ໃນວັນທີ 19 ພືດສະພາ  2023 ນີ້, ກຳມະບານຮາກຖານສະພາປະຊາຊົນແຂວງ ໄດ້ເປີດພິທີສະຫຼຸບຂະບວນການແຂ່ງຂັນ 5 ເປັນເຈົ້າ ປະຈໍາປີ 2022,   ຈັດຂື້ນທີ່ຫ້ອງປະຊຸມຂອງຕົນ, ພາຍໃຕ້ການເປັນປະທານຂອງ ສະຫາຍ ແສງປະດິດ ສຸດນາມສຸລີນ ປະທານກໍາມະບານຮາກຖານສະພາປະຊາຊົນ, ໃຫ້ກຽດເຂົ້າຮ່ວມໂດຍສະຫາຍ ນາງ ມີນາພອນ ໄຊສົມພູ ຮອງເລຂາພັກແຂວງ ປະທານສະພາປະຊາຊົນແຂວງ,  ສະຫາຍ ພູສຽງ ເຫຼຶ່ອມມະໄລສີ  ຮອງປະທານຄະນະບໍລິຫານງານສະຫະພັນກຳມະບານແຂວງ, ມີບັນດາສະຫາຍຄະນະໜ່ວຍພັກຮາກຖານ, ສະມາຊິກກໍາມະບານຮາກຖານສະພາປະຊາຊົນແຂວງ ແລະ ແຂກຖືກເຊີນເຂົ້າຮ່ວມທັງໝົດ 43 ສະຫາຍ,ຍິງ 15 ສະຫາຍ.

ໃນພິທີ ສະຫາຍ ແສງປະດິດ ສຸດນາມສຸລີນ ໄດ້ຂື້ນຜ່ານບົດ​ສະຫຼຸບການ​ຈັດ​ຕັ້ງ​ປະຕິບັດ​ເນື້ອ​ໃນ​ຂໍ້​ແຂ່ງຂັນ 5 ​ເປັນ​ເຈົ້າຂອງ​ກຳມະບານ​ຮາກ​ຖານ​ສະພາ​ປະຊາຊົນ​ແຂວງ ​ອັດ​ຕະປື ປະຈຳ​ປີ 2022. ຊຶ່ງຜ່ານມາກໍາມະບານຮາກຖານສະພາປະຊາຊົນແຂວງ ໄດ້ເອົາໃຈໃສ່ສຶກສາອົບຮົມທາງດ້ານການເມືອງ-ແນວຄິດໃຫ້ແກ່ສະມາຊິກກຳມະບານທີ່ຢູ່ໃນຖັນແຖວ ໃຫ້ມີ​ຄວາມ​ຈົ່ງ​ຮັກ​ພັກ​ດີ​ຕໍ່​ພັກ, ເຄົາ​ລົບ ແລະ​ນັບ​ຖື​ການ​ຈັດ​ຕັ້ງ. ​ສາມ​າດ​ສະ​ກັດ​ກັ້ນໄດ້​​ປະ​ກົດ​ການ​ຫຍໍ້​ທໍ້ຕ່າງໆ. ມີ​ທັດ​ສະ​ນະ​ມະ​ຫາ​ຊົນ​ກ້​ວາງ​ຂວາງ ເປັນ​ແບບ​ຢ່າງ​ທີ່​ດີ​ໃຫ້​ແກ່​ໝູ່​ເພື່ອນ ແລະ​ ບໍ່​ຫຼິ້ນ​ກິນ​ຟູມ​ເຟືອຍ; ມີຄວາມອຸ່ນອ່ຽນ, ທຸ່ນທ່ຽງ ໃນການປະຕິບັດໜ້າທີ່ວຽກງານ, ມີນໍ້າໃຈຮັກຊາດ-ຮັກລະບອບປະຊາທິປະໄຕອັນແທ້ຈິງ, ມີນໍ້າໃຈເສຍສະຫຼະ, ດໍາລົງຊີວິດປອດໃສ, ບໍ່ສໍ້ໂກງ, ບໍ່ສວຍໂອກາດ-ສວຍ​ໃຊ້​ໜ້າ​ທີ່​ຕຳ​ແໜ່ງ; ຮູ້ຈໍາແນກມິດສັດຕູຢ່າງຈະແຈ້ງ, ເດັດດຽ່ວຕອບຕ້ານທຸກກົນອຸບາຍມ້າງເພຂອງສັດຕູ, ຕ້ານທຸກປະກົດການຫຍໍ້ທໍ້ຕ່າງໆໄດ້ເປັນຢ່າງດີ. ໄດ້​ນຳ​ເອົາ​ແນວທາງ​ນະ​ໂຍບາຍ, ມະຕິຄໍາສັ່ງຕ່າງໆຂອງພັກ ໂດຍ​ສະ​ເພາະມະຕິກອງປະຊຸມໃຫຍ່ ຄັ້ງທີ X​I ຂອງສູນກາງພັກ ແລະ ຂອງອົງຄະນະພັກແຂວງ; ກົດໝາຍຂອງລັດ, ເອກະສານມູນເຊື້ອປະຫວັດສາດທີ່ສໍາຄັນຂອງພັກ-ລັດ ແລະ ແຜນພັດທະນາເສດຖະກິດ-ສັງຄົມ, ບັນດາ​ມະ​ຕິກ​ອງປະຊຸມ​ສະໄໝສາມັນ ເທື່ອທີ 2 ຈຳນວນ 12 ສະບັບ ແລະ ສະໄໝສາມັນ ເທື່ອທີ 3 ຈຳນວນ 06 ສະບັບ ຂອງ​ສະພາ​ປະຊາຊົນ​ແຂວງ ຊຸດ​ທີ II ແລະ ເນື້ອໃນ 2 ວາລະແຫ່ງຊາດ ມາຈັດຕັ້ງເຊື່ອມຊຶມໃຫ້ພະນັກງານລັດຖະກອນ ກໍຄືສະມາຊິກກຳມະບານໄດ້​ເຂົ້າ​ຮ່ວມ​ຮັບ​ຟັງ.​ ເຂົ້າຮ່ວມຮັບຟັງປາຖະ​ກາ​ຖາ​​ວັນ​ສຳຄັນ​ຕ່າງໆ ເຮັດໃຫ້ສະມາຊິກພວກເຮົາ ມີທັດ​ສະ​ນະ​ການ​ເມືອງໜັກ​ແໜ້ນເຊື່ອໝັ້ນຕໍ່ແນວທາງລວມຂອງພັກ. ຖືເອົາວຽກງານບໍຳລຸງກໍ່ສ້າງຍົກລະດັບຄວາມຮູ້ຄວາມສາມາດດ້ານວຽກງານວິຊາສະເພາະ ແລະ ຮຽນທິດສະດີການເມືອງຈໍານວນ 1 ສະຫາຍ, ປະລີນຍາໂທຢູ່ ນະຄອນດານັງ ສສ ຫຽວດນາມ 1 ສະຫາຍ, ຊຶ່ງໄດ້ຈັດຕັ້ງປະຕິບັດ 5 ຂໍ້ແຂ່ງຂັນຕາມເນື້ອໃນຂໍ້ແຂ່ງຂະບວນການ 5 ເປັນເຈົ້າໄດ້ ​ 90% (ແຜນວາງໄວ້ 94%). ຈາກນັ້ນ, ຍັງໄດ້ມອບໃບຢັ້ງຍືນ 5 ເປັນເຈົ້າໃຫ້ກົມກອງ  ແລະ  ຍ້ອງຍໍບຸກຄົນດີເດັ່ນໃນການຈັດຕັ້ງປະຕິບັດວຽກງານກຳມະການປະເພດ l ມີ 49 ສະຫາຍ, ຍິງ, 21 ສະຫາຍ,  ປະ ເພດ ll  ມີ  4 ສະຫາຍ, ຍິງ 3 ຫາຍ,  ພ້ອມພາກັນຈັບມືເປີດຂະບວນການຂໍ້ແຂ່ງ ຂັນ 5 ເປັນປະຈຳສົກປີ 2023 ຂື້ນຢ່າງເປັນທາງການ.

