(ສພຊ) ເພື່ອເປັນການສືບຕໍ່ ປຶກສາຫາລື ສອງເນື້ອໃນວຽກງານທີ່ສໍາຄັນຄື: ວຽກການຕິດຕາມກວດກາ ການປະເມີນຜົນການຈັດຕັ້ງປະຕິບັດກົດໝາຍຂົງເຂດຍຸຕິທຳ 4 ສະບັບ ເຊິ່ງຈະໄດ້ຮັບຟັງການລາຍງານຄືນຄວາມຄືບໜ້າ ກ່ຽວກັບການກະກຽມຄວາມພ້ອມ ໃນການປະເມີນຜົນການຈັດຕັ້ງປະຕິບັດກົດໝາຍຂອງ ສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ; ວຽກການກະກຽມຄວາມພ້ອມໃຫ້ແກ່ການຈັດກອງປະຊຸມເຜີຍແຜ່ຄໍາແນະນໍາ ວ່າດ້ວຍ ການຕິດຕາມກວດກາ ການປະເມີນຜົນການຈັດຕັ້ງປະຕິບັດກົດໝາຍຂົງເຂດຍຸຕິທຳ 4 ສະບັບ (ຮູບແບບອອນລາຍທົ່ວປະເທດ) ແລະ ແຈ້ງຜົນການຕົກລົງຂອງກອງປະຊຸມ ຄະນະປະຈໍາສະພາແຫ່ງຊາດ ໃນຄັ້ງວັນທີ 1 ມີນາ 2023 ກ່ຽວກັບການຄົ້ນຄວ້າພິຈາລະນາ ຂໍ້ຕົກລົງຮ່ວມ ວ່າດ້ວຍການປະສານງານ ລະຫວ່າງ ກໍາມາທິການຍຸຕິທໍາ ກັບ ສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ໄດ້ຮັບຊາບ. ໃນວັນທີ 21 ມີນາ 2023 ທີ່ສະພາແຫ່ງຊາດ ກໍາມາທິການຍຸຕິທໍາ ສະພາແຫ່ງຊາດ ໄດ້ຈັດກອງປະຊຸມ ປຶກສາຫາລື ກ່ຽວກັບວຽກງານຕິດຕາມກວດກາການປະເມີນຜົນການຈັດຕັ້ງປະຕິບັດກົດໝາຍຂົງເຂດຍຸຕິທໍາ ແລະ ນິຕິກໍາຮ່ວມ ວ່າດ້ວຍການປະສານງານ ລະຫວ່າງ ກໍາມາທິການຍຸຕິທໍາ ກັບ ສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ໂດຍການເປັນປະທານຂອງທ່ານ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງຊາດ, ປະທານກໍາມາທິການກົດໝາຍ, ຜູ້ຊີ້ນໍາວຽກງານກໍາມາທິການຍຸຕິທໍາ; ມີບັນດາທ່ານ ປະທານ-ຮອງປະທານກໍາມາທິການຍຸຕິທໍາ, ຮອງປະທານສານປະຊາຊົນສູງສຸດ, ຮອງຫົວໜ້າອົງການໄອຍະການປະຊາຊົນສູງສຸດ, ຫົວໜ້າ-ຮອງຫົວໜ້າກົມ ແລະ ວິຊາການພາຍໃນກໍາມາທິການຍຸຕິທໍາ ແລະ ແຂກທີ່ຖືກເຊີນເຂົ້າຮ່ວມ.

ກອງປະຊຸມ ໄດ້ຮັບຟັງການລາຍງານ ກ່ຽວກັບການກະກຽມຄວາມພ້ອມໃນດ້ານຕ່າງໆ ຂອງການຕິດຕາມກວດກາ ການປະເມີນຜົນການຈັດຕັ້ງປະຕິບັດກົດໝາຍ ຈາກທ່ານຫົວໜ້າກົມຕິດຕາມກວດກາວຽກງານຍຸຕິທໍາ; ລາຍງານຄວາມຄືບໜ້າການປະເມີນກົດໝາຍວ່າດ້ວຍສານປະຊາຊົນ ແລະ ກົດໝາຍວ່າດ້ວຍການດໍາເນີນຄະດີແພ່ງ ຈາກຮອງປະທານສານປະຊາຊົນສູງສຸດ; ລາຍງານຄວາມຄືບໜ້າການປະເມີນກົດໝາຍວ່າດ້ວຍອົງການໄອຍະການປະຊາຊົນ ແລະ ກົດໝາຍວ່າດ້ວຍການດໍາເນີນຄະດີອາຍາ ຈາກທ່ານຮອງຫົວໜ້າອົງການໄອຍະການປະຊາຊົນສູງສຸດ ແລະ ລາຍງານກ່ຽວກັບຜົນການຕົກລົງຂອງກອງປະຊຸມ ຄະນະປະຈໍາສະພາແຫ່ງຊາດ ກ່ຽວກັບການພິຈາລະນາຕົກລົງ ຕໍ່ຮ່າງຂໍ້ຕົກລົງວ່າດ້ວຍ ການປະສານງານ ລະຫວ່າງ ກໍາມາທິການຍຸຕິທໍາ ກັບ ສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ຈາກທ່ານປະທານກໍາມາທິການຍຸຕິທໍາສະພາແຫ່ງຊາດ ຈາກນັ້ນ, ຜູ້ເຂົ້າຮ່ວມກອງປະຊຸມ ກໍໄດ້ຜັດປ່ຽນກັນປຶກສາຫາລື ແລກປ່ຽນຄໍາຄິດຄໍາເຫັນໃສ່ບົດລາຍງານດັ່ງກ່າວ ເພື່ອຖອດຖອນບົດຮຽນ ເຊິ່ງກັນ ແລະ ກັນ.

(ພາບ ແລະ ຂ່າວ: ສອນສັກ ວັນວິໄຊ)