(ສພຊ) ໃນຕອນເຊົ້າຂອງວັນທີ 6 ທັນວາ 2023, ທີ່ເດີ່ນສະພາແຫ່ງຊາດ ນະຄອນຫຼວງວຽງຈັນ ໄດ້ຈັດກິດຈະກໍາຂະບວນຂີ່ລົດຖີບຂອງຄະນະນຳສາມປະເທດ ກໍາປູເຈຍ-ລາວ-ຫວຽດນາມ ແລະ ການແຂງຂັນຂີ່ລົດຖີບ ເພື່ອມິດຕະພາບ ແຂ່ງຂັນຊິງລາງວັນ ປະທານສະພາແຫ່ງຊາດ ແຫ່ງ ສປປລາວ ເພື່ອສະເຫຼີມສະຫຼອງກອງປະຊຸມສຸດຍອດລັດຖະສະພາກໍາປູເຈຍ-ລາວ-ຫວຽດນາມ ຫຼື CLV ຄັ້ງທີ 1 ພາຍໃຕ້ຫົວຂໍ້ “ເພີ່ມທະວີບົດບາດຂອງລັດຖະສະພາ ໃນການສົ່ງເສີມການຮ່ວມມືຮອບດ້ານ ລະຫວ່າງກຳປູເຈຍ-ລາວ-ຫວຽດນາມ” ໂດຍເລີ່ມຈາກໜ້າຫໍສະພາແຫ່ງຊາດ ຫາຫ້ອງວ່າການສໍານັກງານປະທານປະເທດ (ຫໍຄໍາ) ແລ້ວກັບຄືນຫາໜ້າຫໍສະພາແຫ່ງຊາດ ໂດຍມີທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ, ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ, ມີຜູ້ແທນຈາກກໍາປູເຈຍ, ລາວ, ຫວຽດນາມ ແລະ ບັນດາເອກອັກຄະລັດຖະທູດ ແລະ ຕາງໜ້າບັນດາອົງການຈັດຕັ້ງສາກົນປະຈໍາລາວ ພ້ອມດ້ວຍມວນຊົນພາຍໃນນະຄອນຫຼວງວຽງຈັນເຂົ້າຮ່ວມເປັນຈໍານວນຫຼາຍ.

ໃນພິທີເປີດ, ທ່ານ ສັນຍາ ປຣະເສີດ ປະທານກໍາມາທິການການຕ່າງປະເທດ ໄດ້ກ່າວເປີດພິທີຢ່າງເປັນທາງການ ບາງຕອນສຳຄັນວ່າ: ຂະບວນການຂີ່ລົດຖີບຄັ້ງນີ້ ເປັນໜຶ່ງກິດຈະກໍາ ທີ່ທັງ 3 ປະເທດຮ່ວມກັນຈັດຕັ້ງ ໃນໂອກາດສະເຫຼີມສະຫຼອງຜົນສຳເລັດກອງປະຊຸມສຸດຍອດດັ່ງກ່າວ ເພື່ອເສີມຂະຫຍາຍການພົວພັນຮ່ວມມື ແລະ ຄວາມສາມັກຄີ ລະຫວ່າງ ສາມປະເທດ ກໍຄື ສາມສະພາແຫ່ງຊາດກໍາປູເຈຍ-ລາວ-ຫວຽດນາມ ໃນການຊຸກຍູ້ການພົວພັນ ເພື່ອສັນຕິພາບ, ມິດຕະພາບ ແລະ ການຮ່ວມມື ເພື່ອການພັດທະນາແບບຍືນຍົງ ໃນພາກພື້ນ ແລະ ສາກົນ; ນອກນັ້ນ, ຍັງແນໃສ່ຊຸກຍູ້ ແລະ ເສີມສ້າງຄວາມສາມັກຄີຮັກແພງໃຫ້ແກ່ບັນດາສະມາຊິກສະພາ, ພະນັກງານ-ລັດຖະກອນ ແລະ ໄວໜຸ່ມຂອງ 3 ປະເທດ ໃຫ້ຮັບຮູ້ ແລະ ເຂົ້າໃຈຢ່າງເລິກເຊິ່ງເຖິງປະຫວັດສາດແຫ່ງການພົວພັນຮ່ວມມືທີ່ເປັນມູນເຊື້ອອັນດີງາມທີ່ການນໍາທັງ ສາມປະເທດໄດ້ຮ່ວມກັນສ້າງໄວ້ ເພື່ອໃຫ້ຄົນຮຸ່ນໃໝ່ໄດ້ສືບຕໍ່ຖະໜຸຖະໜອມ ແລະ ເພີິ່ມພູນສາຍພົວພັນດັ່ງກ່າວໃຫ້ຍືນຍົງຕະຫຼອດໄປ.

ຫຼັງຈາກນັ້ນ, ກໍໄດ້ເປີດການແຂ່ງຂັນລົດຖີບ 3 ປະເທດ ກຳປູເຈຍ-ລາວ-ຫວຽດນາມ ໂດຍປະກອບມີ 2 ປະເພດຄື: ປະເພດທີມ ແລະ ປະເພດດ່ຽວ ເຊິ່ງຜົນການແຂ່ງຂັນ ປະເພດດ່ຽວ ທີ 1 ໄດ້ແກ່ປະເທດຫວຽດນາມ ໄດ້ຮັບເງິນສົດ 9 ລ້ານກີບ, ທີ 2 ປະເທດກຳປູເຈຍ ໄດ້ຮັບເງິນສົດ 7ລ້ານກີບ ແລະ ທີ 3 ໄດ້ແກ່ຫວຽດນາມ ໄດ້ຮັບເງິນສົດ 4 ລ້ານກີບ; ສ່ວນປະເພດທີມທີ 1 ໄດ້ແກ່ທີມປະເທດກຳປູເຈຍ ໄດ້ຮັບຂັນທ່ານປະທານສະພາແຫ່ງຊາດ ສປປລາວ, ທີ 2 ໄດ້ແກ່ທີມ ສປປລາວ ໄດ້ຮັບຂັນ 1 ໜ່ວຍ ແລະ ທີ 3 ໄດ້ແກ່ທີມປະເທດຫວຽດນາມ ໄດ້ຮັບຂັນ 1 ໜ່ວຍ.

(ພາບ ແລະ ຂ່າວ: ນາງ ສຸພາວັນ ຫອມສະນິດ)