(ສພຊ) ທ້າຍອາທິດຜ່ານມາ ທີ່ຫໍສະພາແຫ່ງຊາດ ທ່ານ ນາງ ປານີ ຢ່າທໍ່ຕູ້ ປະທານສະພາຫ່ງຊາດ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງຄະນະສະມາຊິກສະພາຜູ້ແທນມາຄູຣານໃຫຍ່ມົງໂກນ ເຊິ່ງນຳ ຄະນະນຳໂດຍທ່ານ (ຢ໋ອງຕ໋ອງເພເຣັນແລ ບາທາຣ໌ ບີເລັກ) Yondonperenlein BAATARBLEG ປະທານກຳມາທິການນະໂຍບາຍສັງຄົມ, ສຶກສາ, ວັດທະນະທຳ ແລະ ວິທະຍາສາດ, ປະທານມິດຕະພາບ ລັດຖະສະພາມົງໂກນ-ລາວ, ສະພາຄູຣານໃຫຍ່ແຫ່ງມົງໂກນ ພ້ອມດ້ວຍຄະນະ ໃນໂອກາດທີ່ເດີນທາງມາ ຢ້ຽມຢາມ ແລະ ເຮັດວຽກຮ່ວມກັບກຳມາທິການວັດທະນະທຳ-ສັງຄົມ ສະພາແຫ່ງຊາດ ຢ່າງເປັນທາງການ ລະຫວ່າງ ວັນທີ 17-19 ມັງກອນ 2019.
ການເຂົ້າຢ້ຽມຂໍ່ານັບໃນຄັ້ງນີ້, ທ່ານປະທານສະພາແຫ່ງຊາດໄດ້ສະແດງການຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ການຢ້ຽມຢາມຂອງຄະນະຜູ້ແທນມາຄູຣານໃຫຍ່ມົງໂກນໃນຄັ້ງນີ້ ທັງເປັນການພົບປະ ສອງຝ່າຍລະຫວ່າງຄະນະຜູ້ແທນມາຄູຣານໃຫຍ່ມົງໂກນ ແລະ ກຳມາທິການວັດທະນະທຳ-ສັງຄົມ ແລະ ຄະນະ ເຊິ່ງທັງສອງຝ່າຍໄດ້ແລກປ່ຽນເຊິ່ງກັນ ແລະ ກັນ ທາງດ້ານບົດຮຽນ ແລະ ປະສົບການກ່ຽວກັບ ການປະຕິບັດພາລະບົດບາດຂອງອົງການນິຕິບັນຍັດ ໂດຍສະເພາະຂົງເຂດວັດທະນະທຳ-ສັງຄົມ; ພ້ອມດຽວ ກັນນີ້ຍັງປຶກສາຫາລື ແລະ ແລກປ່ຽນກ່ຽວກັບກົນໄກການປະສານງານ ແລະ ຮ່ວມມື ລະຫວ່າງ ຄະນະມິດຕະ ພາບລັດຖະສະພາຂອງສະພາແຫ່ງຊາດລາວ ແລະ ສະພາຄູຣານໃຫຍ່ມົງໂກນ ເຊິ່ງໄລຍະຜ່ານມາສະພາ ແຫ່ງຊາດລາວ-ຄູຣານໃຫຍ່ມົງໂກນ ໄດ້ມີການພົວພັນຮ່ວມມືນໍາກັນຢ່າງເປັນປົກກະຕິໃນເວທີສອງຝ່າຍ ແລະ ຫລາຍຝ່າຍເຊັ່ນ: ດ້ານການພົວພັນສອງຝ່າຍສອງສະພາໄດ້ມີການເຊັນບັດບັນທຶກຄວາມເຂົ້າໃຈ MOU ຮ່ວມກັນ ສະບັບປີ 1998 ແລະ ໃນປີ 2002, 2010 ແລະ 2014 ສອງຫ້ອງວ່າການໄດ້ສືບຕໍ່ເຊັນ MOU ເລື່ອຍໆມາ. ນອກນັ້ນ, ຍັງໄດ້ມີການຢ້ຽມຢາມສັນທະວະໄມຕີຢ່າງເປັນປົກກະຕິໃນໄລຍະຜ່ານມາ; ດ້ານການ ພົວພັນຫລາຍຝ່າຍ, ສອງສະພາໄດ້ມີການຮ່ວມມື ແລະ ສະໜັບສະໜູນຊ່ວຍເຫລືອ ເຊິ່ງກັນ ແລະ ກັນ ໃນເວ ທີລັດຖະສະພາພາກພື້ນ ແລະ ສາກົນ ເຊັ່ນ ກອງປະຊຸມ APPF-17 ໃນປີີ 2009, ASEP 7 ປີ 2012 ທີ່ ສປປ ລາວ ເປັນເຈົ້າພາບ, ກອງປະຊຸມ APPF-19 ໃນປີ 2011, ກອງປະຊຸມ ASEP-9 ປີ 2016 ທີ່ປະເທດມົງ ໂກນເປັນເຈົ້າພາບ.
