ຄະນະຜູ້ແທນຂັ້ນສູງ ໄດ້ເດີນທາງມາເຖີງ ສະຫນາມບິນ ຂອງເຂດປົກຄອງຕົນເອງມົງໂກໃນ ກໍ່ໄດ້ຖືກຕ້ອນຮັບຢ່າງອົບອຸ່ນ ແລະ ເປັນກັນເອງແບບສະຫນິດສະຫນຸ່ມຖານອ້າຍນ້ອງ ຈາກການນໍາຂັ້ນສູງພັກ, ອົງການປົກຄອງລັດ ແລະ ສະພາປະຊາຊົນເຂດປົກຄອງຕົນເອງມົງໂກໃນ ຫຼັງຈາກນັ້ນ, ຄະນະຜູ້ແທນຂັ້ນສູງສະພາແຫ່ງຊາດລາວ ໄດ້ພົບປະເຮັດວຽກ ກັບ ສະຫາຍ ນາງ ອ້າຍ ລີ ຫົວ, ຮອງປະທານສະພາປະຊາຊົນເຂດປົກຄອງຕົນເອງມົງໂກໃນ ແລະ ຄະນະ ຢ່າງເປັນທາງການ ທີ່ໂຮງແຮມຊິງເສິງລຽງຫົວ.

ໃນໂອກາດພົບປະເຮັດວຽກນຳກັນນີ້, ສະຫາຍ ໄຊສົມພອນ ພົມວິຫານ, ກຳມະການກົມການເມືອງສູນກາງພັກ, ປະທານສະພາແຫ່ງຊາດລາວ ໄດ້ສະແດງຄວາມພາກພູມໃຈເປັນຢ່າງຍິ່ງ ທີ່ໄດ້ມີໂອກາດມາຢ້ຽມຢາມ ເຂດດັ່ງກ່າວໃນຄັ້ງນີ້ ຊຶ່ງຈະໄດ້ທັດສະນະສຶກສາ, ແລກປ່ຽນ ແລະ ຖອດຖອນບົດຮຽນ ກ່ຽວກັບການພັດທະນາເສດຖະກິດ ແບບທັນສະໄໝ ດ້ວຍການນຳໃຊ້ທ່າແຮງພື້ນຖານຂອງຕົນ, ການຜະລິດກະສິກໍາ ແລະລ້ຽງສັດ ເພື່ອສະຫນອງໃຫ້ແກ່ພາຍໃນ ແລະ ການສົ່ງອອກໄປຕ່າງປະເທດ, ການພັດທະນາຊົນນະບົດ ທີ່ຕິດພັນກັບການແກ້ໄຂຄວາມທຸກຍາກ ແລະ ອື່ນໆ ໂດຍການຈັດຕັ້ງຜັນຂະຫຍາຍ ບັນດາແນວທາງນະໂຍບາຍ, ຍຸດທະສາດຕ່າງໆ ທີ່ກຳນົດໄວ້ ໃນມະຕິກອງປະຊຸມໃຫຍ່ ຄັ້ງທີ XX ຂອງພັກຄອມມູນິດຈີນ, ການຊີ້ນຳນຳ ຂອງສະຫາຍເລຂາທິການໃຫຍ່ພັກກອມມຸຍນິດຈີນ ສີ ຈິງ ຜິງ ກ່ຽວກັບການພັດທະນາເຂດທ້ອງຖິ່ນ. ພ້ອມນີ້, ສະຫາຍປະທານສະພາແຫ່ງຊາດລາວ ໄດ້ແຈ້ງຜົນການພົບປະສອງຝ່າຍກັບ ປະທານສະພາຜູ້ແທນປະຊາຊົນທົ່ວປະເທດຈີນ ແລະ ຜົນການລົງນາມໃນຂໍ້ຕົກລົງການຮ່ວມມື ລະຫວ່າງ ສອງອົງການນິຕິຍັດ.

