(ສພຊ) ໃນຕອນເຊົ້າວັນທີ 6 ກຸມພາ 2023 ທີ່ສະພາແຫ່ງຊາດ ນະຄອນຫຼວງວຽງຈັນ, ສະຫະພັນກໍາມະບານສະພາແຫ່ງຊາດ ໄດ້ດໍາເນີນກອງປະຊຸມ ເພື່ອປຶກສາຫາລື ແລກປ່ຽນຄໍາເຫັນ ກ່ຽວກັບວຽກງານກວດກາ ໂດຍການເປັນປະທານຂອງສະຫາຍ ນາງ ຫວັນໄຊ ຈັນທະລາ ຮອງປະທານສະຫະພັນກໍາມະບານສະພາແຫ່ງຊາດ, ປະທານກວດກາ ສະຫະພັນກໍາມະບານ ສະພາແຫ່ງຊາດ, ມີປະທານກວດກາ, ຜູ້ຊ່ວຍວຽກກວດກາ ຈາກບັນດາກໍາມະບານຮາກຖານ, ຜູ້ຊ່ວຍວຽກກວດກາ ຈາກບັນດາໜ່ວຍກໍາມະບານທີ່ຂຶ້ນກັບກໍາມະບານຮາກຖານຄະນະເລຂາທິການເຂົ້າຮ່ວມຢ່າງພ້ອມພຽງ.

ກອງປະຊຸມ ໄດ້ຮັບຟັງການສະຫຼຸບຕີລາຄາ ການເຄື່ອນໄຫວວຽກງານຜ່ານມາ ແລະ ວາງທິດທາງ ແຜນການເຄື່ອນໄຫວໃນຕໍ່ໜ້າ. ພ້ອມນັ້ນ, ກອງປະຊຸມ ກໍໄດ້ເປັນເອກະພາບກັນ ຕໍ່ທິດທາງວຽກງານກວດກາ ຈຳນວນໜຶ່ງ ທີ່ຈະສືບຕໍ່ເຄື່ອນໄຫວໃນຕໍ່ໜ້າ, ແນໃສ່ໃຫ້ປະທານກວດກາ ແລະ ຜູ້ຊ່ວຍວຽກກວດກາກໍາມະບານຮາກຖານ ພາຍໃນສະພາແຫ່ງຊາດ ໃນການປະຕິບັດວຽກງານໃຫ້ມີຄວາມເຂັ້ມແຂງ, ສາມາດເປັນແບບຢ່າງທີ່ດີ ແລະ ເພີ່ມທະວີຄວາມເປັນເຈົ້າການ ໃນການກວດກາສະມາຊິກກຳມະບານ ຢູ່ພາຍໃນຮາກຖານຂອງຕົນ ໃນການປະຕິບັດວຽກງານ ຕິດພັນກັບການ ເຄື່ອນໄຫວວຽກງານວິຊາສະເພາະ ຕາມຂອບເຂດຄວາມຮັບຜິດຊອບຂອງສະມາຊິກກຳມະບານ ໂດຍຊອກໃຫ້ເຫັນດ້ານດີ ເພື່ອເສີມຂະຫຍາຍ ແລະ ຊອກຫາ ຈຸດອ່ອນ ຂໍ້ຄົງຄ້າງ ເພື່ອປັບປຸງ ແກ້ໄຂໃຫ້ທັນສະພາບການນັ້ນ, ທ່ານ ປະທານກອງປະຊຸມ ໄດ້ມີຄໍາຖາມເຈາະຈີ້ມ ຕໍ່ເນື້ອໃນຜົນງານການເຄື່ອນໄຫວວຽກງານກວດກາ ໃນໄລຍະຜ່ານມາ, ຫຼັງຈາກນັ້ນ ປະທານກວດກາ ແຕ່ລະຮາກຖານ ໄດ້ພ້ອມກັນປະກອບຄໍາເຫັນ ຕາມການເຈາະຈີ້ມຂອງ ປະທານກອງປະຊຸມ ຢ່າງມີເຫດມີຜົນ ແລະ ກົງໄປກົງມາ, ທຸກຄຳເຫັນ ລ້ວນແຕ່ແນໃສ່ ໃນການປົກປ້ອງ ສິດ, ຜົນປະໂຫຍດອັນຊອບທໍາ ຂອງ ສະມາຊິກກຳມະບານ ພາຍໃນສະພາແຫ່ງຊາດ ໃຫ້ນັບມື້ນັບດີຂຶ້ນ.