ວັນທີ 1 ມິຖຸນາ 2022 ນີ້, ທີ່ຫ້ອງປະຊຸມສະພາປະຊາຊົນ ແຂວງຫົວພັນ ໄດ້ຈັດກອງປະຊຸມຮ່ວມ ລະຫວ່າງ ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 8 ແຂວງຫົວພັນ, ຄະນະປະຈຳສະພາປະຊາຊົນແຂວງ ແລະ ອົງການປົກຄອງແຂວງ, ອົງການໄອຍະການປະຊາຊົນແຂວງ, ສານປະຊາຊົນແຂວງ ຂຶ້ນ ພາຍໃຕ້ການເປັນປະທານຮ່ວມຂອງທ່ານ ວັນໄຊ ແພງຊຸມມາ ກຳມະການສູນກາງພັກ, ເລຂາພັກແຂວງ, ເຈົ້າແຂວງຫົວພັນ ແລະ ທ່ານ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ຮອງເລຂາພັກແຂວງ, ປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 8 ແຂວງຫົວພັນ, ປະທານສະພາປະຊາຊົນ ແຂວງຫົວພັນ ມີບັນດາທ່ານ ຄະນະປະຈຳ ສພຂ, ສສຊ ປະຈຳເຂດເລືອກຕັ້ງທີ 8, ຮອງເລຂາທິການ ສພຂ, ຫົວໜ້າ,ຮອງຫົວໜ້າພະແນກການອ້ອມຂ້າງແຂວງ, ຮອງຫົວໜ້າ ອົງການໄອຍະການປະຊາຊົນແຂວງ ແລະ ຮອງ ປະທານສານປະຊາຊົນແຂວງ ເຂົ້າຮ່ວມຢ່າງພ້ອມພຽງ.

ວາລະກອງປະຊຸມ, ໄດ້ຮັບຟັງ ຮ່າງບົດລາຍງານ ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແລະ ແຜນງົບປະມານ ປະຈຳ 6 ເດືອນຕົ້ນ ແລະ ທິດທາງ 6 ເດືອນທ້າຍ ປີ 2022 ຂອງແຂວງຫົວພັນ; ການຄຸ້ມຄອງ, ການຂຸດຄົ້ນ ແລະ ການຂົນສົ່ງແຮ່ທາດ ຢູ່ແຂວງຫົວພັນ; ການຈັດຕັ້ງປະຕິບັດການຄຸ້ມຄອງການສົ່ງເສີມ SME ຢູ່ແຂວງຫົວພັນ; ການຈັດຕັ້ງປະຕິບັດ 2 ວາລະແຫ່ງຊາດຄື: ການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນ ແລະ ການແກ້ໄຂບັນຫາຢາເສບຕິດ ຢູ່ແຂວງຫົວພັນ ແລະ ບົດລາຍງານ 7 ມາດຕະການສະກັດກັ້ນ ຈາກບັນດາພາກສ່ວນ ທີ່ກ່ຽວຂ້ອງ. ຈາກນັ້ນ, ຜູ້ແທນກອງປະຊຸມ ກໍໄດ້ພ້ອມກັນຄົ້ນຄວ້າ ປະກອບຄຳຄິດຄຳເຫັນ ຢ່າງກົງໄປກົງມາ ຕໍ່ກັບບັນດາບົດລາຍງານ ທີ່ຜ່ານມານັ້ນ ເພື່ອໃຫ້ມີເນື້ອໃນລະອຽດຄົບຖ້ວນ, ສົມບູນ ເພື່ອເປັນຂໍ້ມູນໃຫ້ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 8 ແຂວງຫົວພັນ ມີຄຳເຫັນ ຢູ່ກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ແລະ ນຳເຂົ້າຜ່ານ ຢູ່ໃນກອງປະຊຸມສະໄໝສາມັນ ເທື່ອທີ 3 ສະພາປະຊາຊົນ ແຂວງຫົວພັນ.

ຕອນທ້າຍ, ປະທານກອງປະຊຸມ ກໍໄດ້ມີຄຳເຫັນຊີ້ນຳ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ໃນໄລຍະຜ່ານມາ ເຫັນວ່າມີຫລາຍອັນພົ້ນເດັ່ນ ພ້ອມທັງ ນຳເອົາເນື້ອໃນຈິດໃຈ ຄຳຄິດຄຳເຫັນຕ່າງໆ ໄປປັບປຸງໃສ່ບົດລາຍງານໃຫ້ມີເນື້ອໃນລະອຽດຈະແຈ້ງ. ຄຽງຄູ່ກັນນີ້, ທ່ານຍັງໄດ້ເໜັ້ນໜັກບາງບັນຫາ ເປັນຕົ້ນແມ່ນ ເອົາໃຈໃສ່ປັບປຸງບຸກຄະລາກອນຂອງຕົນ ໃຫ້ມີຈັນຍາບັນ, ຈັນຍາທຳ, ຮັກໃນອາຊີບ ຮັບໃຊ້ປະຊາຊົນຢ່າງແທ້ຈິງ, ກຳແໜ້ນຂໍ້ຫ້າມຕ່າງໆ ຂອງພະນັກງານລັດຖະກອນ ພ້ອມທັງຍົກສູງປະສິດທິພາບ, ດ້ານກົນໄກການປະສານງານ ລະຫວ່າງ ສະພາປະຊາຊົນແຂວງ ກັບ ອົງການປົກຄອງແຂວງ, ອົງການໄອຍະການປະຊາຊົນແຊວງ ແລະ ສານປະຊາຊົນແຂວງ ໃຫ້ມີຄວາມສອດຄ່ອງ, ວ່ອງໄວ, ສະດວກ, ທັນກັບສະພາບການ ແລະ ທັນເວລາກັບການເຄື່ອນໄຫວຕົວຈິງ.

ພາບ ແລະ ຂ່າວໂດຍ ນ. ປຸ້ຍນິຕາ