ກອງປະຊຸມຄົບຄະນະ ຂອງຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ສະພາປະຊາຊົນແຂວງ ສະຫວັນນະເຂດ ປະຈຳປີ 2024 ໄດ້ຈັດຂຶ້ນໃນວັນທີ 04 ພະຈິກ 2024 ທີ່ຫ້ອງປະຊຸມສະພາປະຊາຊົນແຂວງ ໂດຍການເປັນປະທານຂອງທ່ານ ນາງ ພູທອນ ແກ້ວພູວັງ ຮອງປະທານສະພາປະຊາຊົນແຂວງ ຜູ້ຊີ້ນໍາວຽກງານ ວັດທະນະທໍາ-ສັງຄົມ ແລະ ບັນດາເຜົ່າ ເຊິ່ງມີທ່ານ ຄຳດີ ສຸວັນນະສານ ປະທານຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ເປັນປະທານຮ່ວມ, ມີບັນດາທ່ານ ຮອງປະທານຄະນະກຳມະການ, ສະມາຊິກສະພາປະຊາຊົນແຂວງ ທີ່ເປັນກຳມະການສັງກັດຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ, ຮອງເລຂາທິການ, ຫົວໜ້າພະແນກ ສຶກສາທິການ ແລະ ກິລາແຂວງ, ສາທາລະນະສຸກແຂວງ, ແຮງງານ ແລະ ສະຫວັດດີການສັງຄົມແຂວງ, ພາຍໃນແຂວງ, ຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ; ປະທານແນວລາວສ້າງຊາດແຂວງ, ຜູ້ຕາງໜ້າຈາກອົງການຈັດຕັ້ງມະຫາຊົນ, ແລະ ພະນັກງານຈາກຄະນະກໍາມະການ ພ້ອມດ້ວຍແຂກຖືກເຊີນ ເຂົ້າຮ່ວມຈໍານວນ 46 ທ່ານ.
ທ່ານ ປອ ສຸກສົມພອນ ອະໂນໄທ ຫົວໜ້າພະແນກສຶກສາທິການ ແລະ ກິລາແຂວງ ໄດ້ຜ່ານບົດລາຍງານ ກ່ຽວກັບການຈັດຕັ້ງປະຕິບັດຍຸດທະສາດການປະຕິບັດຮູບລະບົບການສຶກສາ ແລະ ພັດທະນາຊັບພະຍາກອນມະນຸດແຫ່ງຊາດ ໃນໄລຍະຜ່ານມາ ເຊິ່ງຍັງມີສາເຫດ ທີ່ເຮັດຄຸນະພາບການສຶກສາຕໍ່າ ແລະ ບໍ່ບັນລຸຄາດໝາຍ ທີ່ກຳນົດໄວ້; 9 ຄາດໝາຍບໍ່ບັນລຸນັ້ນ ລວມທັງສັງຄົມ ຕີລາຄາ ແລະ ປະເມີນການສຶກສາບໍ່ມີຄຸນນະພາບ ບາງຄັ້ງກ່າວວ່າ ຈົບປ. 5 ອ່ານບໍ່ຄ່ອງ ຂຽນບໍ່ງາມຖາມຫຍັງຕອບບໍ່ໄດ້ໃນເລກສີ່ປະການ, ເປັນດັ່ງແນວນັ້ນແທ້ສະເພາະນັກຮຽນບາງກຸ່ມ ທີ່ຈັດການຮຽນ-ການສອນ ບ່ອນທີ່ຫຍຸ້ງຍາກ ເຂດຫ່າງໄກ (ສ່ວນບ່ອນທີ່ມີເງື່ອນໄຂຄວາມພ້ອມໃນຕົວເມືອງ ນັກຮຽນແມ່ນມີຄວາມສາມາດຮຽນຮູ້ໄດ້ດີ), ນອກນັ້ນອັດຕາປະລະສູງນັກຮຽນປະຖົມສຶກສາປະລະ8,6%, ນັກຮຽນມັດທະຍົມສຶກສາຕອນຕົ້ນປະລະ 19,4% ນັກຮຽນມັດທະຍົມສຶກສາຕອນປາຍ ປະລະ 17,6%, ດ້ານການຂາດແຄນຄູໆບໍ່ພຽງພໍກັບຈໍານວນໂຮງຮຽນທີ່ຈັດການຮຽນການສອນ ເຮັດໃຫ້ການສອນຂອງຄູໜັກໜ່ວງຫຼາຍ ເພາະໃນແຕ່ລະຊັ້ນກໍ່ຫຼາຍ; ຕຳລາ ຄູທີ່ສອນຫ້ອງຄວບ ບໍ່ສາມາດປະຕິບັດຕາມຫລັກສູດໄດ້, ບວກພື້ນຖານເສດຖະກິດກໍ່ຫຍຸ້ງຍາກເຮັດໃຫ້ພາວະຜູ້ນຳຂອງຄູຕົກຕ່ຳບຸກຄະລິກກະພາບພາຍນອກ ແລະ ພາຍໃນຂອງຄູບໍ່ສວຍງາມບໍ່ສົມກັບວ່າອາຊີບຄູເປັນອາຊີບທີ່ຊົງກຽດ ຄູບໍ່ເປັນແວ່ນໃຫ້ແກ່ລູກຫຼານພໍ່ແມ່ປະປະຊາຊົນ ເພື່ອມີແຮງຈູງໃຈຢາກມາຮຽນ ຫຼື ຮຽນຈົບການສຶກສາຂັ້ນພື້ນຖານກໍ່ບໍ່ຢາກໄປຮຽນຄູ. ລວມທັງສັງຄົມປ່ອຍປະລະເລີຍຄິດວ່າ ການສຶກສາແມ່ນໜ້າທີ່ຂອງຄູ ການຂາດຄູເພາະແຕ່ລະປີເຮົາເສຍຄູຈຳນວນຫຼວງຫລາຍ ເຊັ່ນໃນປີ2024 ອອກບຳນານ ຈຳນວນ 394 ຍິງ 197 ຄົນ ຮັບໂຄຕ້າຄູພຽງ 46 ຄົນ. ຕໍ່ຈາກນັ້ນ ກໍ່ໄດ້ຮັບຟັງການລາຍງານການຈັດຕັ້ງປະຕິບັດວຽກງານ 3 ສ້າງ ຂອງແຂວງໃນໄລຍະຜ່ານມາ ຈາກທ່ານ ສຸກສາຄອນ ມະນີສວນ ຮອງຫົວໜ້າພະແນກພາຍໃນແຂວງ ພາຍຫຼັງທີ່ໄດ້ຮັບຟັງແລ້ວປະທານກອງປະຊຸມກໍ່ໄດ້ມີຄຳຖາມເຈາະຈິ້ມ ໃນສອງວຽກງານທີ່ໄດ້ລາຍງານ ພ້ອມທັງເປີດໂອກາດໃຫ້ບັນດາທ່ານສສຊ ແລະ ສສຂ ປະກອບຄໍາຄິດຄຳເຫັນພ້ອມທັງຊອກຫາວິທີທາງແກ້ໄຂ ແລະ ຮັບຟັງ ການຜ່ານບົດສະຫຼຸບຕີລາຄາການເຄື່ອນໄຫວວຽກງານປະຈໍາປີ 2024 ແລະ ທິດທາງແຜນການເຄື່ອນໄຫວປີ 2025 ຂອງຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ ແລະ ຜ່ານຮ່າງມະຕິຮັບຮອງເອົາຜົນການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2024 ແລະ ທິດທາງແຜນການ ປະຈຳປີ 2025 ຂອງຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ ໂອກາດຕອນທ້າຍປະທານກອງປະຊຸມ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນເລັດທີ່ຄະນະກໍາມະການຍາດມາໄດ້ໃນໄລຍະຜ່ານມາ ພ້ອມທັງມີບາງຄຳເຫັນຕໍ່ກອງປະຊຸມ ໂດຍເນັ້ນໜັກໃຫ້ເອົາໃຈໃສ່ຊຸກຍູ້, ປະສານສົມທົບກັບຂະແໜງການ ແລະ ພາກສ່ວນກ່ຽວຂ້ອງ ເພື່ອເຂົ້າຮ່ວມຊອກຫາວິທີທາງແກ້ໄຂບັນຫາທີ່ຍັງຂົງຂ້າງ, ເພື່ອຈະໄດ້ນໍາເຂົ້າຜ່ານກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ທີ່ຈະໄດ້ຈັດຂຶ້ນໃນກາງເດືອນພະຈິກນີ້.