ໃນຕອນເຊົ້າຂອງວັນທີ 28 ມິຖຸນາ 2024 ທີ່ສຳນັກງານສະພາປະຊາຊົນແຂວງຄໍາມ່ວນ, ກຳມະບານຮາກຖານສະພາປະຊາຊົນແຂວງຄໍາມ່ວນ, ໄດ້ເປີດກອງປະຊຸມທາບທາມ ເພື່ອຄັດເລືອກເອົາບຸກຄະລາກອນຜູ້ທີ່ມີມາດຖານເງື່ອນໄຂເຂົ້າໂຄງປະກອບຂອງຄະນະກຳມະບານຮາກຖານສະພາປະຊາຊົນແຂວງຄໍາມ່ວນ ຊຸດໃໝ່, ໂດຍການເປັນປະທານຂອງ ສະຫາຍ ຄໍາສຸກ ວັນທະວົງສາ ເລຂາໜ່ວຍພັກ ກຳມະການຄະນະປະຈໍາສະພາປະຊາຊົນແຂວງຄໍາມ່ວນ, ສະຫາຍ ບຸນສະຫວ່າງ ສີສຸຂະລາດ ປະທານກຳມະບານຮາກຖານສະພາປະຊາຊົນແຂວງຄໍາມ່ວນ, ມີ ຄະນະໜ່ວຍພັກ,​ ຄະນະກຳມະບານຮາກຖານ ແລະ ຕະຫຼອດຮອດສະມາຊິກກຳມະບານພາຍໃນສະພາປະຊາຊົນແຂວງຄໍາມ່ວນເຂົ້າຮ່ວມ.

ກອງປະຊຸມສະຫາຍ ບຸນສະຫວ່າງ ສີສຸຂະລາດ ປະທານກຳມະບານຮາກຖານສະພາປະຊາຊົນແຂວງຄຳມ່ວນ, ໄດ້ຜ່ານມາດຖານເງື່ອນໄຂຜູ້ສະໝັກເລືອກຕັ້ງເປັນຄະນະກຳມະບານຮາກຖານ      ສະພາປະຊາຊົນແຂວງຄຳມ່ວນຊຸດໃໝ່ ແລະ ມີຄຳເຫັນຕໍ່ກອງປະຊຸມທາບທາມໃນຄັ້ງນີ້, ໂດຍອີງຕາມກົດໝາຍວ່າດ້ວຍກຳມະບານລາວ ສະບັບປັບປຸງ ປີ 2017, ກົດລະບຽບຂອງສະຫະພັນ ກຳມະບານລາວສະໄໝທີ  VIII ແລະ ອີງຕາມຄວາມຮຽກຮ້ອງຕ້ອງການຂອງໜ້າທີ່ວຽກງານກຳມະບານຮາກຖານໃນສະພາປະຊາຊົນແຂວງຄຳມ່ວນ ໂດຍຜູ້ສະໝັກຕ້ອງມີ 04 ເງື່ອນໄຂ ແລະ 05 ມາດຖານ ເປັນຕົ້ນຕ້ອງແມ່ນສະມາຊິກພັກປະຊາຊົນປະຕິວັດລາວ, ທີ່ມີບົດບາດ, ໄດ້ຮັບຄວາມໄວ້ວາງໃຈຈາກມະຫາຊົນ ແລະ ມີຄວາມເຊື່ອໝັ້ນຕໍ່ຄະນະໜ່ວຍພັກຂອງຕົນ, ເປັນຜູ້ທີ່ມີຜົນງານ ດີເດັ່ນໃນຂະບວນການເຄື່ອນໄຫວວຽກງານກຳມະບານທີ່ຜ່ານມາ, ໂດຍປະຕິບັດຕາມຫຼັກການປະຊາທິປະໄຕ, ໄດ້ມີການທາບທາມມາຈາກການຈັດຕັ້ງກຳມະບານຂັ້ນຕ່າງໆຢ່າງກວ້າງຂວາງ, ຮັບປະກັນໃຫ້ມີພະນັກງານ 3 ລຸ້ນຄື: ລຸ້ນອາວຸໂສ, ລຸ້ນກາງ, ລຸ້ນສືບທອດ, ສະມາຊິກກຳມະບານໂດຍໄດ້ຮັບການເຫັນດີຈາກຄະນະພັກ. ມາດຖານຂອງຄະນະກຳມະບານຮາກຖານເຊິ່ງປະກອບມີ ມາດຖານທາງດ້ານຄຸນທາດການເມືອງ ແລະ ຄຸນສົມບັດສິນທຳປະຕິວັດ, ມາດຖານທາງດ້ານຄວາມຮູ້, ມາດຖານທາງດ້ານຄວາມສາມາດ, ມາດຖານທາງດ້ານແບບແຜນວິທີເຮັດວຽກ ແລະ ມາດຖານທາງດ້ານສຸຂະພາບ.

ຈາກນັ້ນກອງປະຊຸມບັນດາຜູ້ແທນສົມບູນໄດ້ພ້ອມກັນໃຊ້ສິດປະຊາທິປະໄຕຂອງຕົນ ໄດ້ປ່ອນບັດທາບທາມ ເພື່ອຄັດເລືອກເອົາຄະນະກຳມະບານຮາກຖານສະພາປະຊາຊົນແຂວງຄຳມ່ວນຊຸດໃໝ່ ຮອບທີ I ແລະ ຮອບທີ  II.

ໂດຍ: ເອື້ອ ມະໂນສິງ