ຈາກນັ້ນ, ສະຫາຍ ນາງ ອ້າຍ ລີ ຫົວ, ຮອງປະທານສະພາປະຊາຊົນເຂດປົກຄອງຕົນເອງມົງໂກໃນ ໄດ້ແຈ້ງໃຫ້ຊາບເຖີງທີ່ຕັ້ງ, ປະຊາກອນ, ເນື້ອທີ່, ສະພາບການພັດທະນາເສດຖະກິດ-ສັງຄົມ ແລະ ທ່າແຮງຂອງເຂດດັ່ງກ່າວ. ເຂດປົກຄອງຕົນເອງມົງໂກໄນ ໄດ້ສ້າງໃນປີ 1947 ຊຶ່ງເປັນເຂດປົກຄອງຕົນເອງ ເຂດທໍາອິດ ຂອງ ສປ ຈີນ, ປະກອບມີ 14 ນະຄອນ ແລະ 103 ຕົວເມືອງ. ມີເນື້ອທີ່ 1,18 ລ້ານຕາລາງກິໂລເມັດ, ມີພົນລະເມືອງ 24 ລ້ານຄົນ, ມີຊາຍແດນຕິດຈອດກັບ ມົງໂກລີ ແລະ ລັດເຊຍ. ມີດ່ານສາກົນທັງໝົດ 24 ດ່ານ. ນັບຕັ້ງແຕ່ກອງປະຊຸມໃຫຍ່ ຄັ້ງທີ XVIII ຂອງພັກກອມມູນິດຈີນ, ເຂດມົງໂກໃນ ໄດ້ສຸມໃສ່ຈັດຕັ້ງຜັນຂະຫຍາຍແນວຄິດ ຂອງປະທານສີຈີ້ນຜິງ ວ່າດ້ວຍການສ້າງສັງຄົມນິຍົມ ທີ່ມີສີສັນຂອງປະເທດຈີນ ພ້ອມນີ້ກໍ່ໄດ້ຕັ້ງໜ້າປະຕິບັດບັນດາເນື້ອໃນຕ່າງໆ ຕາມມະຕິກອງປະຊຸມໃຫຍ່ ຄັ້ງທີ XX ໂດຍສະເພາະ ປະຕິບັດໜ້າວຽກ 5 ປະການສໍາຄັນ ທີ່ໄດ້ຮັບມອບໝາຍ ຈາກປະທານສີຈິງຜິງ ເພື່ອສ້າງເຂດປົກຄອງຕົນເອງ ເປັນຕົວແບບ ຄື: ສ້າງເຂດປົກຄອງເປັນຮົ້ວກັ້ນຄວາມໝັ້ນຄົງແຫ່ງຊາດ, ສ້າງເປັນສູນຜະລິດພະລັງງານທີ່ສໍາຄັນຂອງປະເທດ, ສ້າງເປັນສູນປ້ອງກັນ-ປົກປັກຮັກສາສິ່ງແວດລ້ອມ ແລະລະບົບນິເວດວິທະຍາ, ສ້າງເປັນສູນສະໜອງສັບພະຍາກອນອັນເປັນຍຸດທະສາດ, ສ້າງເປັນສູນພັດທະນາກະສິກໍາ ແລະ ສ້າງເປັນປະຕູໄຂສູ່ໂລກພາຍນອກ. ພ້ອມນີ້, ກໍ່ປະຕິບັດ 2 ກໍານົດ ແລະ 2 ປົກປ້ອງ ຢ່າງໜັກແໜ້ນ ເພື່ອຫັນເປັນທັນສະໃໝແບບຈີນ. ປີ 