(ສພຊ) – ວັນທີ 21-22 ມັງກອນ 2025 ທ່ານ ສົມມາດ ພົລເສນາ ຮອງປະທານສະພາແຫ່ງຊາດ (ສພຊ) ແຫ່ງ ສປປລາວ ພ້ອມດ້ວຍຄະນະ ໄດ້ສຳເລັດການເຂົ້າຮ່ວມກອງປະຊຸມລັດຖະສະພາ ກ່ຽວກັບການຮ່ວມມືຂອງບັນດາປະເທດທີ່ໃຊ້ພາສາຝຣັ່ງ ໃນ 3 ຫົວຂໍ້ສໍາຄັນຄື: ກະສິກຳແບບຍືນຍົງ, ຄວາມໝັ້ນຄົງທາງດ້ານສະບຽງອາຫານ ແລະ ການປ່ຽນແປງດິນຟ້າອາກາດ ທີ່ນະຄອນເກິນເທີ, ສສ.ຫວຽດນາມ ເຊິ່ງແມ່ນຂໍ້ລິເລີ່ມຂອງສະພາແຫ່ງຊາດຫວຽດນາມ ໃນໂອກາດເປັນເຈົ້າພາບຈັດກອງ​ປະ​ຊຸມດ​ັ່ງກ່າວ ແລະ ກອງປະຊຸມຄະນະບໍລິຫານງານສະມັດຊາລັດຖະສະພາບັນດາປະເທດທີ່ໃຊ້ພາສາຝຣັ່ງ (APF); ມີຄະນະຜູ້ແທນຈາກປະເທດທີ່ໃຊ້ພາສາຝຣັ່ງ 17 ປະເທດ ພ້ອມດ້ວຍຜູ້ຕາງໜ້າຈາກອົງການອາຫານ ແລະ ການກະເສດຂອງສະຫະປະຊາຊາດ (FAO), ອົງການຝຣັ່ງໂກໂຟນີສາກົນ (OIF) ແລະ ເລຂາທິການໃຫຍ່ສະມັດຊາລັດຖະສະພາບັນດາປະເທດທີ່ໃຊ້ພາສາຝຣັ່ງ, ບັນດາການນໍາຂັ້ນສູງ ແລະ ກໍາມາທິການທີ່ກ່ຽວ ຂ້ອງຂອງສະພາແຫ່ງຊາດຫວຽດນາມ, ການນໍາພັກ-ລັດ ແລະ ພະແນກການຂອງນະຄອນເກິນເທີ ເຂົ້າຮ່ວມ.

ກອງປະຊຸມໄດ້ຮັບຟັງຄໍາປາໄສເປີດຂອງທ່ານ ເຈິ່ນ ແທ່ງ ເໝິນ ປະທານສະພາແຫ່ງຊາດຫວຽດນາມ ແລະ ຮັບຟັງການລາຍງານສະພາບການຂອງແຕ່ລະຫົວຂໍ້ຈາກຜູ້ຊ່ຽວຊານຂົງເຂດຕ່າງໆໃນບັນດາປະເທດທີ່ໃຊ້ພາສາຝຣັ່ງ; ນອກນີ້, ຍັງໄດ້ຮັບຟັງການສະເໜີບົດຮຽນທີ່ດີ ຈາກຜູ້ຕາງໜ້າອົງການນິຕິບັນຍັດຂອງ APF ກ່ຽວກັບການປ່ຽນແປງດິນຟ້າອາກາດ, ປຶກສາຫາລື ແລະ ແລກປ່ຽນຄຳຄິດຄຳເຫັນກ່ຽວກັບຫຼາຍບັນຫາສຳຄັນທີ່ເປັນສິ່ງທ້າທາຍ ແລະ ຄວາມກັງວົນຮ່ວມກັນຂອງແຕ່ລະພາກພື້ນ ໂດຍສະເພາະແມ່ນໃນບັນດາປະເທດທີ່ໃຊ້ພາສາຝຣັ່ງ.

ການເຂົ້າຮ່ວມກອງປະຊຸມຄັ້ງນີ້, ຄະນະຜູ້ ແທນສະພາແຫ່ງຊາດລາວ ໄດ້ຮ່ວມສະເໜີບົດຄໍາເຫັນພາຍໃຕ້ 3 ຫົວຂໍ້ຕົ້ນຕໍຂອງກອງປະຊຸມ ເຊິ່ງໄດ້ເນັ້ນໜັກເຖິງການເອົາໃຈໃສ່ປັບປຸງ ແລະ ພັດ ທະນາໃນຂົງເຂດກະສິກໍາ, ການຜະລິດສະບຽງອາ ຫານໃຫ້ມີຄວາມໝັ້ນຄົງ ແລະ ພຽງພໍແກ່ປະຊາ ຊົນ ແລະ ສາມາດສົ່ງອອກເພື່ອເປັນຊ່ອງທາງສ້າງລາຍຮັບເຂົ້າປະເທດ ພ້ອມທັງໃຫ້ຄວາມສໍາຄັນຕໍ່ການຫັນເປັນສັງຄົມສີຂຽວ, ການຄຸ້ມຄອງ ແລະ ຮັບມືຕໍ່ກັບການປ່ຽນແປງດິນຟ້າອາກາດ ໃຫ້ສາ ມາດຫຼຸດຜ່ອນສະພາວະເຮືອນແກ້ວ, ມົນລະພິດທີ່ເກີດຂຶ້ນຈາກໂຮງງານ ແລະ ການຖາງປ່າເຮັດໄຮ່ ເພື່ອເປັນການຫຼຸດຜ່ອນສະພາບອາກາດທີ່ເປັນພິດຕໍ່ຮ່າງກາຍມະນຸດ.

ໃນຕອນທ້າຍ, ກອງປະຊຸມໄດ້ຮັບຮອງເອົາຖະແຫຼງການເກີນເທີ ກ່ຽວກັບການຮ່ວມມືຂອງບັນດາປະເທດທີ່ໃຊ້ພາສາຝຣັ່ງ ໃນຂົງເຂດກະສິກຳແບບຍືນຍົງ, ຄວາມໝັ້ນຄົງດ້ານສະບຽງອາຫານ ແລະ ຮັບປະກັນຕໍ່ການປ່ຽນແປງດິນຟ້າອາກາດ.

ໂອກາດເຂົ້າຮ່ວມກອງປະຊຸມຄັ້ງນີ້, ຄະນະຜູ້ແທນຂັ້ນສູງຂອງສະພາແຫ່ງຊາດລາວ ຍັງໄດ້ເຂົ້າຢ້ຽມພົບປະເຮັດວຽກກັບຄະນະຜູ້ແທນຂັ້ນສູງຂອງສະພາແຫ່ງຊາດຫວຽດນາມ ນໍາໂດຍທ່ານ ເຈິ່ນ ແທ່ງ ເໝິນ, ພົບປະອຳນາດການປົກຄອງທ້ອງຖິ່ນຂອງນະຄອນເກີນເທີ, ຢ້ຽມຢາມບັນດາພື້ນຖານດ້ານເສດຖະກິດ-ສັງຄົມ ໂດຍສະເພາະດ້ານກະສິກຳ ແລະ ອຸດສາຫະກຳ ຂອງນະຄອນ ເກິນເທີ ແລະ ນະຄອນໂຮ່ ຈີ ມິງ.