………………………………………………………………………

(ສພຊ) ໃນລະຫວ່າງວັນທີ 17-19 ພະຈິກ 2023 ຄະນະຜູ້ແທນສະພາແຫ່ງຊາດ ແຫ່ງ ສສ.ຫວຽດນາມ ນຳໂດຍສະຫາຍ ນາງ ເລ ທູ ຮ່າ ຮອງປະທານກຳມາທິການການຕ່າງປະເທດ ສະພາແຫ່ງຊາດ ແຫ່ງ ສສ.ຫວຽດນາມ ພ້ອມດ້ວຍຄະນະ ໄດ້ສຳເລັດການເຄື່ອນໄຫວເຮັດວຽກຢູ່ ສປປລາວ ທັງນີ້, ກໍເພື່ອປຶກສາຫາລື ແລະ ຮ່ວມກັນກວດກາຄວາມພ້ອມ ໃນການກະກຽມຕ້ອນຮັບຄະນະຜູ້ແທນຂັ້ນສູງຂອງສະພາແຫ່ງຊາດຫວຽດນາມ ນຳໂດຍປະທານສະພາແຫ່ງຊາດ ແຫ່ງ ສສ.ຫວຽດນາມ ພ້ອມດ້ວຍຄະນະ ທີ່ຈະເດີນທາງເຂົ້າຮ່ວມກອງປະຊຸມສຸດຍອດລັດຖະສະພາກຳປູເຈຍ, ລາວ ແລະ ຫວຽດນາມ ຄັ້ງທີ 1 ຢູ່ ສປປລາວ ໃນລະຫວ່າງວັນທີ 4-7 ທັນວາ 2023 ໃຫ້ໄດ້ຮັບຜົນສຳເລັດຕາມຄາດໝາຍທີ່ວາງໄວ້ທຸກປະການ.

ໃນການເຄື່ອນໄຫວເຮັດວຽກຄັ້ງນີ້, ຄະນະຜູ້ແທນສະພາແຫ່ງຊາດ ແຫ່ງ ສສ.ຫວຽດນາມ ໄດ້ພົບປະເຮັດວຽກກັບສະຫາຍ ສັນຍາ ປຣະເສີດ ປະທານກຳມາທິການການຕ່າງປະເທດ ສະພາແຫ່ງຊາດ ແຫ່ງ ສປປລາວ ແລະ ຄະນະອະນຸກຳມະການວຽກງານກອງປະຊຸມສຸດຍອດລັດຖະສະພາຂອງສະພາແຫ່ງຊາດລາວ ເພື່ອປຶກສາຫາລືບັນດາເນື້ອໃນຮ່າງບົດຖະແຫຼງການຮ່ວມຂອງກອງປະຊຸມສຸດຍອດລັດຖະສະພາກຳປູເຈຍ, ລາວ ແລະ ຫວຽດນາມ; ບັນດາຄຳເຫັນຕໍ່ແຕ່ລະຫົວໜ້າຂອງກອງປະຊຸມກຳມາທິການວຽກງານຕ່າງໆ; ຂະບວນການແຂ່ງຂັນລົດຖີບມິດຕະພາບ ສາມປະເທດ ກຳປູເຈຍ, ລາວ ແລະ ຫວຽດນາມ ຢູ່ ສປປລາວ; ປຶກສາຫາລືດ້ານວຽກງານປ້ອງກັນຄວາມສະຫງົບ ແລະ ດ້ານພິທີການອື່ນໆ.

ນອກນັ້ນ, ສະຫາຍ ນາງ ເລ ທູ ຮ່າ ພ້ອມດ້ວຍຄະນະ ຍັງໄດ້ລົງກວດກາສະຖານທີ່ຕ່າງໆ ທີ່ປະທານສະພາແຫ່ງຊາດ ແຫ່ງ ສສ.ຫວຽດນາມ ຈະໄປຢ້ຽມຢາມ ຢູ່ນະຄອນຫຼວງວຽງຈັນ ເປັນຕົ້ນ: ສະໜາມບິນສາກົນວັດໄຕ; ສະຖາບັນການເມືອງ ກະຊວງປ້ອງກັນຄວາມສະຫງົບ; ໂຮງໝໍລາວີ; ໂຮງໝໍລາວ-ຫວຽດ ແລະ ສູນວັດທະນະທຳຫວຽດນາມ ປະຈຳລາວ.