(ສພຊ) ໃນລະຫວ່າງວັນທີ 11-15 ມີນາ 2023 ຄະນະຜູ້ແທນສະພາແຫ່ງຊາດ ນຳໂດຍທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ແຫ່ງ ສປປລາວ ໄດ້ເຂົ້າຮ່ວມກອງປະຊຸມໃຫຍ່ສະຫະພັນລັດຖະສະພາສາກົນ (IPU) ຄັ້ງທີ 146, ທີ່ ມານາມາ, ປະເທດບາເຣນ ໂດຍການເປັນປະທານຂອງທ່ານ ອາເມດ ບິນ ຊາລມານ ອານ ມູຊາລໍາ ປະທານລັດຖະສະພາຣາຊະອານາຈັກບາເຣນ. ກອງປະຊຸມດັ່ງກ່າວ, ມີຄະນະຜູ້ແທນຫຼາຍກວ່າ 2.000 ທ່ານ ທີ່ມາຈາກ 140 ປະເທດ ທີ່ເປັນສະມາຊິກ IPU, ອົງການສະຫະປະຊາຊາດ ແລະ ຕົວແທນຈາກອົງການລັດຖະສະພາປະຈຳພາກພື້ນຕ່າງໆທົ່ວໂລກ ເຂົ້າຮ່ວມ.
ກອງປະຊຸມຄັ້ງນີ້ ໄດ້ດຳເນີນໄປພາຍໃຕ້ຫົວຂໍ້: “ສົ່ງເສີມການຢູ່ຮ່ວມກັນຢ່າງສັນຕິ ແລະ ສັງຄົມທີ່ກວມລວມ: ຕ້ານທຸກການກະທຳທີ່ຂາດຄວາມອົດທົນອົດກັ້ນ ”. ໃນກອງປະຊຸມ ບັນດາຜູ້ແທນຈາກປະເທດຕ່າງໆ ໄດ້ປະກອບຄໍາເຫັນຢ່າງຫຼາກຫຼາຍ ໂດຍຍົກໃຫ້ເຫັນບົດຮຽນປະເທດຂອງຕົນ ຕາມຫົວຂໍ້ຂອງກອງປະຊຸມ ເປັນຕົ້ນແມ່ນປຶກສາຫາລືກ່ຽວກັບຄວາມຈຳເປັນໃນການສົ່ງເສີມສັນຕິພາບ ແລະ ການຮ່ວມມື, ໃຫ້ມີຄວາມອົດທົນອົດກັ້ນ, ແກ້ໄຂບັນຫາໂດຍສັນຕິວິທີ; ປຶກສາຫາລືກ່ຽວກັບບັນຫາຄວາມໝັ້ນຄົງ, ເສດຖະກິດສັງຄົມ, ສິດທິມະນຸດ, ປະຊາທິປະໄຕ ແລະ ພິຈາລະນາບັນຫາຮີບດ່ວນ ທີ່ເປັນຄວາມກັງວົນຮ່ວມກັນໃນທົ່ວໂລກ ລວມທັງບັນຫາການປ່ຽນແປງດິນຟ້າອາກາດ ກໍຄື ການປ້ອງກັນການໂຈມຕີທາງໄຊເບີ ແລະ ອາດສະຍາກຳທາງຄອມພິວເຕີ, ການບັນລຸຄວາມດຸນດ່ຽງຂອງທາດກາກບອນລົບຈາກປ່າໄມ້ ແລະ ອື່ນໆ.
