ຕອນເຊົ້າຂອງວັນທີ 22 ກັນຍາ 2022 ຢູ່ທີຫ້ອງປະຊຸມຂອງສະພາປະຊາຊົນແຂວງ ໄດ້ເປີດກອງປະຊຸມປະເມີນການຈັດຕັ້ງປະຕິບັດເນື້ອໃນຂໍ້ແຂ່ງຂັນ5ເປັນເຈົ້າ ປະຈຳປີ 2022 ໂດຍການເປັນປະທານຂອງທ່ານ ຈັນທະສຸລິນ ໝັ້ນປະດິດ ປະທານກຳມະບານຮາກຖານສະພາປະຊາຊົນແຂວງ ປະທານຄະນະກຳມະການຍຸຕິທຳ ແລະ ປກຊ-ປກສ ໃຫ້ກຽດເຂົ້າຮ່ວມໂດຍ ທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ, ມີບັນດາທ່ານຄະນະປະຈຳສະພາປະຊາຊົນແຂວງ, ປະທານຄະນະກຳມະການ, ຄະນະເລຂາທິການ, ຫົວໜ້າ, ຮອງຫົວໜ້າຂະແໜງ ຕະຫລອດຮອດສະມາຊິກກຳມະບານພາຍໃນສະພາປະຊາຊົນແຂວງ ເຂົ້າຮ່ວມທັງໝົດ 40 ສະຫາຍ, ຍິງ 19 ສະຫາຍ.
ໃນກອງປະຊຸມໄດ້ຮັບຟັງການຜ່ານແຈ້ງການສະບັບເລກທີ 304/ສກຂ, ລົງວັນທີ 26 ກໍລະກົດ 2022 ຂອງສະຫະພັນກໍາມະບານແຂວງ ວ່າດ້ວຍການປະເມີນກົມກອງ ແລະ ບຸກຄົນດີເດັ່ນໃນການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ ປະຈໍາປີ 2022; ຮັບຟັງການຜ່ານຮ່າງບົດປະເມີນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າປະຈໍາປີ 2022 ຂອງກໍາມະບານຮາກຖານສະພາປະຊາຊົນແຂວງ ເຊິ່ງກໍາມະບານຮາກຖານສະພາປະຊາຊົນແຂວງ ແມ່ນການຈັດຕັ້ງກໍາມະບານຢູ່ຂັ້ນຮາກຖານ ຊຶ່ງຂຶ້ນກັບການຊີ້ນໍາ-ນໍາພາໂດຍກົງຂອງຄະນະພັກຂັ້ນຂອງຕົນ ແລະ ສະຫະພັນກໍາມະບານແຂວງ, ສະພາປະຊາຊົນແຂວງມີພະນັກງານ-ລັດຖະກອນທັງໝົດ 47 ສະຫາຍ, ຍິງ 22 ສະຫາຍ. ໃນນີ້, ມີທະຫານ, ຕໍາຫຼວດ 3 ສະຫາຍ ໄປຍົກລະດັບທິດສະດີການເມືອງ-ການປົກຄອງ ຊັ້ນກາງ 2 ສະຫາຍ, ຍິງ 1 ສະຫາຍ ແລະ ຮຽນພາສາເກົາຫຼີ 1 ສະຫາຍ, ຍິງ 1 ສະຫາຍ; ສະມາຊິກກໍາມະບານ 41 ສະຫາຍ, ຍິງ 21 ສະຫາຍ
ພ້ອມນັ້ນບັນດາທ່ານທີເຂົ້າຮ່ວມກອງປະຊຸມໄດ້ພ້ອມກັນປະກອບຄຳເຫັນໃສ່ຮ່າງບົດປະເມີນດັ່ງກ່າວ ເພື່ອໃຫ້ມີເນື້ອໃນຄົບຖ້ວນສົມບູນໜັກແໜ້ນຂຶ້ນກວ່າເກົ່າ.
ຫລັງຈາກນັ້ນ ໄດ້ຮັບຟັງການຜ່ານຂໍ້ຕົກລົງຂອງປະທານຄະນະກຳມະການຮາກຖານສະພາປະຊາຊົນແຂວງ ວ່າດ້ວຍການແຕ່ງຕັ້ງຄະນະຮັບຜິດຊອບກະກຽມ ແລະ ດຳເນີນກອງປະຊຸມໃຫຍ່ຄັ້ງທີ 5 ຂອງກໍາມະບານຮາກຖານສະພາປະຊາຊົນແຂວງ ສະບັບເລກທີ 12/ກມບ.ສພຂ, ລົງວັນທີ 29 ສິງຫາ 2022, ຮັບຟັງການຜ່ານມາດຖານເງື່ອນໄຂ ແລະ ຄຸນລັກສະນະຂອງຜູ້ທີຈະຮັບສະໝັກເລືອກຕັ້ງເປັນຄະນະກຳມະການຮາກຖານສະພາປະຊາຊົນແຂວງ ຊຸດໃໝ່
ໃນຕອນທ້າຍກອງປະຊຸມໄດ້ດຳເນີນການປະເມີນ ການປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ, ພ້ອມທັງດຳເນີນການປ່ອນບັດທາບທາມເອົາບຸກຄະລາກອນທີ່ຈະຮັບສະໝັກເລືອກຕັ້ງເປັນຄະນະກຳມະບານຮາກຖານສະພາປະຊາຊົນແຂວງຊຸດໃໝ່.
ຂ່າວ ແລະ ພາບໂດຍ ນາງ ອໍາພອນ ສີປະເສີດ