2022, ການຂຸດຄົ້ນຖ່ານຫີນ 1,2 ຕື້ ໂຕນ ຢູ່ອັນດັບ 2 ຂອງປະເທດ, ຜະລິດໄຟຟ້າ 640 ຕື້ກິໂລວັດຊົ່ວໂມງ ເປັນອັນດັບ 1 ຂອງປະເທດ, ການຜະລິດສະບຽງອາຫານ ປີ 2023 ຜ່ານມາ ໄດ້ 39 ຕື້ກິໂລ ເປັນອັນດັບ 6 ຂອງປະເທດ, ຜະລິດຕະພັນປະເພດນົມ ແລະ ຊີ້ນ ແມ່ນຢູ່ອັນດັບໜຶ່ງ ຂອງປະເທດ. ຂະແໜງການອຸດສາຫະກໍາ ກໍ່ມີວິສາຫະກິດ ທີ່ມີເຕັກນິກວິທະຍາສາດລະດັບສູງ 1500 ກວ່າແຫ່ງ, ມີການຊຸກຍູ້ສົ່ງເສີມການພັດທະນາແບບສີຂຽວ, ມີໂຄງການຟຶ້ນຟູ ແລະ ປົກປັກຮັກສາລະບົບນິເວດ, ໃນທ້າຍປີ 2022 ມີໂຮງງານສີຂຽວ 161 ແຫ່ງ, ມີນິຄົມອຸດສາຫະກໍາສີຂຽວ 19 ແຫ່ງ, ມີຜະລິດຕະພັນສີຂຽວ 39 ອັນ. ພື້ນຖານໂຄງລ່າງການຄົມມະນາຄົມທີ່ຮັບປະກັນ ທັງເສັ້ນທາງຫຼວງ, ເສັ້ນທາງລົດໄຟ ແລະມີສະໜາມບິນ 48 ແຫ່ງ. ພ້ອມນີ້, ເຂດປົກຄອງຕົນເອງ ໄດ້ມີການຊຸກຍູ້ສົ່ງເສີມການແກ້ໄຂຄວາມທຸກຍາກ. ໃນນັ້ນ, ມີປະຊາການທຸກຍາກ 8 ແສນກວ່າຄົນ ຊື່ງໄດ້ຫຼຸດພົ້ນຸວາມທຸກຍາກແລ້ວ. ອັດຕາເຂົ້າຮຽນການສຶກສາພາກບັງຂັບ ໄດ້ຮັບການຍົກສູງ, ຈໍານວນສະເລ່ຍຕຽງນອນ ແລະ ເພດໝໍ ຕໍ່ໜຶ່ງພັນຄົນ ແມ່ນກາຍລະດັບສະເລ່ຍ ໃນທົ່ວປະເທດ. ດ້ານວັດທະນະທໍາ, ກິລາ ແລະສາທາລະນະສຸກ ແລະ ລະບົບສະຫວັດດິການສັງຄົມ ຂະຫຍາຍຕົວເປັນກ້າວໆ ທີ່ກວມລວມທັງຕົວເມືອງ ແລະ ຊົນນະບົດໂດຍພື້ນຖານ ແລະ ບັນລຸເປົ້າໝາຍທຸກໆຄອບຄົວ ບໍ່ມີຄົນວ່າງງານ, ມີການຊຸກຍູ້ສົ່ງເສີມຄວາມສາມັກຄີບັນດາເຜົ່າ ຕາມທັດສະນະອັນໃໝ່ 2 ຖານທີ່ໝັ້ນ 2 ຮົ້ວກັນ ແລະ ໜ້າວຽກສໍາຄັນ 5 ຫຼັກການ.

