(ສປນວ) ໃນຕອນເຊົ້າຂອງວັນທີ 10 ພະຈິກ 2022, ທ່ານ ສົມບັດ ຈັນທະມາດ ປະທານຄະນະກຳມະການເສດຖະກິດ, ແຜນ ການ ແລະ ການເງິນ ສະພາປະຊາຊົນ ນວ ພ້ອມດ້ວຍຄະນະ ໄດ້ສືບຕໍ່ລົງເຄື່ອນໄຫວຕິດ ຕາມກວດກາ ແລະ ຊຸກຍູ້ການຈັດ ຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປະຈຳປີ 2022 ຢູ່ພະແນກແຜນການ ແລະ ການລົງທຶນ ນວ ໂດຍການຕ້ອນຮັບຂອງ ນາງ ບົວວອນ ສຸກລາແສງ ຫົວໜ້າພະແນກ ແຜນການ ແລະ ການລົງທຶນ ນວ ແລະ ມີບັນດາຫົວໜ້າ, ຮອງຫົວໜ້າຂະແໜງການຂອງພະແນກ ແລະ ວິຊາການຈຳນວນໜຶ່ງ ເຂົ້າຮ່ວມ.

ໃນການລົງເຮັດວຽກຄັ້ງນີ້, ໄດ້ຮັບຟັງຊີ້ແຈງຂອງພະແນກແຜນການ ແລະ ການລົງທຶນ ນວ ຕໍ່ຄໍາຖາມເຈາະຈິ້ມຂອງສະພາປະຊາຊົນ ນວ ໃນການຈັດຕັ້ງແຜນພັດທະນາເສດຖະກິດ-ສັງຄົມ ປະຈຳປີ 2022 ແລະ ຮັບຟັງການລາຍງານ ການຈັດຕັ້ງປະຕິບັດວຽກງານໃນໄລຍະ 9 ເດືອນຕົ້ນປີ, ແຜນວຽກຈຸດສຸມ 3 ເດືອນທ້າຍປີ 2022 ຂອງພະ ແນກ ເຊິ່ງ ທ່ານ ນາງ ບົວວອນ ສຸກລາແສງ ຫົວໜ້າພະແນກແຜນການ ແລະ ການລົງທຶນ ນວ ໄດ້ລາຍ ງານໃຫ້ຮູ້ວ່າ ໃນໄລຍະຕົ້ນປີຜ່ານມາ ໂດຍອີງໃສ່ສະພາບການຂອງສາກົນໄດ້ສົ່ງຜົນກະທົບຕໍ່ສະພາບເສດຖະກິດ ເຊິ່ງນະຄອນຫຼວງ ໄດ້ປະເຊີນກັບສິ່ງທ້າຍທ້າຍດ້ານລາຄາສິນຄ້າອຸປະໂພກ, ບໍລິໂພກ ແລະ ຄ່າຄອງຊີບທີ່ເພິ່ມຂຶ້ນ, ການສະໜອງນໍ້າມັນມີຄວາມຈຳກັດ ທັງມີຄວາມຫຍຸ້ງ ຍາກທາງດ້ານງົບປະມານ ເພື່ອຊຳລະສະສາງຕ່າງໆ ແຕ່ເຖີງຢ່າງ ໃດກໍຕາມ ເມື່ອອີງຕາມການຄິດໄລ່ຂອງສູນສະຖິຕິ ປະຈຳນະຄອນຫຼວງ ຄາດຄະເນວ່າ ໝົດປີ 2022 ເສດຖະກິດຈະມີການຂະຫຍາຍຕົວໃນລະດັບ 4,36% ທຽບໃສ່ແຜນການປີ ຍັງອີກ 2,14% ຈະໄດ້ຕາມແຜນ (ແຜນການວາງໄວ້ 6,5%), ຄາດຄະເນມູນຄ່າເພິ່ມລວມຍອດຜະລິດຕະພັນພາຍໃນ (GDP) ປະມານ 58.412,26 ຕື້ກັບ (ແຜນການວາງໄວ້ 63.076 ຕື້ກັບ), GDP ສະເລ່ຍຕໍ່ຫົວຄົນ 60,28 ລ້ານກີບ ຫຼື ເທົ່າກັບ 5.525 ໂດລາສະຫະລັດ (ແຜນການວາງໄວ້ 6.426 ໂດລາສະຫະລັດ). ການລົງທຶນທົ່ວສັງລົມ ປະຕິບັດໄດ້ 40.306,67 ຕື້ກີບ, ລື່ນແຜນ 3 ເທົ່າຂອງແຜນການປີ (ມະຕິສະພາແຫ່ງຊາດ 13.300 ຕື້ກີບ) ສາມາດບັນລຸໄດ້ຕາມຄາດໝາຍ. ນອກຈາກນັ້ນ, ການປະຕິ ບັດບັນດາຄາດໝາຍໃນແຕ່ລະດ້ານທີ່ກຳນົດໄວ້ໃນແຜນ ແມ່ນສາມາດບັນລຸໄດ້ເປັນສ່ວນໃຫຍ່ ແລະ ຈະສືບຕໍ່ປະຕິບັດໃນ 3 ເດືອນທ້າຍປີ 2022 ໃຫ້ບັນລຸຕາມຄາດໝາຍທີ່ວາງໄວ້.