ໃນກອງປະຊຸມໃຫຍ່ໄອພີຢູຄັ້ງທີ 146 ນີ້, ທ່ານ ປອ. ນາງ ສູນທອນ ໄຊຍະຈັກ ຫົວໜ້າຄະນະຜູ້ແທນລາວ ໄດ້ຂຶ້ນກ່າວປາໄສ ພາຍໃຕ້ຫົວຂໍ້: “ສົ່ງເສີມການຢູ່ຮ່ວມກັນຢ່າງສັນຕິ ແລະ ສັງຄົມທີ່ກວມລວມ: ຕ້ານທຸກການກະທຳທີ່ຂາດຄວາມອົດທົນອົດກັ້ນ ” ເຊິ່ງທ່ານໄດ້ຍົກໃຫ້ເຫັນເຖິງສິ່ງທ້າທາຍຫຼາຍຢ່າງທີ່ສົ່ງຜົນກະທົບອັນຮ້າຍແຮງຕໍ່ການພັດທະນາເສດຖະກິດ-ສັງຄົມ, ການປົກປັກຮັກສາສັນຕິພາບ ແລະ ຄວາມໝັ້ນຄົງໃນພາກພື້ນ ແລະ ໃນທົ່ວໂລກ, ພ້ອມທັງຕີລາຄາສູງຕໍ່ບົດບາດຂອງ IPU ກໍຄື ລັດຖະສະພາສະມາຊິກ ໃນການສືບຕໍ່ສົ່ງເສີມການພົວພັນຮ່ວມມືເພື່ອການພັດທະນາ, ເພີ່ມທະວີການທູດລັດຖະສະພາ ເພື່ອສ້າງຄວາມເຊື່ອໝັ້ນ ແລະ ຄວາມເຂົ້າໃຈເຊິ່ງກັນ ແລະ ກັນ, ສົ່ງເສີມການຮ່ວມມືແບບຫຼາຍຝ່າຍ ທີ່ຕ່າງຝ່າຍຕ່າງໄດ້ຮັບຜົນປະໂຫຍດ, ຊຸກຍູ້ການແກ້ໄຂບັນຫາຕ່າງໆຢ່າງສັນຕິວິທີບົນພື້ນຖານການຍຶດໝັ້ນຫຼັກການ ແລະ ລະບຽບການສາກົນ. ພ້ອມດຽວກັນນັ້ນ, ທ່ານ ຍັງໄດ້ຍົກໃຫ້ເຫັນເຖິງຄວາມພະຍາຍາມຂອງ ສປປລາວ ກໍຄື ສະພາແຫ່ງຊາດລາວ ໃນການດຳເນີນນະໂຍບາຍການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື ຢ່າງສະເໝີຕົ້ນສະເໝີປາຍ, ເພີ່ມທະວີການຄຸ້ມຄອງລັດ-ຄຸ້ມຄອງສັງຄົມດ້ວຍລະບຽບກົດໝາຍ ໂດຍໄດ້ຮັບຮອງເອົາກົດໝາຍຫຼາຍສະບັບທີ່ສອດຄ່ອງກັບຫຼັກການສາກົນ ແລະ ຄວາມເປັນຈິງຂອງປະເທດ, ພ້ອມທັງໄດ້ພິຈາລະນາໃຫ້ສັດຕະຍາບັນແກ່ສົນທິສັນຍາສາກົນຫຼາຍສະບັບ ທີ່ ສປປລາວ ເປັນພາຄີ ເຊິ່ງເປັນການປະກອບສ່ວນອັນສຳຄັນເຂົ້າໃນການເສີມສ້າງສັນຕິພາບ, ຄວາມໝັ້ນຄົງ, ການພັດທະນາ ແລະ ຄວາມເປັນຢູ່ທີ່ດີຂອງປະຊາຊົນໃນພາກພື້ນ ແລະ ໃນໂລກ. ໃນຕອນທ້າຍ, ທ່ານຮອງປະທານສະພາແຫ່ງຊາດລາວ ຍັງໄດ້ຮຽກຮ້ອງໃຫ້ສະມາຊິກສະຫະພັນລັດຖະສະພາສາກົນ (IPU) ເພີ່ມທະວີການຊຸກຍູ້ສົ່ງເສີມການສ້າງຄວາມສາມັກຄີປອງດອງ, ຍົກສູງການຮ່ວມມືແບບພະຫຸພາຄີ, ສົ່ງເສີມການແກ້ໄຂຂໍ້ຂັດແຍ່ງຕ່າງໆຢ່າງສັນຕິວິທີ ໂດຍຜ່ານການເຈລະຈາ, ຍຶດໝັ້ນຫຼັກການ ແລະ ລະບຽບການສາກົນ ເພື່ອສົ່ງເສີມ ສັນຕິພາບ, ສະຖຽນລະພາບ, ການຢູ່ຮ່ວມກັນຢ່າງສັນຕິ ແລະ ສະເໝີພາບກັນໃນສັງຄົມ ແນໃສ່ນຳເອົາຄວາມຈະເລີນຮຸ່ງເຮືອງວັດທະນາຖາວອນມາສູ່ປະຊາຊາດໃນທົ່ວໂລກ.
ນອກຈາກນັ້ນ, ຄະນະຜູ້ແທນສະພາແຫ່ງຊາດລາວ ຍັງໄດ້ເຂົ້າຮ່ວມ ແລະ ປະກອບຄຳເຫັນ ໃນກອງປະຊຸມສະພາບໍລິຫານງານ IPU, ກອງປະຊຸມເວທີປຶກສາຫາລືວຽກງານສະມາຊິກລັດຖະສະພາເພດຍິງ, ກອງປະຊຸມເຄືອຂ່າຍລັດຖະສະພາ ຂອງບັນດາປະເທດສະມາຊິກຂະບວນການບໍ່ຮ່ວມກຸ່ມ ຄັ້ງທີ 2 ແລະ ພົບປະສອງຝ່າຍກັບຄະນະຜູ້ແທນຈາກລັດຖະສະພາປະເທດເພື່ອນມິດ, ອົງການລັດຖະສະພາພາກພື້ນ ແລະ ສາກົນ ຕ່າງໆ ເຊັ່ນ: ສສ.ຫວຽດນາມ, ມົງໂກລີ, ສະຫະພັນລັດເຊຍ, ເບລາຣຸສ, ຈໍເຈຍ, ອິນເດຍ, ອົດສຕຣາລີ, ມາດາກາສກາ, ອັງໂກລາ, ເລຂາທິການໃຫຍ່ IPU ແລະ ຜູ້ແທນປະເທດອື່ນໆອີກຈໍານວນໜຶ່ງ ເພື່ອປຶກສາຫາລືກ່ຽວກັບການພົວພັນຮ່ວມມືສອງຝ່າຍ ແລະ ຫຼາຍຝ່າຍໃນຂອບອົງການນິຕິບັນຍັດ ໃນຕໍ່ໜ້າ.
ກອງປະຊຸມຄັ້ງນີ້ ໄດ້ດໍາເນີນໄປໃນບັນຍາກາດ ທີ່ທຸກຝ່າຍເຫັນດີເປັນເອກະພາບ, ສືບຕໍ່ຮ່ວມມືໃນພາກພື້ນ ແລະ ສາກົນ ໂດຍໄດ້ມີການຮັບຮອງເອົາມະຕິໃນຂົງເຂດວຽກງານຕ່າງໆຮ່ວມກັນ ຈຳນວນຫຼາຍສະບັບ ໂດຍສະເພາະມະຕິວ່າດ້ວຍການປູກຈິດສຳນຶກ ແລະ ຮຽກຮ້ອງການຊ່ວຍເຫຼືອທາງດ້ານມະນຸດສະທຳ (ກຸ່ມແມ່ຍິງ ແລະ ເດັກນ້ອຍ) ທີ່ໄດ້ຮັບຜົນກະທົບຈາກ ວິກິດການທີ່ເກີດຂຶ້ນຢູ່ໃນປະເທດອັບການິສຖານ, ຊີລ, ເຢເມນ,ປະເທດໃນອັບຟຣິກກາ, ອາເມຣິກາລາຕິນ, ຢູເຄຣນ ແລະ ບັນດາປະເທດໃນພາກພື້ນຕ່າງໆຂອງໂລກ ເຊິ່ງຄະນະຜູ້ແທນຂອງສະພາແຫ່ງຊາດລາວ ກໍໄດ້ໃຊ້ສິດຢ່າງເຕັມສ່ວນໃນການປະກອບຄຳເຫັນ ແລະ ລົງຄະແນນສຽງໃນວາລະຕ່າງໆ. ກອງປະຊຸມໃຫຍ່ IPU ຄັ້ງຕໍ່ໄປ ຄັ້ງທີ 147 ຈະໄດ້ຈັດຂຶ້ນໃນເດືອນຕຸລາ 2023, ທີ່ ປະເທດອັງໂກລາ.
