງການເຂົ້າຮ່ວມກອງປະຊຸມຄັ້ງນີ້ ເພື່ອທົບທວນຄືນຄຳໝັ້ນສັນຍາ ແລະ ການເຄື່ອນໄຫວທາງການເມືອງຂອງບັນດາສະມາຊິກລັດຖະສະພາ ແລະ ຜູ້ວາງນະໂຍບາຍຕ່າງໆ, ລວມທັງການແກ້ໄຂລະບົບສາທາລະນະສຸກໃນທົ່ວໂລກ, ບົດບາດຍິງ-ຊາຍ ແລະ ບັນຫາກ່ຽວກັບໄວໜຸ່ມທີ່ໄດ້ຮັບຜົນກະທົບຢ່າງໜັກໜ່ວງຈາກການແຜ່ລະບາດຂອງພະຍາດໂຄວິດ-19. ພ້ອມດຽວກັນນັ້ນ, ກໍເພື່ອປຶກສາຫາລືກ່ຽວກັບບັນດາມາດຕະການທີ່ສາມາດຮັບມືຕໍ່ວິກິດການ ແລະ ການແຜ່ລະບາດຂອງພະຍາດດັ່ງກ່າວ ແລະ ເລັ່ງຄວາມພະຍາຍາມໃຫ້ບັນລຸເປົ້າໝາຍການພັດທະນາແບບຍືນຍົງ ເພື່ອກະກຽມໃຫ້ແກ່ກອງປະຊຸມສຸດຍອດ G7 ຮິໂລຊິມາ ປີ 2023, ການເຂົ້າຮ່ວມກອງປະຊຸມໃນຄັ້ງນີ້ ຈຶ່ງແບ່ງອອກເປັນ 2 ກອງປະຊຸມ ຕໍ່ເນື່ອງກັນຄື: ກອງປະຊຸມ AFPPD ແລະ ກອງປະຊຸມ GCPPD. ຈໍານວນສະມາຊິກລັດຖະສະພາທີ່ເຂົ້້າຮ່ວມປະຊຸມທັງໝົດແມ່ນ 50 ທ່ານ ຕາງໜ້າຈາກ 32 ປະເທດໃນທົ່ວໂລກ.
ໃນກອງປະຊຸມ AFPPD ຄະນະຜູ້ແທນໄດ້ຮ່ວມກັນ ຮັບຮອງເອົາແຜນຍຸດທະສາດ ປີ 2023-2025 ຂອງ AFPPD; ສົນທະນາກ່ຽວກັບການເປັນເຈົ້າພາບຈັດກອງປະຊຸມຄະນະປະຈໍາ ແລະ ກອງປະຊຸມລະດັບຊາດ ກ່ຽວກັບກິດຈະກໍາຂອງ AFPPD ເຊິ່ງປະກອບມີ 3 ເສົາຄໍ້າໃຫຍ່ຄື: ສິດສະເໝີພາບຍິງ-ຊາຍ ແລະ ການສ້າງຄວາມເຂັ້ມແຂງ ໃຫ້ແມ່ຍິງ; ການລົງທຶນໃສ່ໄວໜຸ່ມ ແລະ ການມີຊີວິດຍືນຍາວທີ່ຫ້າວຫັນ ພ້ອມທັງຮັບຟັງລາຍງານກ່ຽວກັບປະເດັນສຳຄັນດ້ານປະຊາກອນ ແລະ 3 ເສົາຄໍ້າ ຈາກປະເທດ ສ.ເກົາຫຼີ ແລະ ປະເທດຕົງກາ. ພ້ອມດຽວກັນນີ້, ໃນກອງປະຊຸມ GCPPD ຄະນະຜູ້ແທນລາວກໍໄດ້ຮ່ວມຮັບຟັງ ແລະ ປະກອບຄໍາຄິດຄໍາເຫັນຢ່າງຫ້າວຫັນ ພາຍໃຕ້ 5 ຫົວຂໍ້ຫຼັກຂອງກອງປະຊຸມຄື: 1) “ຈຳນວນປະຊາກອນໂລກຮອດ 8 ຕື້ຄົນແລ້ວ ຕໍ່ໄປຈະມີຫຍັງເກີດຂຶ້ນ?”, 2) ຄວາມສະເໝີພາບຍິງ-ຊາຍ ແລະ ການສ້າງຄວາມເຂັ້ມແຂງໃຫ້ແມ່ຍິງ: ການສົ່ງເສີມສຸຂະພາບທາງເພດ-ໄວຈະເລີນພັນ ແລະ ສິດທິຂອງແມ່ຍິງ ແລະ ການປ້ອງກັນການໃຊ້ຄວາມຮຸນແຮງທາງເພດໃນດິນແດນທີ່ມີບັນຫາຄວາມຂັດແຍ່ງກັນ, 3) ການລົງທຶນໃສ່ໄວໜຸ່ມ: ການມີສ່ວນຮ່ວມ ແລະ ໂອກາດການໃຫ້ວຽກເຮັດງານທຳແກ່ເຂົາເຈົ້າ, 4) ປະຊາກອນສູງອາຍຸ ແລະ ການມີຊີວິດຍືນຍາວທີ່ແຂງແຮງ, 5) ກ່ຽວກັບເຄືອຂ່າຍສະມາຊິກລັດຖະສະພາ ເພື່ອຢັ້ງຢືນຄືນຄຳໝາຍໝັ້ນຂອງກອງປະຊຸມສາກົນວ່າດ້ວຍວຽກງານປະຊາກອນ ແລະ ການພັດທະນາ (ICPD25) ແລະ ການບັນລຸເປົ້າໝາຍການພັດທະນາແບບຍືນຍົງ ປີ 2030 ພາຍຫຼັງການລະບາດຂອງພະຍາດໂຄວິດ-19, ຫຼັງຈາກນັ້ນ, ສະມາຊິກລັດຖະສະພາຈາກ 31 ປະເທດ ກໍໄດ້ຍົກມື ລົງຄະແນນສຽງເຫັນດີເປັນເອກະພາບຮັບຮອງເອົາຮ່າງຖະແຫຼງການຂອງກອງປະຊຸມ ຍົກເວັ້ນສະມາຊິກລັດຖະສະພາຈາກປະເທດອີລ່ານ ທີ່ງົດອອກສຽງຮັບຮອງເອົາ. ຮ່າງຖະແຫຼງການດັ່ງກ່າວ ຈະໄດ້ມອບ ແລະ ນຳສະເໜີໃຫ້ທ່ານ ນາຍົກລັດຖະມົນຕີຍີ່ປຸ່ນ ເພື່ອນຳສະເໜີໃນກອງປະຊຸມກຸ່ມປະເທດ G7 ຮີໂລຊິມາ ປະເທດຍີ່ປຸ່ນ ທີ່ຈະຈັດຂຶ້ນໃນເດືອນພຶດສະພາ 2023 ແລະ ຈະນຳສະເໜີໃນກອງປະຊຸມ ຈີ 20 ທີ່ປະເທດອິນເດຍ ຈະເປັນເຈົ້າພາບ ໃນເດືອນກັນຍາ ປີ 2023 ເຊັ່ນກັນ.
