ເຊື່ອວ່າຂາປະຈຳ ເພຈຂ່າວ “ຜູ້ແທນປະຊາຊົນ” ຄົງໄດ້ອ່ານເລື່ອງທີ່ຜູ້ຂຽນຝອຍໃນວັນຈັນແລ້ວນີ້ ທີ່ໄດ້ປຽບທຽບ “ຜູ້ນຳທ່ຽວ” ວ່າຄືຫູ, ຕາ ແລະ ແຂນຂາຂອງວຽກທ່ອງທ່ຽວ ກໍຄືນັກທ່ອງທ່ຽວຫັ້ນລະ. ສ່ວນສຳລັບມື້ນີ້, ຂໍຍົກຕົວຢ່າງຂໍ້ຫ້າມສຳລັບນັກທ່ອງທ່ຽວທີ່ປະຕິບັດກັນຢູ່ບາງປະເທດ ເຊັ່ນ:

ທີ່ ສປຈີນ ເມື່ອປະມານສີ່ຊ້າຫ້າປີຜ່ານມາ, ທາງການຈີນໄດ້ອອກກົດລະບຽບເຫຼັກ ເພື່ອຄວບຄຸມນັກທ່ອງທ່ຽວຈີນ ບໍ່ໃຫ້ເຮັດແນວແຕກປອກ ນອກທາງ ເວລາໄປເຄື່ອນໄຫວທ່ອງທ່ຽວຢູ່ພາຍໃນ ແລະ ຕ່າງປະເທດ ຄຽງຄູ່ກັບລະບຽບການຄຸ້ມຄອງ-ຄວນຄຸມແຂກ ຫຼື ນັກທ່ອງທ່ຽວຕ່າງປະເທດ ທີ່ເຂົ້າໄປ ສປຈີນ. ສຳລັບຢູ່ຕ່າງປະເທດນັ້ນ, ທາງການຈີນ ໄດ້ມອບໃຫ້ບັນດາສະຖານທູດຈີນເປັນຜູ້ຕິດຕາມການປະພຶດຂອງນັກທ່ອງທ່ຽວຈີນ ເພື່ອບໍ່ໃຫ້ລະເມີດຂໍ້ຫ້າມ ເຊັ່ນ ລະເມີດລະບຽບກົດໝາຍ, ຮີດຄອງປະເພນີຂອງປະເທດທີ່ໄປທ່ອງທ່ຽວ, ການກໍ່ອາດຊະຍາກຳຕ່າງໆທີ່ພົວພັນກັບຢາເສບຕິດ, ການພະນັນ, ການຕົ້ມຕຸ໋ນ, ໂສເພນີ, ການຄ້າມະນຸດ. ນອກຈາກມອບໃຫ້ສະຖານທູດເປັນຫູເປັນຕາແລ້ວ, ທາງການຈີນກໍຍັງມີກົນໄກຮ່ວມມືປະສານງານກັບເຈົ້າໜ້າທີ່ກ່ຽວຂ້ອງປະເທດປາຍທາງການທ່ອງທ່ຽວອີກດ້ວຍ. ສາເຫດທີ່ນຳໄປສູ່ການອອກກົດລະບຽບເຫຼັກດັ່ງກ່າວມີຫຼາຍ ແຕ່ຂໍຍົກຕົວຢ່າງ ກໍລະນີນັກທ່ອງທ່ຽວຈີນ ສາດນໍ້າຮ້ອນໃສ່ ນາງ ອາກາດ ການບິນໄທ ເມື່ອ 5 ປີຜ່ານມາ ຍ້ອນຕ້ອງການປ່ຽນບ່ອນນັ່ງໃນເຄື່ອງບິນແຕ່ຖືກປະຕິເສດ. ນອກນັ້ນ ກໍມີກໍລະນີນັກທ່ອງທ່ຽວຈີນສອງຄົນ ສະແດງທ່າຂໍ່ານັບແບບຮິດເລີ ຢູ່ບໍລິເວນຕຶກລັດຖະສະພາເຢຍລະມັນ ທີ່ແບກແລງ ຈົນຖືກປັບໃໝ ແລະ ເນລະເທດ. ການສະແດງທ່າທາງທີ່ເປັນສັນຍາລັກຂອງພວກຟາດຊິດຮິດເລີນັ້ນ ມັນຂັດກັນກັບກົດໝາຍເຢຍລະມັນ ຢ່າງຮ້າຍແຮງ. ສ່ວນນັກທ່ອງທ່ຽວຕ່າງປະເທດທີ່ໄປທ່ອງທ່ຽວໃນຈີນນັ້ນ ກໍຕ້ອງປະຕິບັດຕາມຂໍ້ຫ້າມທີ່ກ່າວມາຂ້າງເທິງນັ້ນເຊັ່ນກັນ. ໃນໄລຍະຜ່ານມາເຄີຍມີກໍລະນີ ນັກທ່ອງທ່ຽວຕ່າງປະເທດ ຊອກຊື້ວັດຖຸມີຄ່າທາງປະຫວັດສາດ ເຊັ່ນ ຫີນ-ດິນຈີ່ ຈາກກຳແພງໃຫຍ່ບ່ອນເປ່ເພຍັງບໍ່ທັນໄດ້ບູລະນະສ້ອມແຊມຄືນ. ນອກຈາກນັ້ນ, ກໍຍັງມີນັກທ່ອງທ່ຽວມືຈັງໄຮໃຊ້ວັດຖຸຂີດຂຽນ ຫຼື ຄວັດຊື່ຂອງພວກຕົນໄວ້ຢູ່ຕາມສະຖານທີ່ຕ້ອງຫ້າມຕ່າງໆ.