ສະຫາຍ ນາງ ອ້າຍ ລີ ຫົວ, ຮອງປະທານສະພາປະຊາຊົນເຂດປົກຄອງຕົນເອງມົງໂກໃນ ສະ ເໜີ ໃນຕໍ່ໜ້າ ເຂດປົກຄອງຕົນເອງມົງໂກໃນ ແລະ ສປປ ລາວ ຄວນເພີ່ມທະວີການໄປມາຫາສູ່ກັນ ບົນພື້ນຖານຕ່າງຝ່າຍຕ່າງໄດ້ຮັບຜົນປະໂຫຍດ. ໃນນັ້ນ, ສະເໜີສ້າງກົນໄກປະສານງານຮ່ວມມືແລກປ່ຽນ ລະຫວ່າງສອງຝ່າຍ, ສະພາຜູ້ແທນປະຊາຊົນເຂດປົກຄອງຕົນເອງມົງໂກໃນ ມີທ່າແຮງໃນການພົວພັນຮ່ວມມືກັບຕ່າງປະເທດ ແລະ ພົວພັນກັບບັນດາອົງການນິຕິບັນຍັດ ໃນຂັ້ນທ້ອງຖິ່ນ, ສະເໜີຈັດຝຶກອົບຮົມບັນດາຫົວຂໍ້ສະເພາະ ເພື່ອເພີ່ມທະວີຄວາມໃວ້ເນື້ອເຊື່ອໃຈທາງດ້ານການເມືອງ, ລົງເລິກຖອດຖອນບົດຮຽນນໍາກັນ ໂດຍສະເພາະ ການຕິດຕາມກວດກາ, ອໍານວຍໃຫ້ແກ່ການຮ່ວມມືທາງດ້ານເສດຖະກິດ-ການຄ້າ ສອງຝ່າຍ. ປະຈຸບັນ, ສະຖານີລົດໄຟໂລຊິສຕິກສາກົນ ຊີຊູມູ ເຂດປົກຄອງຕົນເອງມົງໂກໃນ ທີ່ເຊື່ອມຈອດເສັ້ນທາງລົດໄຟລາວ-ຈີນ ໄດ້ເປີດບໍລິການລະຫວ່າງປະເທດ. ບໍລິສັດຄຸດຄົ້ນບໍ່ຄໍາຊື່ຟົງ ໄດ້ໄປລົງທຶນຢູ່ລາວ ໂດຍສ້າງຕັ້ງບໍລິສັດຂຸດຄົ້ນບໍ່ແຮ່ວຽງຈັນ ໃນທ້າຍປີ 2022 ໄດ້ລົງທຶນ 426 ລ້ານໂດລາສະຫະລັດ ແລະ ອື່ນໆ.

ສະຫາຍຮອງປະທານສະພາປະຊາຊົນເຂດປົກຄອງຕົນເອງ ຍັງເຫັນວ່າ ສປປ ລາວ ເປັນປະເທດມີຊັບພະຍາກອນອຸດົມສົມບູນ ພ້ອມດຽວກັນນີ້ ມົງໂກນໃນ ກໍ່ມີຊັບພະຍາກອນບໍ່ແຮຫຼາຍເຊັ່ນດຽວກັນ ທອງ, ກົ່ວ, ສັງກະສີ, ຄໍາ ແລະ ແຮ່ຫາຍາກ ແລະ ຫວັງວ່າ ໃນອະນາຄົດ ຈະມີການຮ່ວມມືທີ່ດີ ໂດຍສາມາດດຶງດູດເອົານັກທຸລະກິດທັງສອງປະເທດ, ແລກປ່ຽນວັດທະນະທໍາ, ຊຸກຍູ້ຊ່ວຍເຫຼືອການທ່ອງທ່ຽວ ແລະອື່ນໆ ແລະ ຫວັງວ່າ ທ່ານປະທານສະພາແຫ່ງຊາດລາວ ແລະ ຄະນະ ຈະໄດ້ມາຢ້ຽມຢາມ ເຂດປົກຄອງຕົນເອງແຫ່ງນີ້ ຕື່ມອີກ.

