ເພື່ອປຶກສາຫາລື ກ່ຽວກັບການຈັດຕັ້ງປະຕິບັດໂຄງການລົງທຶນຂອງລັດ ປີ 2023, ແຜນການລົງທຶນ ປະຈໍາປີ 2024 ແລະ ການຈັດສັນບ້ວງເງິນເກີນແຜນປີ 2022 (ໄລຍະ 2) ຂອງແຂວງສະຫວັນນະເຂດ ໃຫ້ເປັນເອກະພາບທຸກພາກສ່ວນ ໃນຕອນບ່າຍວັນທີ 24 ຕຸລາ 2024 ທີ່ຫ້ອງປະຊຸມສະພາປະຊາຊົນແຂວງ ໄດ້ຈັດກອງປະຊຸມປຶກສາຫາລື ກັບບັນດາພະແນກການ ໂດຍການເປັນປະທານຂອງທ່ານ ຄໍາຜັນ ຄູນສະຫວັນ ຄະນະປະຈໍາພັກແຂວງ ຮອງປະທານສະພາປະຊາຊົນແຂວງ ເຂົ້າຮ່ວມມີຕາງໜ້າຈາກກອງບັນຊາການທະຫານແຂວງ, ກອງບັນຊາການ ປກສ ແຂວງ, ບັນດາພະແພກການ, ແນວລາສ້າງຊາດ, ສະຫະພັນນັກຮົບເກົ່າ, ອົງການມະຫາຊົນ ພ້ອມດ້ວຍພະນັກງານ ວິຊາການທີ່ກ່ຽວຂ້ອງເຂົ້າຮ່ວມ.

ໃນກອງປະຊຸມໄດ້ຮັບຟັງການສະຫຼຸບສັງລວມບັນດາໂຄງການທີ່ຂຶ້ນກັບພະແນການ ຂອງແຕ່ລະພາກສ່ວນໃນໄລຍະຜ່ານມາເປັນຕົ້ນ, ຂໍ້ສະດວກ ແລະ ຫຍຸ້ງຍາກ ໃນການຈັດຕັ້ງປະຕິບັດໂຄງການ, ການຊໍາລະມູນຄ່າຂອງໂຄງການ, ມູນຄ່າຊໍາລະ ແລະ ບັນຊີໂຄງການທີ່ສະເໜີໃໝ່ຂອງແຕ່ລະພາກສ່ວນ ເພື່ອຈະນໍາເຂົ້າແຜນ ປະຈໍາປີ 2024, ຈາກນັ້ນ ປະທານກອງປະຊຸມ ກໍ່ໄດ້ສະຫຼຸບ ຕີລາຄາ ພ້ອມທັງມີທິດຊີ້ນໍາຕໍ່ກັບບັນຫາທີ່ຍັງຄົງຄ້າງ ໃຫ້ບັນດາພະແນກການຮີບຮ້ອນປະສານສົມທົບກັບພາກສ່ວນທີ່ກ່ຽວຂ້ອງ ເພື່ອແກ້ໄຂບັນຫາ ແລະ ລາຍງານຄະນະປະຈໍາສະພາປະຊາຊົນແຂວງຢ່າງຕໍ່ເນື່ອງ.