ທີ່ປະເທດຝຣັ່ງ ເມື່ອ 3 ປີກ່ອນໜ້ານີ້, ທາງການຝຣັ່ງໄດ້ຊຳລະສະສາງໜ່ວຍກະແຈຫຼາຍພັນຊຸດທີ່ປິດຕາຍຢູ່ຮາວ ຫຼື ເສົາບັນດາຂົວຂ້າມນໍ້າແຊນ ຢູ່ນະຄອນຫຼວງປາຣີ. ໜ່ວຍກະແຈເຫຼົ່ານີ້ ແມ່ນບັນດານັກທ່ອງທ່ຽວຄູ່ບ່າວສາວ ພາກັນປິດຕາຍໄວ້ ແລ້ວໂຍນລູກກະແຈລົງນໍ້າ. ການເຮັດແບບນີ້ ແມ່ນເພື່ອເປັນສັນຍາລັກຄວາມຮັກອຳມະຕະ ເໝືອນກັບໜ່ວຍກະແຈທີ່ປິດຕາຍໄວ້. ທາງການຝຣັ່ງເຫັນວ່າຈຳນວນໜ່ວຍກະແຈທີ່ເພີ່ມຂຶ້ນຈະເຮັດໃຫ້ຂົວ ທົນນໍ້າໜັກບໍ່ໄຫວຈຶ່ງໄດ້ຈັດການຕັດອອກຈົນແປນເອີດເຕີດ ແລ້ວປະກາດຂໍ້ຫ້າມນັກທ່ອງທ່ຽວເອົາໜ່ວຍກະແຈໄປເກາະຫ້ອຍ ແລະ ປິດຕາຍຕາມຂົວຂ້າມນໍ້າແຊນອີກຕໍ່ໄປ. ສ່ວນຢູ່ປະເທດມຽນມານັ້ນ ຂໍ້ຫ້າມສ່ວນໃຫຍ່ພົວພັນກັບການປະພຶດທີ່ບໍ່ເໝາະສົມຂອງນັກທ່ອງທ່ຽວ ຢູ່ຕາມສະຖານທີ່ສັກກາລະບູຊາເຊັ່ນວັດ, ຢູ່ກຳປູເຈຍ ຂໍ້ຫ້າມເນັ້ນເລື່ອງການນຸ່ງຖືໂປ້ເປືອຍຕາມສະຖານທີ່ປະຫວັດສາດ-ວັດທະນະທຳ, ຢູ່ໄທ ທາງການເອົາໃຈໃສ່ຄວບຄຸມການຊື້-ຂາຍ ສິນຄ້າປອມ, ສິນຄ້າລະເມີດລິຂະສິດ ໂດຍໄດ້ອອກຄຳເຕືອນນັກທ່ອງທ່ຽວຕ່າງປະເທດບໍ່ໃຫ້ຫຼົງກົນລວງໄປຊື້ສິນຄ້າຫຼູແຕ່ເປັນຂອງປອມ, ສ່ວນຜູ້ຂາຍສິນຄ້າປອມກໍຈະໄດ້ຮັບໂທດຕາມກົດໝາຍ. ທາງການໄທຖືວ່າສິນຄ້າປອມຍ້ອມແມວເຫຼົ່ານີ້ ຈະເຮັດໃຫ້ປະເທດໄທເສຍຊື່ສຽງຍ້ອນ ແລະ ຈະເຮັດໃຫ້ນັກທ່ອງທ່ຽວຫຼາບບໍ່ຢາກໄປທ່ອງທ່ຽວຢູ່ປະເທດໄທອີກ. ຢູ່ສິງກະໂປ ຢູ່ຫຼາຍສະຖານທີ່ທ່ອງທ່ຽວມີການຫ້າມກິນ, ດື່ມ ແລະ ສູບຢາ. ຢູ່ປະເທດອິຕາລີ ໂດຍສະເພາະແມ່ນຢູ່ນະຄອນຫຼວງໂຣມ ນັ້ນກໍມີການຫ້າມນັກທ່ອງທ່ຽວລາກຫີບລໍ້ຕາມບ່ອນຕຶກທ່ອງທ່ຽວບູຮານ ທີ່ສຳຄັນເພື່ອປ້ອງກັນບໍ່ໃຫ້ມີຮອຍຂູດ, ຫ້າມກິນດື່ມຕາມສະຖານທີ່ດັ່ງກ່າວ ແລະ ຫ້າມສວຍໂອກາດອາບນໍ້າ-ຊັກເຄື່ອງຢູ່ຕາມນໍ້າພຸ. ຂໍ້ຫ້າມເຫຼົ່ານີ້ມີບົດລົງໂທດຕໍ່ຜູ້ລະເມີດດ້ວຍການປັບໃໝ.

(ເຊີນອ່ານບົດ ໂຄງການບ້ານທ່ອງທ່ຽວ ເພື່ອເກັບກ່ຽວຜົນປະໂຫຍດ ໃຫ້ຊາວບ້ານ ໃນວັນຈັນໜ້າ).