(ສພຊ) ລະຫວ່າງວັນທີ 4-6 ກັນຍາ 2022 ກໍາມາທິການການຕ່າງປະເທດ ສະພາແຫ່ງຊາດ ນໍາໂດຍ ທ່ານ ສັນຍາ ປຣະເສີດ ກໍາມະການຄະນະປະຈໍາສະພາແຫ່ງຊາດ, ປະທານກໍາມາທິການການຕ່າງປະເທດ ພ້ອມດ້ວຍຄະນະ ໄດ້ຮ່ວມກັບສະພາປະຊາຊົນແຂວງບໍລິຄໍາໄຊ ລົງຕິດຕາມກວດກາການຈັດຕັ້ງປະຕິບັດ ລັດຖະທໍາມະນູນ ແລະ ກົດໝາຍ ໃນຂົງເຂດວຽກງານການຕ່າງປະເທດ ຢູ່ແຂວງບໍລິຄຳໄຊ. ຈຸດປະສົງຂອງການເຄື່ອນໄຫວຄັ້ງນີ້ ແມ່ນເພື່ອຕິດຕາມກວດກາການຈັດຕັ້ງປະຕິບັດ ລັດຖະທໍາມະນູນ ແລະ ກົດໝາຍໃນຂົງເຂດວຽກງານການຕ່າງປະເທດ ກໍຄືການຕິດຕາມການຈັດຕັ້ງປະຕິບັດ ບັນດາສົນທິສັນຍາ ແລະ ສັນຍາສາກົນ ທີ່ ສປປລາວ ເປັນພາຄີ ເປັນຕົ້ນ ບັນຫາການຄ້າມະນຸດ, ບັນຫາການດູດຫີນ-ດູດຊາຍທີ່ສົ່ງຜົນກະທົບຕໍ່ແລວຊາຍແດນຂອງປະເທດເຮົາຢູ່ຕາມລໍາແມ່ນໍ້າຂອງ ຕິດຕາມກວດກາວຽກງານຊາຍແດນ ບັນຫາຕາຝັ່ງເຈື່ອນ, ການຄຸ້ມຄອງດ່ານສາກົນ, ການຄຸ້ມຄອງຫຼັກໝາຍຊາຍແດນແຫ່ງຊາດ, ການຄຸ້ມຄອງຄົນເຂົ້າ-ອອກເມືອງ, ການຄ້າຢາເສບຕິດ, ບັນຫາການຄ້າຂາຍເຖື່ອນຕາມບໍລິເວນຊາຍແດນ, ການເກັບລາຍຮັບຂອງດ່ານສາກົນ ພ້ອມທັງຊຸກຍູ້ການຕິດຕາມກວດກາການຈັດຕັ້ງປະຕິບັດ ແລະ ຄຸ້ມຄອງໂຄງການຊ່ວຍເຫຼືອລ້າ (ODA), ການລົງທຶນຂອງຕ່າງປະເທດ, ອົງການທີ່ບໍ່ແມ່ນລັດຖະບານ (NGOs), ອົງການຈັດຕັ້ງທາງສັງຄົມຂອງຕ່າງປະເທດ (CSO) ແລະ ອື່ນໆ ຢູ່ ສປປລາວ; ພ້ອມທັງເກັບກໍາບັນຫາທີ່ພົ້ນເດັ່ນກ່ຽວກັບວຽກງານຂົງເຂດການຕ່າງປະເທດຢູ່ທ້ອງຖິ່ນ ເພື່ອລາຍງານຕໍ່ຄະນະປະຈໍາສະພາແຫ່ງຊາດ.

ໃນໂອກາດດັ່ງກ່າວ, ຄະນະ ໄດ້ເຂົ້າຢ້ຽມຂໍ່ານັບການນໍາຂອງອໍານາດການປົກຄອງແຂວງ, ເຮັດວຽກກັບສະພາປະຊາຊົນແຂວງ, ຮັບຟັງການລາຍງານຫຍໍ້ຈາກບັນດາພະແນກການຕ່າງໆອ້ອມຂ້າງແຂວງ ກ່ຽວກັບວຽກງານການຕ່າງປະເທດ. ພ້ອມດຽວກັນນັ້ນ, ປະທານກໍາມາທິການການຕ່າງປະເທດ ກໍໄດ້ເນັ້ນໃຫ້ເອົາໃຈໃສ່ຕື່ມບາງບັນຫາເຊັ່ນ: ຄວາມສອດຄ່ອງລະຫວ່າງບັນດາກົດໝາຍ ແລະ ນິຕິກໍາໃຕ້ກົດໝາຍໃນການປະຕິບັດວຽກງານໃນຂົງເຂດຕ່າງປະເທດ, ການຄຸ້ມຄອງຫຼັກໝາຍຊາຍແດນແຫ່ງຊາດ, ບັນຫາການດູດຫີນ-ດູດຊາຍ ທີ່ສົ່ງຜົນກະທົບຕໍ່ແລວຊາຍແດນຂອງປະເທດ ຢູ່ຕາມລໍາແມ່ນໍ້າຂອງ, ການຄຸ້ມຄອງໂຄງການຊ່ວຍເຫຼືອລ້າ ແລະ ການຄຸ້ມຄອງຄົນເຂົ້າ-ອອກເມືອງ, ການຄຸ້ມຄອງຄົນຕ່າງດ້າວ ແລະ ແຮງງານຕ່າງປະເທດ, ການເກັບລາຍຮັບຂອງດ່ານສາກົນ ແລະ ການແກ້ໄຂບັນຫາຕາຝັ່ງເຈື່ອນ ເຊິ່ງໄດ້ສ້າງຜົນເສຍຫາຍໃຫ້ແກ່ການຜະລິດ ແລະ ຊີວິດການເປັນຢູ່ຂອງປະຊາຊົນບໍ່ໜ້ອຍ. ຈາກນັ້ນ, ຄະນະ ຍັງໄດ້ລົງເຄື່ອນໄຫວເຮັດວຽກເບິ່ງຄວາມຄືບໜ້າໂຄງການກໍ່ສ້າງ ຂົວມິດຕະພາບລາວ-ໄທ ແຫ່ງທີ 5 ແຂວງບໍລິຄໍາໄຊ ສປປລາວ-ຈັງຫວັດ ບຶງການ ຣາຊະອານາຈັກໄທ, ເຮັດວຽກຮ່ວມກັບຄະນະຄຸ້ມຄອງດ່ານສາກົນ ປາກຊັນ-ບຶງການ ແລະ ຕິດຕາມເບິ່ງສະພາບຕາຝັ່ງເຈື່ອນຢູ່ຕາມແຄມແມ່ນໍ້າຂອງເຂດ ເມືອງປາກຊັນ ແຂວງບໍລິຄໍາໄຊ.