ໃນຕອນທ້າຍກອງປະຊຸມ ກໍໄດ້ຮັບຟັງການໂອ້ລົມ ຂອງສະຫາຍ ນາງ ມີນາພອນ ໄຊສົມພູ ແລະ ສະຫາຍ ພູສຽງ ເຫຼຶ່ອມມະໄລສີ ໄດ້ສະແດງຄວາມຍ້ອງຍໍ ແລະ ຊົມເຊີຍຕໍ່ຜົນງານທີ່ກຳມະບານຮາກຖານ ສະພາປະຊາຊົນແຂວງ ຍາດມາໄດ້ໃນໄລຍະຜ່ານມາ, ພ້ອມດຽວກັນທ່ານໄດ້ເນັ້ນໃຫ້ຄະນະກຳມະບານຮາກຖານ ສະພາປະຊາຊົນແຂວງ ສືບຕໍ່ໂຄສະນາສຶກສາອົບຮົມການເມືອງ-ແນວຄິດ ໃຫ້ສະມາຊິກກຳມະບານ, ພະນັກງານ-ລັດຖະກອນ ພາຍໃນຮາກຖານ, ສືບຕໍ່ຮັກສາມູນເຊື້ອ, ມີຫົວຄິດປະດິສ້າງອັນໃໝ່ໆໃນການຈັດຕັ້ງວຽກງານ, ຮັດແໜ້ນເຕົ້າໂຮມຄວາມສາມັກຄີຮັກແພງເປັນປືກແຜ່ນແໜ້ນໜາໃຫ້ແກ່ພັກ-ລັດ ກໍຄືການຈັດຕັ້ງຂອງຕົນ, ຕີຖອຍປະກົດການຫຍໍ້ທໍ້ຕ່າງໆທີ່ເກີດຂື້ນຢ່າງຕັ້ງໜ້າ ພ້ອມທັງຍູ້ແຮງແຜນການຈັດຕັ້ງປະຕິບັດຂະບວນການແຂ່ງຂັນເນື້ອໃນ 5 ເປັນເຈົ້າ ປະຈໍາປີ 2023 ຂອງກຳມະບານຮາກຖານ ສພຂ ໃຫ້ບັນລຸຕາມຄາດໝາຍທີ່ວາງໄວ.

(ພາບ-ຂ່າວ: ສພຂ ອັດຕະປື)