ວັນທີ 6 ພືດສະພາ 2024 ທີ່ຫໍປະຊຸມ ຫ້ອງວ່າການເມືອງ ເມືອງເງິນ ແຂວງໄຊຍະບູລີ. ທາງຄະນະກໍາມາ ທິການເສດຖະກິດ,ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ນຳໂດຍ ທ່ານ ມະນີໂສ ຊາມຸນຕີ ຮອງປະທານກຳມາທິການເສດຖະກິດ,ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ພ້ອມດ້ວຍຄະນະ ແລະ ທ່ານ ເພັງນິລັນ ຄຳພັນເພັງ ປະທານສະພາປະຊາຊົນແຂວງໄຊຍະບູລີ. ລົງມາເຄື່ອນໄຫວ ວຽກງານ, ຕິດຕາມ, ກວດກາຊຸກຍູ້ ການນຳເຂົ້າສົ່ງອອກ ນ້ຳມັນເຊື້ອໄຟ ແລະ ສິນຄ້າ ຢູ່ເມືອງເງິນ ,ມີຄະນະນຳຂອງເມືອງ, ສະມາຊິກສະພາປະຊາຊົນແຂວງ ປະຈຳເມືອງ, ຄະນະຄຸ້ມຄອງດ່ານສາກົນນ້ຳເງິນ, ບັນດາບໍລິສັດ ນັກທຸລະກິດ ຜູ້ປະກອບການ ເຂົ້້າຮ່ວມ

ການລົງມາເຄື່ອນໄຫວ ວຽກງານ, ຕິດຕາມ, ກວດກາຊຸກຍູ້ ການນຳເຂົ້າສົ່ງອອກ ນ້ຳມັນເຊື້ອໄຟ ແລະ ສິນຄ້າ ຢູ່ເມືອງເງິນໃນຄັ້ງນີ້ , ຄະນະກໍາມາ ທິການເສດຖະກິດ,ເຕັກໂນໂລຊີ ແລະ ສີ່ງແວດລ້ອມ ສະພາແຫ່ງຊາດ ໄດ້ຮັບຟັງການລາຍງານ ການຈັດຕັ້ງປະຕິບັດແຜນພັດທະນາ ເສດຖະກິດຂອງເມືອງໂດຍສັງເຂບ, ລາຍງານສະພາບລວມການຄຸ້ມຄອງການນຳເຂົ້ານ້ຳມັນເຊື້ອໄຟ ແລະ ການຄ້າຊາຍແດນ ຢູ່ດ່ານສາກົນນ້ຳເງິນ. ແລະໄດ້ຮັບຟັງການລາຍງານການເຄື່ອນໄຫວວຽກງານຮອບດ້ານ ດ່ານພາສີສາກົນນ້ຳເງິນ ໄລຍະ 4 ເດືອນຕົ້ນປີ 2024(ມັງກອນ- ເມສາ 2024). ຍ້ອນໄດ້ຮັບການນໍາພາ-ຊີ້ນຳຈາກຄະນະພັກກົມພາສີ,ຄະນະນຳພາສີປະຈຳແຂວງ ແລະ ອໍານາດການປົກຄອງທ້ອງຖີ່ນ ແລະ ຄວາມເອົາໃຈໃສ່ຢ່າງຕັ້ງໜ້າຂອງຄະນະດ່ານ ແລະ ພະນັກງານວິຊາການທຸກຄົນ ພ້ອມກັນສູ້ຊົນຜ່ານຜ່າອຸປະສັກ ຈຶ່ງເຮັດໃຫ້ການຈັດຕັ້ງປະຕິບັດວຽກງານຕ່າງໆ ສໍາເລັດໃນລະດັບທີ່ດີສົມຄວນ. ສະແດງອອກ ການຈັດເກັບລາຍຮັບ.