(ສພຊ) ຄະນະສະມາຊິກສະພາແຫ່ງຊາດ (ສສຊ) ເພດຍິງ ຊຸດທີ IX ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານຂອງຕົນ ປະຈຳປີ 2023 ຂຶ້ນໃນວັນທີ 13 ທັນວາ 2023 ທີ່ເມືອງວັງວຽງ ແຂວງວຽງຈັນ ໂດຍການເປັນປະທານຂອງທ່ານ ນາງ ທຸມມາລີ ວົງພະຈັນ ປະທານຄະນະ ສສຊ ເພດຍິງ; ມີບັນດາທ່ານ ສສຊ ເພດຍິງ ຈາກ 18 ເຂດເລືອກຕັ້ງໃນທົ່ວປະເທດ ແລະ ພະນັກງານ-ລັດຖະກອນກ່ຽວຂ້ອງເຂົ້າຮ່ວມ.
ໃນກອງປະຊຸມ ໄດ້ຮັບຟັງບົດສະຫຼຸບການຈັດຕັ້ງປະຕິບັດວຽກງານຂອງ ສສຊ ເພດຍິງ ຊຸດທີ IX ປະຈຳປີ 2023 ແລະ ທິດທາງແຜນການປະຈໍາປີ 2024, ຜ່ານຮ່າງມະຕິຂອງຄະນະປະຈໍາສະພາແຫ່ງຊາດ ວ່າດ້ວຍລະບຽບການເຄື່ອນໄຫວຂອງຄະນະ ສສຊ ເພດຍິງ ຊຸດທີ IX; ຈາກນັ້ນ, ຜູ້ເຂົ້າຮ່ວມກອງປະຊຸມ ໄດ້ຜັດປ່ຽນກັນປະກອບຄຳຄິດຄຳເຫັນໃສ່ບົດສະຫຼຸບ ແລະ ຮ່າງມະຕິດັ່ງກ່າວ.
ທ່ານ ນາງ ທຸມມາລີ ວົງພະຈັນ ໄດ້ກ່າວເປີດກອງປະຊຸມວ່າ: ກອງປະຊຸມຄົບຄະນະຄັ້ງທໍາອິດຂອງຄະນະ ສສຊ ເພດຍິງ ຊຸດທີ IX ແລະ ຍັງເປັນໂອກາດດີທີ່ເຮັດໃຫ້ພວກເຮົາໄດ້ມີການພົບປະ, ປຶກສາຫາລື, ສະຫຼຸບຖອດຖອນບົດຮຽນດ້ວຍກັນ ໃນການປະຕິບັດພາລະບົດບາດຂອງ ສສຊ ເພດຍິງ ທີ່ໄດ້ເປັນເຈົ້າການຊຸກຍູ້, ສົ່ງເສີມໃຫ້ຂະແໜງການທີ່ກ່ຽວຂ້ອງ ເອົາໃຈໃສ່ຕາມພາລະບົດບາດຂອງຕົນ ເພື່ອຫັນເອົາເນື້ອໃນຂອງສົນທິສັນຍາວ່າດ້ວຍການລົບລ້າງທຸກຮູບການຈຳແນກຕໍ່ແມ່ຍິງ, ການຈັດຕັ້ງປະຕິບັດແຜນດຳເນີນງານແຫ່ງຊາດເພື່ອຄວາມສະເໝີພາບຍິງ-ຊາຍ 5 ປີ ຄັ້ງທີ IV (2021-2025) ມາຈັດຕັ້ງຜັນຂະຫຍາຍໃຫ້ສອດຄ່ອງກັບວຽກງານຕົວຈິງຂອງຕົນ ເປັນຕົ້ນການສ້າງ ແລະ ປັບປຸງກົດໝາຍ ແລະ ນິຕິກໍາໃຕ້ກົດໝາຍ ໃຫ້ສອດຄ່ອງກັບການປະຕິບັດການສົ່ງເສີມວຽກງານຄວາມສະເໝີພາບຍິງ-ຊາຍ, ການລົບລ້າງທຸກການຈຳແນກ ແລະ ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ທັງເປັນນິຕິກໍາທີ່ເປັນເຄື່ອງມືເພື່ອຕອບສະໜອງກັບຄວາມຮຽກຮ້ອງຕ້ອງການໃນການຮັບໃຊ້ໜ້າທີ່ການເມືອງໃນໄລຍະໃໝ່. ມື້ນີ້, ຄະນະ ສສຊ ເພດຍິງຂອງພວກເຮົາ ຈຶ່ງໄດ້ຈັດກອງປະຊຸມຄົບຄະນະປະຈໍາປີ 2023 ຂອງຕົນຂຶ້ນ ເພື່ອສະຫຼຸບຕີລາຄາການຈັດຕັ້ງປະຕິບັດວຽກງານໃນໜຶ່ງປີຜ່ານມາ ແລະ ກໍານົດທິດທາງແຜນການໃນປີ 2024 ຂອງຄະນະ ສສຊ ເພດຍິງ ຊຸດທີ IX ແລະ ພ້ອມກັນປຶກສາຫາລືວຽກງານຈໍານວນໜຶ່ງທີ່ເປັນຄວາມຮັບຜິດຊອບໜ້າທີ່ການເມືອງຂອງຄະນະ ສສຊ ເພດຍິງ ເປັນຕົ້ນ: ການສະຫຼຸບຕີລາຄາຄືນການຈັດຕັ້ງປະຕິບັດວຽກງານນັບແຕ່ກອງປະຊຸມຄັ້ງປະຖົມມະລືກເປັນຕົ້ນມາ ແລະ ກໍານົດທິດທາງແຜນການປະຈຳປີ 2024; ປຶກສາຫາລື ແລະ ສ້າງຄວາມເປັນເອກະພາບຕໍ່ຮ່າງລະບຽບການຈັດຕັ້ງ ແລະ ການເຄື່ອນໄຫວຂອງຄະນະ ສສຊ ເພດຍິງ ຊຸດທີ IX, ການຈັດຕັ້ງປະຕິບັດບັນດາຄາດໝາຍທີ່ຕິດພັນກັບຄວາມສະເໝີພາບຍິງ-ຊາຍ ເພື່ອໃຫ້ນຳໄປຈັດຕັ້ງປະຕິບັດໃຫ້ມີປະສິດທິພາບ ແລະ ປະສິດທິຜົນ.
(ພາບ ແລະ ຂ່າວ: ນາງ ກຸກກິກ ບຸດດາໄຊ)