ຕໍ່ກັບຂໍ້ສະເຫນີຂອງສະຫາຍ ອ້າຍ ລີ ຫົວ, ສະຫາຍປະທານສະພາແຫ່ງຊາດລາວ ໄດ້ເຫັນດີໃຫ້ການສະໜັບສະໜູນ ແລະ ຈະນຳເອົາໄປພິຈະລະນາ ນຳພາກສ່ວນກ່ຽວຂ້ອງ ຂອງສປປ ລາວ. ພ້ອມນີ້, ສະເຫນີໃຫ້ເຂດປົກຄອງມົງໂກໄນ ສຶບຕໍ່ຮ່ວມມືກັບ ສປປ ລາວ ແລະ ເຊື້ອເຊີນ ໄປຢ້ຽມຢາມ ສປປ ລາວ ຢ່າງເປັນທາງການ ໃນວັນເວລາ ທີ່ສະດວກ. ໃນນັ້ນ, ສປປ ລາວ ມີທ່າແຮງດ້ານການທ່ອງທ່ຽວ ແລະ ຊັບພະຍາກອນທໍາມະຊາດ ຈິ່ງສະເໜີໃຫ້ຊຸກຍູ້ນັກທຸລະກິດ ຂອງເຂດປົກຄອງຕົນເອງ ກໍ່ຄື ສປຈີນ ໄປລົງທຶນ ຢູ່ສປປ ລາວ ໃຫ້ຫລາຍຂື້ນກວ່າເກົ່າ. ນອກນີ້ກໍ່, ສະຫາຍປະທານສະພາ ຍັງແຈ້ງສະພາບການເຄື່ອນໄຫວ ຂອງສະພາແຫ່ງຊາດ, ສະພາປະຊາຊົນຂັ້ນແຂວງ ແລະ ຜົນຂອງກອງປະຊຸມຄົບຄະນະກາງສະໄໝ ຂອງຄະນະບໍລິຫານງານສູນກາງພັກ ສະໄໝ XI ແລະ ອື່ນໆ.

ນອກຈາກນີ້, ຄະນະຜູ້ແທນຂັ້ນສູງສະພາແຫ່ງຊາດລາວ ຍັງໄດ້ໄປຢ້ຽມຢາມ ເຂດອຸດສາຫະກໍາ ທັນສະໄຫມ Zhonghuan ຊຶ່ງເປັນເຂດຫນື່ງ ອັນຫນື່ງ ຂອງ ສປ ຈີນ ກໍ່ຄືລະດັບໜື່ງ ຂອງໂລກ ທີ່ເປັນລະບົບນະວະກຳໃຫມ່ ໃນການຜະລິດ ທີ່ທັນສະໄຫມ ໃນຍຸກສະໄຫມ ແຫ່ງໂລກດີຈີຕອນ, ການຜລິດສີລິໂຄນ, ເຄື່ອງເອເລັກໂຕນິດຂະຫນາດນ້ອຍ(ຊິບ), ແຜນໂລຫະໂຊລາເເຊວ ແລະ ຊີ້ນສ່ວນປະກອບໂຊລາເເຊວຄົບຊຸດ ເພື່ອສະຫນອງເຂົ້າໃນລະບົບຕ້ອງໂຊການຜະລິດ. ຈາກນັ້ນ, ກໍ່ໄດ້ຢ້ຽມຢາມກຸ່ມບໍລິສັດຜະລິດນົມອີລີ ຊື່ງເປັນບໍລິສັດ ທີ່ຜະລິດຕະພັນ ຈາກນ້ຳນົມ ແບບຄົບວົງຈອນ (ແບບເປັນໂຕ່ງໂຊການຜະລິດ) ຊື່ງເລີ້ມຕົ້ນຈາກການລ້ຽງງົວໃຫ້ນ້ຳນົມ, ລະບົບການປຸງແຕ່ງ ແລະ ສົ່ງອອກ ຜະລິດຕະພັນນົມ ເພື່ອສະຫນອງພາຍໃນ ແລະສົ່ງອອກຕ່າງປະເທດ; ໄດ້ໄປຢ້ຽມຢາມບ້ານ ໜາວເປົາ ຊຶ່ງເປັນບ້ານຕົວແບບໃນການແກ້ໄຂຄວາມທຸກຍາກແຫ່ງຫນື່ງ ຂອງ ສປ ຈີນ ແລະຢ້ຽມຊົມຫໍພິພິດຕະພັນເຂດປົກຄອງຕົນເອງມົງໂກໄນ ອີກດ້ວຍ.