ທ່ານປະທານສະພາແຫ່ງຊາດ ຫວັງຢ່າງຍິ່ງວ່າສອງລັດຖະສະພາຈະສືບຕໍ່ກົນ ໄກແລກປ່ຽນຄະນະຜູ້ ແທນຂັ້ນຕ່າງໆຮ່ວມກັນຢ່າງເປັນປົກກະຕິ, ນັບທັງສະພາຂັ້ນທ້ອງຖິ່ນຂອງບັນດາແຂວງໂດຍສະເພາະ ບັນດາແຂວງແຮກສ່ຽວ; ສືບຕໍ່ກະຕຸກຊຸກຍູ້ໃຫ້ມີການແລກປ່ຽນວິຊາສະເພາະເຊັ່ນ: ການສ້າງນິຕິກຳ, ການປົກ ຄອງລັດດ້ວຍກົດໝາຍ ການຕິດຕາມກວດກາໃຫ້ແກ່ສະມາຊິກສະພາແຫ່ງຊາດ ແລະ ພະນັກງານວິຊາການ; ສອງອົງການນິຕິບັນຍັດຂອງສອງປະເທດສືບຕໍ່ຮ່ວມມືປະສານສົມທົບກັນໃນການເຄື່ອນໄຫວໃນເວທີພາກ ພື້ນ ແລະ ສາກົນ ເພື່ອພາລະກິດສັນຕິພາບ, ມິດຕະພາບ ແລະ ການຮ່ວມມືເພື່ອ ພັດທະນາ.
ໃນມື້ດຽວກັນທາງຄະຜູ້ແທນຄູຣານໃຫຍ່ມົງໂກນ ຍັງໄດ້ພົບປະສອງຝ່າຍ ລະຫວ່າງ ທ່ານ ສົມພູ ດວງສະຫວັນ ປະທານກຳມາທິການວັດທະນະທຳ-ສັງຄົມ ສະພາແຫ່ງຊາດ ພ້ອມດ້ວຍຄະນະ ເຊິ່ງທັງ ສອງຝ່າຍໄດ້ແຈ້ງສະພາບການເຄື່ອນໄຫວວຽກງານໂດຍຫຍໍ້ໃຫ້ກັນຊາບ ໂດຍສະເພາະສອງຄະນະມິດຕະ ພາບລັດຖະສະພາ ໃນການແລກປ່ຽນບົດຮຽນກ່ຽວກັບການຈັດຕັ້ງປະຕິບັດພາລະບົດບາດນິຕິບັນຍັດ-ແລກ
ປ່ຽນຂໍ້ມູນຂ່າວສານ ພ້ອມນັ້ນ, ທັງສອງຝ່າຍຍັງໄດ້ສະເຫນີການແລກປ່ຽນຢ້ຽມຢາມເພື່ອສືບຕໍ່ພົວພັນຮ່ວມ ມືລະຫວ່າງສະພາແຫ່ງຊາດລາວ ແລະ ສະພາຄູຣານໃຫຍ່ມົງໂກນ ກໍຄືສອງກຳມາທິການເຂົ້າສູ່ລວງເລິກ ພ້ອມທັງໃຫ້ມີການຊຸກຍູ້ກັນທາງດ້ານເສດຖະກິດເຊັ່ນ: ການນຳເຂົ້າຊີ້ນແກະ, ຊີ້ນງົວ ຈາກປະທານມົງໂກນ
ເຂົ້າມາໃນລາວ ຫລື ການສົ່ງອອກເຂົ້າຂອງລາວໄປຂາຍປະເທດມົງໂກນ ແລະ ສິນຄ້າອື່ນໆທີ່ເຫັນວ່າສອງ ປະເທດສາມາດນຳມາຊື້ຂາຍແລກປ່ຽນກັນໄດ້.
ນອກນັ້ນ, ທາງຄະນະຜູ້ແທນຍັງໄດ້ຢ້ຽມຢາມເຂດພື້ນຖານວັດທະນະທຳ, ການພັດທະນາເສດຖະ ຖິດ-ສັງຄົມ ຢູ່ ນະຄອນຫລວງວຽງຈັນ ແລະ ແຂວງວຽງຈັນອີກດ້ວຍ.