(ສພຊ) ເພື່ອຮັບປະກັນໃຫ້ແກ່ການຈັດຕັ້ງປະຕິບັດກົດໝາຍວ່າດ້ວຍການແກ້ໄຂຄຳຮ້ອງທຸກ ໄດ້ຮັບການຈັດຕັ້ງປະຕິບັດເປັນເອກະພາບກັນໃນທົ່ວປະເທດ ແລະ ສ້າງຄວາມຮັບຮູ້, ເຂົ້າໃຈ ໃຫ້ແກ່ທ້ອງຖິ່ນຮາກຖານ, ພະນັກງານ-ລັດຖະກອນ ແລະ ປະຊາຊົນລາວບັນດາເຜົ່າ ຕໍ່ເນື້ອໃນກົດໝາຍ ແນໃສ່ເຮັດໃຫ້ທຸກພາກສ່ວນທີ່ກ່ຽວຂ້ອງ ສາມາດປະຕິບັດພາລະບົດບາດ ຕາມຂອບເຂດສິດ ແລະ ໜ້າທີ່ຂອງຕົນໄດ້ເປັນຢ່າງດີ. ພິທີເຜີຍແຜ່ດັ່ງກ່າວ ໄດ້ຈັດຂຶ້ນໃນວັນທີ 23 ສິງຫາ 2023 ທີ່ຫ້ອງວ່າການປົກຄອງແຂວງອຸດົມໄຊ ໂດຍການເປັນປະທານຮ່ວມຂອງທ່ານ ຄຳແພງ ວິລະພັນ ປະທານກຳມາທິການຍຸຕິທຳ ສະພາແຫ່ງຊາດ ແລະ ທ່ານ ຄຳດີ ວົງລ້ອມ ປະທານສະພາປະຊາຊົນແຂວງອຸດົມໄຊ; ມີບັນດາທ່ານສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງ, ຄະນະນຳຂອງແຂວງ, ຄະນະນຳຂອງເມືອງ, ພະແນກການອ້ອມຂ້າງແຂວງ ແລະ ພະນັກງານກ່ຽວຂ້ອງເຂົ້າຮ່ວມ.

ໂອກາດດັ່ງກ່າວ ທ່ານ ຄໍາແພງ ວິລະພັນ ຍັງໄດ້ໃຫ້ຮູ້ວ່າ: ກົດໝາຍວ່າດ້ວຍການແກ້ໄຂຄຳຮ້ອງທຸກ ສ້າງຂຶ້ນ ແລະ ຖືກປະກາດໃຊ້ໃນປີ 2005 ແລະ ໄດ້ຮັບການປັບປຸງມາແລ້ວ 3 ຄັ້ງຄື: ຄັ້ງທີ 1 ປັບປຸງປີ 2014, ປີ 2016 ແລະ ສະບັບລ່າສຸດ ປີ 2022 ເຊິ່ງການປັບປຸງແຕ່ລະຄັ້ງ ເພື່ອແນໃສ່ເຮັດໃຫ້ວຽກງານແກ້ໄຂຄຳຮ້ອງທຸກມີຄວາມໂລ່ງລ່ຽນ, ສອດຄ່ອງຕາມພາລະບົດບາດ, ສິດ ແລະ ໜ້າທີ່ ຂອງແຕ່ລະອົງການ, ຮັບປະກັນການບໍລິການຮັບໃຊ້ປະຊາຊົນໃຫ້ມີຄວາມວ່ອງໄວ ແລະ ສາມາດປົກປ້ອງສິດ ແລະ ຜົນປະໂຫຍດອັນຊອບທຳຂອງປະຊາຊົນລາວບັນດາເຜົ່າຕາມກົດໝາຍ, ສະນັ້ນ, ຍ້ອນເຫັນໄດ້ຄວາມສຳຄັນຂອງກົດໝາຍດັ່ງກ່າວ ຈຶ່ງຈຳເປັນຕ້ອງມີການເຜີຍແຜ່ກົດໝາຍສະບັບນີ້ ໃຫ້ກັບ ຄະນະນຳຂອງແຂວງ, ເມືອງ ແລະ ພໍ່ແມ່ປະຊາຊົນບັນດາເຜົ່າໃນຂອບເຂດທົ່ວປະເທດ ໃຫ້ຮັບຮູ້ ແລະ ເຂົ້າໃຈເນື້ອໃນຄວາມເປັນເອກະພາບກັນໃນການນຳໃຊ້ ແລະ ການຈັດຕັ້ງປະຕິບັດກົດໝາຍສະບັບນີ້ໃຫ້ເຂັ້ມງວດ.

ໃນວັນດຽວກັນ, ຍັງມີຄະນະທ່ານ ຈັນທະລາ ອຸດົມສຸກ ກຳມະການປະຈຳກຳມາທິການຍຸຕິທຳ ໄດ້ລົງເຄື່ອນໄຫວເຜີຍແຜ່ກົດໝາຍວ່າດ້ວຍການແກ້ໄຂຄໍາຮ້ອງຂໍຄວາມເປັນທຳ ຢູ່ສະໂມສອນເມືອງແບງ ອີກດ້ວຍ.

(ພາບ ແລະ ຂ່າວ: ນາງ ກຸກກິກ ບຸດດາໄຊ)