ຕອນບ່າຍຂອງວັນອັງຄານ, ວັນທີ 4 ຕຸລາ 2022, ທີ່ຫ້ອງປະຊຸມສະພາປະຊາຊົນແຂວງ ໄດ້ດໍາເນີນຊີວິດປະຈໍາເດືອນ 8-9 ປີ 2022 ຂອງກໍາມະບານຮາກຖານສະພາປະຊາຊົນແຂວງ, ໂດຍການເປັນປະທານຂອງສະຫາຍ ນ. ຄໍາພອນ ພິມມະຈັນ ຄະນະບໍລິຫານງານສະຫະພັນກໍາມະບານແຂວງ, ປະທານສະຫະພັນກໍາມະບານຮາກຖານ ສພຂ, ໂດຍການເຂົ້າຮ່ວມຂອງສະຫາຍ ຄໍາດີ ວົງລ້ອມ ຮອງເລຂາພັກແຂວງ, ປະທານສະພາປະຊາຊົນແຂວງ, ມີຄະນະກໍາມະບານ, ບັນດາສະຫາຍສະມາຊິກກໍາມະບານພາຍໃນ ສພຂ ເຂົ້າຮ່ວມ.

ການດໍາເນີນຊີວິດຄັ້ງນີ້, ໄດ້ຮັບຟັງການຜ່ານຮ່າງບົດສະຫຼຸບຕີລາຄາການເຄື່ອນໄຫວວຽກງານປະຈໍາເດືອນ 8-9 ປີ 2022 ຂອງກໍາມະບານຮາກຖານສະພາປະຊາຊົນແຂວງ, ເຊິ່ງຕະຫຼອດໄລຍະ 2 ເດືອນຜ່ານມາ ກໍາມະບານຮາກຖານ ສພຂ ໄດ້ຖືເອົາການສຶກສາອົບຮົມດ້ານການເມືອງ-ແນວຄິດເປັນບັນຫາກົກ ເພື່ອເຮັດໃຫ້ສະມາຊິກກຳມະ ບານມີແນວຄິດອຸ່ນອ່ຽນທຸ່ນທ່ຽງ, ມີຄວາມສາມັກຄີພາຍໃນ-ພາຍນອກໃຫ້ແໜ້ນແຟ້ນ, ຊ່ວຍເຫຼືອເຊິ່ງກັນ ແລະ ກັນ, ມີຄວາມຫ້າວຫັນປະຕິບັດໜ້າທີວຽກງານວິຊາສະເພາະສຳເລັດຜົນຕາມລະດັບຄາດໝາຍ ແລະ ໄດ້ຮັບຟັງການຜ່ານຮ່າງກົດລະບຽບວ່າດ້ວຍ ກອງທຶນພັດທະນາ 3 ອົງການຈັດຕັ້ງມະຫາຊົນສະພາປະຊາຊົນແຂວງອຸດົມໄຊ. ຫລັງຈາກນັ້ນບັນດາທ່ານສະມາຊິກກຳມະບານ ໄດ້ປະກອບຄໍາຄິດຄໍາເຫັນຢ່າງກົງໄປກົງມາ.

ຕອນທ້າຍ, ປະທານສະຫະພັນກໍາມະບານຮາກຖານ ສພຂ ໄດ້ສະຫຼຸບສັງລວມບັນຫາຕ່າງໆ ພ້ອມທັງມີຄໍາເຫັນຕໍ່ສະມາຊິກກໍາມະບານ, ຊຶ່ງສະຫາຍໄດ້ເນັ້ນໜັກໃຫ້ແຕ່ລະສະຫາຍສະມາຊິກກຳມະບານ ຈົ່ງເພີ່ມທະວີໃນການເຊື່ອມຊຶມບັນດານິຕິກໍາ, ມີແນວຄິດຫຼັກໝັ້ນ, ອຸ່ນອ່ຽນທຸ່ນທ່ຽງ, ເຊື່ອໝັ້ນຕໍ່ແນວທາງຂອງພັກ-ລັດ, ເຊື່ອໝັ້ນຕໍ່ການນໍາພາຂອງກົມກອງ, ເພີ່ມທະວີຄວາມສາມັກຄີພາຍໃນເປັນຈິດໜຶ່ງໃຈດຽວ, ເອົາໃຈໃສ່ຕໍ່ວຽກງານວິຊາສະເພາະທີ່ຕົນຮັບຜິດຊອບ ໃຫ້ມີຜົນສໍາເລັດ.

ພາບ/ຂ່າວ: ແສງພອນ ອິນນະລົງ.