ຕອນເຊົ້າຂອງວັນທີ 18 ພຶດສະພາ 2023 ນີ້, ທ່ານ ຄຳແພງ ວິລະພັນ ກຳມະການຄະນະປະຈໍາສະພາແຫ່ງຊາດ ປະທານກຳມາທິການຍຸຕິທຳ ສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວວຽກຕິດຕາມ-ກວດກາ ການປະເມີນການຈັດຕັ້ງປະຕິບັດກົດໝາຍ ຂົງເຂດຍຸຕິທຳ 4 ສະບັບ ຢູ່ທີ່ແຂວງສາລະວັນ; ໂດຍການຕ້ອນຮັບ ແລະ ເຂົ້າຮ່ວມຂອງທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດ ເຂດເລືອກຕັ້ງ 14 ປະທານສະພາປະຊາຊົນແຂວງສາລະວັນ; ເຂົ້າຮ່ວມມີຄະນະປະຈໍາ ສະພາປະຊາຊົນແຂວງ, ປະທານ-ຮອງປະທານຄະນະກຳມະການຍຸຕິທຳ ແລະ ປກຊ-ປກສ, ຄະນະເລຂາທິການ, ບັນດາທ່ານສະມາຊິກສະພາປະຊາຊົນແຂວງ, ພ້ອມດ້ວຍແຂກທີ່ຖືກເຊີນຈາກສານປະຊາຊົນແຂວງ, ອົງການໄອຍະການປະຊາຊົນແຂວງ, ກອງບັນຊາການປ້ອງກັນຄວາມສະຫງົບແຂວງ, ກອງບັນຊາການທະຫານແຂວງ, ພະແນກຍຸຕິທຳ, ສະພາທະນາຍຄວາມ ແລະ ພາກສ່ວນອື່ນທີ່ກ່ຽວຂ້ອງ ເຂົ້າຮ່ວມຢູ່ທີ່ຫ້ອງປະຊຸມສະພາປະຊາຊົນແຂວງ;

ທ່ານ ຄຳແພງ ວິລະພັນ ກຳມະການຄະນະປະຈໍາສະພາແຫ່ງຊາດ ປະທານກຳມາທິການຍຸຕິທຳ ສະພາແຫ່ງຊາດ ໄດ້ໃຫ້ຮູ້ຈຸດປະສົງຂອງກອງປະຊຸມໃນຄັ້ງນີ້ວ່າ: ການຕິດຕາມກວດກາ ການປະເມີນການຈັດຕັ້ງປະຕິບັດກົດໝາຍ ເປັນວຽກໜຶ່ງທີ່ມີຄວາມໝາຍສຳຄັນ ຂອງສະພາແຫ່ງຊາດ ແລະ ຈຳເປັນໃນຂະບວນການສ້າງ, ປັບປຸງ ແກ້ໄຂບັນຫາທີ່ບໍ່ທັນສອດຄ່ອງກັບສະພາບການພັດທະນາໃນແຕ່ລະໄລຍະ, ຄວາມບໍ່ສອດຄ່ອງຂອງນິຕິກຳທີ່ເປັນຊ່ອງວ່າງເຊິ່ງພາໃຫ້ມີຜົນກະທົບ ຫຼື ບໍ່ສາມາດຈັດຕັ້ງປະຕິບັດໄດ້, ດັ່ງນັ້ນຈຶ່ງຈຳເປັນຕ້ອງໄດ້ມີການປັບປຸງແກ້ໄຂໃຫ້ດີຂື້ນກວ່າເກົ່າ ແລະ ການຈັດຕັ້ງປະຕິບັດກົດໝາຍ ໃຫ້ມີຜົນສັກສິດ ແນ່ໃສ່ນຳເອົາຜົນປະໂຫຍດ, ຄວາມຍຸຕິທຳ ມາສູ່ປະຊາຊົນຢ່າງແທ້ຈິງ ແລະ ທັງເປັນການເກັບກຳຂໍ້ມູນ, ຮັບຟັງຄຳຄິດເຫັນຂອງທ້ອງຖິ່ນຕໍ່ບັນຫາທີ່ພົ້ນເດັ່ນ ເພື່ອນຳເຂົ້າລາຍງານຕໍ່ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ພິຈາລະນາ ແລະ ຮັບຮອງເອົາ.

ຈາກນັ້ນ, ທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດ ເຂດເລືອກຕັ້ງ 14 ປະທານສະພາປະຊາຊົນແຂວງສາລະວັນ ໄດ້ສະເໜີລາຍງານໃນທີ່ປະຊຸມກ່ຽວກັບ ການຜັນຂະຫຍາຍຄຳແນະ ຂອງຄະນະປະຈໍາສະພາແຫ່ງຊາດ ສະບັບເລກທີ 03/ຄປຈ ວັນທີ 14 ກຸມພາ 2023 ກ່ຽວກັບ ການຈັດຕັ້ງປະຕິບັດການປະເມີນກົດໝາຍ ຂົງເຂດຍຸຕິທຳ 4 ສະບັບ; ພ້ອມດຽວກັນກອງປະຊຸມໄດ້ຮັບຟັງການລາຍງານ ຂໍ້ສະດວກ ແລະ ຂໍ້ຫຍຸ້ງຍາກ ຜົນຂອງການປະເມີນການຈັດຕັ້ງປະຕິບັດ 4 ກົດໝາຍ ຂົງເຂດຍຸຕິທຳ ໄລຍະຜ່ານມາ ຂອງແຕ່ລະພາກສ່ວນຕາມລຳດັບ ຄື: ກົດໝາຍວ່າດ້ວຍສານປະຊາຊົນ, ກົດໝາຍວ່າດ້ວຍອົງການໄອຍະການປະຊາຊົນ, ກົດໝາຍວ່າດ້ວຍການດຳເນີນຄະດີແພ່ງ ແລະ ກົດໝາຍວ່າດ້ວຍການດຳເນີນຄະດີອາຍາ; ໂອກາດດຽວກັນ ປະທານກອງປະຊຸມກໍ່ໄດ້ຕັ້ງຄຳຖາມເຈາະຈິ້ມລົງເລິກເຂົ້າບາງບັນຫາຂໍ້ມູນທີ່ຍັງບໍ່ທັນລະອຽດຊັດເຈນ ແລະ ມອບໃຫ້ແຕ່ລະພາກສ່ວນຊີ້ແຈງ ແລະ ອະທິບາຍເພີ່ມຕື່ມ;

ພາບ-ຂ່າວ: ດີລຳພົນ ພົມມະຈັນ