ໂອກາດລົງເຄື່ອນໄຫວຕິດຕາມ, ກວດກາ ແລະ ເກັບກຳຂໍ້ມູນວຽກງານບັນດາເຜົ່າ ປະຈຳປີ 2022 ຢູ່ແຂວງຫລວງນໍ້າທາ ຕອນເຊົ້າວັນທີ 23 ສິງຫາ 2022 ທ່ານ ຄໍາຈັນ ໂສຕາປະເສີດ ຄະນະປະຈໍາສະພາແຫ່ງຊາດ ປະທານກໍາມາທິການທິການບັນດາເຜົ່າ ແລະ ທ່ານ ນາງ ເກສອນ ແສງຍະວົງ ສະມາຊິກສະພາແຫ່ງຊາດປະຈຳເຂດເລືອກຕັ້ງ ປະທານຄະນະກຳມະການວັດທະນາທຳ-ສັງຄົມ ແລະ ບັນດາເຜົ່າ ພ້ອມດ້ວຍຄະນະ ໄດ້ລົງພົບປະຢ້ຽມຢາມປະຊາຊົນຢູ່ຫ້ອງການບ້ານຫົວຂົວ ເມືອງຫລວງນ້ຳທາ ພ້ອມດຽວກັນ ໄດ້ຮັບຟັງການລາຍງານສະພາບລວມຂອງບ້ານຫົວຂົວ ເມືອງນ້ຳທາ ເປັນຕົ້ນ ກ່ຽວກັບວຽກງານສາສະໜາ, ການສ້າງອາຊີບວຽກເຮັດງານທຳຂອງພໍ່ແມ່ປະຊາຊົນ ແລະ ການເຂົ້າໂຮງຮຽນຂອງລູກຫລານພາຍໃນບ້ານ ແລະ ຮັບຟັງການຈັດຕັ້ງປະຕິບັດຂອງ 2 ວາລະແຫ່ງຊາດຄື: ການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການແກ້ໄຂບັນຫາສິ່ງເສບຕິດ ຢູ່ພາຍໃນເມືອງຫລວງນ້ຳທາ ແມ່ນເຫັນວ່າ ໄດ້ລົງຈັດຕັ້ງປະຕິບັດຢູ່ບັນດາບ້ານພາຍໃນເມືອງໄດ້ສຳເລັດ; ນອກນັ້ນ ພໍ່ແມ່ປະຊາຊົນບັນດາເຜົ່າພາຍໃນບ້ານ ຍັງໄດ້ສະເໜີບັນຫາທີ່ພົບຄວາມຫຍຸ້ງຍາກພາຍໃນບ້ານ ເພື່ອໃຫ້ສະພາປະຊາຊົນ ສະເໜີຫາພາກສ່ວນທີ່ກ່ຽວຂ້ອງແກ້ໄຂ.

ໃນນີ້ ຍັງໄດ້ຮັບຟັງຄຳເຫັນໂອລົມຂອງທ່ານປະທານກຳມາທິການບັນດາເຜົ່າ ສະພາແຫ່ງຊາດ ທ່ານໄດ້ສະແດງຄວາມຍ້ອງຍໍຊົມເຊີຍຕໍ່ກັບການພັດທະນາຂອງບ້ານ, ເຫັນວ່າມີຄວາມເປັນຢູ່ທີ່ດີ ແລະ ຮຽກຮ້ອງໃຫ້ອຳນາດການປົກຄອງບ້ານຕະຫລອດຮອດພໍ່ແມ່ປະຊາຊົນຈົ່ງພ້ອມກັນສຶກສາອົບຮົມການເມືອງແນວຄິດຂອງລູກຫລານໃຫ້ໄດ້ເຂົ້າໂຮງຮຽນຕາມອາຍຸເກນ, ໃຫ້ຫ່າງໄກສິ່ງເສບຕິດ, ໃຫ້ສາມັກຄີຮັກແພງຊ່ວຍເຫລືອເຊິ່ງກັນ ແລະ ກັນ, ເຖິງວ່າຈະຢູ່ຮ່ວມກັນຫລາຍເຜົ່າກໍ່ໃຫ້ເປັນຈິດໜຶ່ງໃຈດຽວກັນ ພັດທະນາບ້ານໃຫ້ເຂັ້ມແຂງມີຄວາມຈະເລີນຂຶ້ນກວ່າເກົ່າ ແລະ ຕໍ່ບັນຫາທີ່ພົບຄວາມຫຍຸ້ງຍາກດັ່ງກ່າວແມ່ນຈະສະເໜີໃຫ້ພາກສ່ວນທີ່ກ່ຽວຂ້ອງແກ້ໄຂ ແລະ ໂອກາດນີ້ ທ່ານ ຄໍາຈັນ ໂສຕາປະເສີດ ຄະນະປະຈໍາສະພາແຫ່ງຊາດ ປະທານກໍາມາທິການທິການບັນດາເຜົ່າ ຍັງໄດ້ນຳເອົາເຄື່ອງນຸ່ງຫົ່ມຈຳນວນໜຶ່ງລົງມອບໃຫ້ພໍ່ແມ່ປະຊາຊົນບ້ານຫົວຂົວທີ່ທຸກຍາກຂາດເຂີນພາຍໃນບ້ານ.