ແຜນການເກັບລາຍຮັບປີ 2024 ເທົ່າກັບ 703,000,000,000 ກີບ, ຈັດເກັບແຕ່ຕົ້ນປີຮອດ ທ້າຍເດືອນ ເມສາ 2024 ປະຕິບັດໄດ້ 226,080,459,940 ກີບ, ເທົ່າກັບ 32.16% ຂອງແຜນການປີ. ແຜນການ 4 ເດືອນ ປີ 2024 ເທົ່າກັບ 228,475,000,000 ກີບ, ຈັດເກັບແຕ່ວັນທີ ເດືອນ1-4 ປີ 2024 ປະຕິບັດໄດ້ 226,080,459,940 ກີບ, ເທົ່າກັບ 98,95% ຂອງແຜນການ 4 ເດືອນ. ທຽບໃສ່ ໄລຍະດຽວກັນຂອງ 4 ເດືອນ ປີ 2023 ຈັດເກັບໄດ້ 163,187,583,590 ກີບ, ເທົ່າກັບ138.54% ເພີ່ມຂຶ້ນ 38.54% ເປັນເງິນ 62,892,876,350 ກີບ. ສະພາບການຈັດຕັ້ງປະຕິບັດກ່ຽວກັບການຄ້າຊາຍແດນ ຫຼື ການນຳເຂົ້າ – ສົ່ງອອກສິນຄ້າ ຜ່ານດ່ານສາກົນນໍ້າເງິນໂດຍລວມການນຳເຂົ້າສິນຄ້າແມ່ນຫຼາຍກວ່າການສົ່ງອອກ ສ່ວນຫຼາຍແມ່ນນໍາເຂົ້ານໍ້າມັນເຊື້ອໄຟ, ໄລຍະ 4 ເດືອນຕົ້ນປີ 2024 ຜ່ານມາ ການນຳເຂົ້ານ້ຳມັນເຊື້ອໄຟ ມີ 2 ປະເພດ ຄື:ນ້ຳມັນກະຊວນ ແລະ ນໍ້າມັນແອັດຊັງ, ມີບໍລິມາດ 67.297.784 ລິດ, ໃນນີ້ ນໍ້າມັນກະຊວນ 54.792.827 ລິດ, ນ້ຳມັນ ແອັດຊັງ 12.376.957 ລິດ, ສາມາດ ຈັດເກັບລາຍຮັບພາສີ-ອາກອນ ຈາກການນຳເຂົ້ານ້ຳມັນ ເຊື້ອໄຟ, ນໍ້າມັນຫຼໍ່ລື້ນໄດ້ທັງໝົດ 181,603,160,100 ກີບ, ບໍລິສັດ ນໍາເຂົ້າ ນ້ຳມັນເຊື້ອໄຟ ພາຍໃນດ່ານພາສີສາກົນນ້ຳເງິນມີຈຳນວນ: 6 ບໍລິສັດຄື: ບໍລິສັດ ປີໂຕຣເທຣດ ນຳເຂົ້າ-ສົ່ງອອກ ຈຳກັດ. ບໍລິສັດ ທີທີພາວເວີ ໂຕໂທ ຈຳກັດຜູ້ດຽວ. ລັດວິສາຫະກິດ ນ້ຳມັນເຊື້ອໄຟລາວ, ບໍລິສັດ ສົມວັນຈະເລີນ ເປໂຕລ້ຽມເຈວລີ ຈຳກັດ. ບໍລິສັດ ນຂ-ສອ ນໍ້າມັນເຊື້ອໄຟເອເຊຍ ຈຳກັດ. ບໍລິສັດ ພັນທະມິດລາວ ປີໂຕຣລຽມຈຳກັດ.

ຈາກນັ້ນ ກຳມາທິການເສດຖະກິດ,ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ພ້ອມດ້ວຍຄະນະໄດ້ລົງຢຽມຢາມ ສາງນ້ຳມັນຂອງບໍລິສັດ ທີທີພາວເວີ ໂຕໂທ ຈຳກັດຜູ້ດຽວ ອີກດ້ວຍ.