ສະພາປະຊາຊົນແຂວງສາລະວັນ ພ້ອມດ້ວຍສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງສະໝ້ວຍ ຮ່ວມກັບທະຫານກອງຮ້ອຍ 511 ຈັດພິທີປູກຕົ້ນໄມ້ ອຸດສາຫະກຳ ແລະ ຕົ້ນໄມ້ກິນໝາກ ເນື່ອງໃນໂອກາດວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ທີ 1 ມີຖຸນາ; ໂດຍການເຂົ້າຮ່ວມພິທີປູກຕົ້ນໄມ້ຂອງທ່ານ ສົມພອນ ແສງສຸລິຈັນ ເລຂາທິການ ສະພາປະຊາຊົນແຂວງ ທັງເປັນສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງສະໝ້ວຍ, ທ່ານ ບຸນນານ ປັນຍາຈັກ ຫົວໜ້າຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງສະໝ້ວຍ; ທ່ານ ພັຕ ບຸນມາກ ແສງສັກສິດ ຄະນະພັກ ເລຂາໜ່ວຍພັກຫົວໜ້າການທະຫານກອງຮ້ອຍ 511, ບັນດາທ່ານສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງສະໝ້ວຍ ພ້ອມດ້ວຍນາຍ ແລະ ພົນທະຫານ ພາຍໃນກອງຮ້ອຍ ເຂົ້າຮ່ວມປູກຕົ້ນໄມ້ຢ່າງເປັນຂະບວນຟົດຟື້ນ;

ພິທີຈັດຂຶ້ນໃນຕອນເຊົ້າຂອງວັນທີ 2 ມິຖຸນາ 2023 ຢູ່ທີ່ເດີນທະຫານກອງຮ້ອຍ 511 ເມືອງສະໝ້ວຍ ແຂວງສາລະວັນ, ຊະນິດເບ້ຍໄມ້ທີ່ນຳມາປູກໃນຄັ້ງນີ້ ປະກອບມີ ຕົ້ນເບ້ຍໝາກຂາມ, ຕົ້ນສາມສາ, ຕົ້ນຝາງ ແລະ ໄມ້ຊະນິດອື່ນໆ ລວມທັງໝົດ 400 ກວ່າເບ້ຍ;ຈຸດປະສົງໃນການປູກຕົ້ນໄມ້ ແມ່ນເພື່ອສະເຫຼີມສະຫຼອງວັນປູກຕົ້ນໄມ້ແຫ່ງຊາດ ທີ 1 ມິຖຸນາ ແລະ ທັງເປັນການຟື້ນຟູທົດແທນປ່າໄມ້ທີ່ຖືກທຳລາຍໃນຜ່ານມາ ແລະ ປູກຈິດສຳນຶກໃຫ້ປະຊາຊົນ, ອະນຸຊົນ ແລະ ຄົນຮຸ່ນຫຼັງ ໄດ້ພ້ອມກັນເປັນເຈົ້າການໃນການປູກ ແລະ ປົກປັກຮັກສາປ່າໄມ້ຢ່າງເປັນຂະບວນກວ້າງຂວາງ ຕອບສະໜອງຕາມແນວທາງນະໂຍບາຍຂອງພັກ, ແຜນການປົກປັກຮັກສາປ່າໄມ້ທີ່ລັດຖະບານວາງອອກໃຫ້ປະກົດຜົນເປັນຈິງ, ເປັນຕົ້ນຍົກລະດັບຄວາມປົກຫຸ້ມປ່າໄມ້ໃຫ້ໄດ້ 73% ໃນປີ 2025, ສ້າງໃຫ້ທົ່ວສັງຄົມປົກປັກຮັກສາປ່າໄມ້ເພື່ອເພີ່ມພື້ນທີ່ສີຂຽວ ເພີ່ມເນື້ອທີ່ປ່າໄມ້ ທີ່ມີຄວາມຈຳເປັນຕ້ອງໄດ້ເພີ່ງພາອາໃສ່ສະພາບແວດລ້ອມຈາກທຳມະຊາດ ໂດຍສະເພາະຄວາມອຸດົມສົມບູນຂອງປ່າໄມ້ ພືດພັນຊະນິດຕ່າງໆ ແລະ ປະກອບສ່ວນຢ່າງຕັ້ງໜ້າເຂົ້າໃນການສ້າງສາພັດທະນາປະເທດຊາດ.
ເບ້ຍໄມ້ທີ່ນຳໄປປູກໂດຍໄດ້ຮັບການສະໜັບສະໜູນຈາກພະແນກກະສິກຳ ແລະ ປ່າໄມ້ແຂວງສາລະວັນ.

ພາບ-ຂ່າວ: ດີລຳພົນ ພົມມະຈັນ