(ສພຊ) ໃນລະຫວ່າງວັນທີ 17-18 ຕຸລາ 2023, ຄະນະຕິດຕາມກວດກາຮ່ວມ ລະຫວ່າງ 3 ສະພາແຫ່ງຊາດ ກໍາປູເຈຍ-ລາວ-ຫວຽດນາມ (CLV) ໄດ້ເຄື່ອນໄຫວເຮັດວຽກ ຢູ່ແຂວງຢາລາຍ ແລະ ຂວາງກອນຕູມ ຂອງ ສສ. ຫວຽດນາມ ເຊິ່ງຄະນະຜູ້ແທນ ຂອງສະພາແຫ່ງຊາດ ແຫ່ງ ຣາຊະອານາຈັກ ກໍາປູເຈຍ ນຳໂດຍທ່ານ ສຸ ຍາລາ ປະທານຄະນະກຳມາທິການການຕ່າງປະເທດ, ການຮ່ວມມືສາກົນ, ສື່ ແລະ ຂໍ້ມູນຂ່າວສານ ພ້ອມດ້ວຍຄະນະ; ຄະນະຜູ້ແທນ ຂອງສະພາແຫ່ງຊາດ ແຫ່ງ ສປປລາວ ນຳໂດຍທ່ານ ຮສ. ປອ. ລິນຄໍາ ດວງສະຫວັນ ກໍາມະການຄະນະປະຈໍາ, ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ພ້ອມດ້ວຍຄະນະ; ຄະນະຜູ້ແທນຂອງສະພາແຫ່ງຊາດ ແຫ່ງ ສສ.ຫວຽດນາມ ນຳໂດຍທ່ານ ຫວູ ຮາຍ ຮ່າ ກຳມະການຄະນະປະຈຳ, ປະທານກຳມາທິການການຕ່າງປະເທດ ສະພາແຫ່ງຊາດ ແຫ່ງ ສສ.ຫວຽດນາມ ໂດຍມີຈຸດປະສົງ ເພື່ອສົມທົບກັນລົງຕິດຕາມກວດກາການຈັດຕັ້ງປະຕິບັດບັນດາສົນທິສັນຍາ ແລະ ສັນຍາສາກົນ, ແຜນປະຕິບັດງານ ແລະ ການດຳເນີນໂຄງການຮ່ວມມື ແລະ ລົງທຶນຂອງລັດຖະບານຂອງສາມປະເທດ ກໍຄືໂຄງການຊ່ວຍເຫຼືອຂອງຕ່າງປະເທດຢູ່ໃນເຂດ 3 ຫຼ່ຽມພັດທະນາ ກໍາປູເຈຍ-ລາວ-ຫວຽດນາມ, ຕິດຕາມກວດກາ, ຢ້ຽມຢາມໂຄງການ ແລະ ການລົງທຶນ ໃສ່ການພັດທະນາພື້ນຖານໂຄງລ່າງທາງດ້ານເສດຖະກິດ, ວັດທະນະທຳ, ການສຶກສາ ແລະ ທ່ອງທ່ຽວຈຳນວນໜຶ່ງຢູ່ບາງແຂວງ ທີ່ນອນຢູ່ເຂດສາມຫຼ່ຽມພັດທະນາ ຕິດຕາມກວດກາການຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ ເພື່ອຊຸກຍູ້ສົ່ງເສີມຄວາມສາມັກຄີ, ການຮ່ວມມື, ການເປັນຄູ່ຮ່ວມສົ່ງເສີມການເຊື່ອມໂຍງເຊື່ອມຈອດທາງດ້ານເສດຖະກິດຂອງປະເທດ CLV ເພື່ອກ້າວສູ່ການພັດທະນາແບບກວມລວມ ແລະ ຍືນຍົງ, ຮັບປະກັນສັນຕິພາບ ແລະ ສະຖຽນລະພາບໃນຂົງເຂດ 3 ຫຼ່ຽມພັດທະນາ.
ການເຄື່ອນໄຫວເຮັດວຽກຄັ້ງນີ້, ຄະນະຜູ້ແທນທັງ 3 ປະເທດ ໄດ້ໄປຢ້ຽມຢາມຕົວຈິງຈຸດຫຼັກໝາຍເສັ້ນຊາຍແດນເຊື່ອມຕໍ່ຂອງ 3 ປະເທດ ກໍາປູເຈຍ-ລາວ-ຫວຽດນາມ; ຢ້ຽມຢາມດ່ານສາກົນ ພູເກືອ-ເບີອີ ລະຫວ່າງ ສປປລາວ ແລະ ສສ.ຫວຽດນາມ, ຢ້ຽມຢາມໂຮງງານປຸງແຕ່ງໝາກໄມ້ຂອງບໍລິສັດ Quicornac ຢູ່ແຂວງຢາລາຍ ເຊິ່ງເປັນໂຮງງານສະກັດນຳ້ໝາກໄມ້ເພື່ອສົ່ງຂາຍພາຍໃນ ແລະ ຕ່າງປະເທດ.
ໃນຕອນເຊົ້າຂອງວັນທີ 18 ຕຸລາ 2023 ຄະນະຕິດຕາມກວດກາຮ່ວມລະຫວ່າງ 3 ສະພາແຫ່ງຊາດ ກໍາປູເຈຍ-ລາວ-ຫວຽດນາມ ໄດ້ມີການປະຊຸມພົບປະກັບຜູ້ຕາງໜ້າທີ່ມາຈາກກະຊວງແຜນການ ແລະ ການລົງທຶນ, ຄະນະນຳຂອງແຂວງຢາລາຍ, ກອນຕູມ, ດັກນົງ, ດັກລັກ ແລະ ແຂວງບິງເຟືອກ ໃນກອງປະຊຸມດັ່ງກ່າວ, ທ່ານ ຮສ. ປອ. ລິນຄຳ ດວງສະຫວັນ ໄດ້ມີຄຳເຫັນ ແລະ ຕີລາຄາສູງ ຕໍ່ກອງປະຊຸມທີ່ມີຄວາມໝາຍຄວາມສໍາຄັນໃນຄັ້ງນີ້, ສະແດງຄວາມຊົມເຊີຍ ຕໍ່ ສສ.ຫວຽດນາມ, ແຂວງຢາລາຍ ກໍຄືບັນດາແຂວງທີ່ນອນຢູ່ໃນເຂດສາມຫຼ່ຽມພັດທະນາທີ່ໄດ້ມີຜົນສໍາເລັດຫຼາຍດ້ານ ໂດຍສະເພາະໃນຂົງເຂດວຽກງານການຕ່າງປະເທດ, ວຽກງານການຮ່ວມມືດ້ານເສດຖະກິດ ແລະ ວັດທະນະທຳ-ສັງຄົມ ແລະ ວຽກງານປ້ອງກັນຊາດ-ປ້ອງກັນຄວາມສະຫງົບ ເພື່ອນໍາຜົນປະໂຫຍດຕົວຈິງມາສູ່ປະຊາຊົນຫວຽດນາມ ກໍຄືປະຊາຊົນສາມປະເທດກໍາປູເຈຍ-ລາວ ແລະ ຫວຽດນາມ ໃນເຂດສາມຫຼ່ຽມພັດທະນາ. ເຊື່ອໝັ້ນວ່າ ຜົນຂອງກອງປະຊຸມຕິດຕາມກວດກາຮ່ວມຂອງສາມປະເທດໃນຄັ້ງນີ້ ຈະເປັນພື້ນຖານອັນດີໃຫ້ແກ່ສະພາແຫ່ງຊາດຂອງສາມປະເທດ ເພື່ອພິຈາລະນາ ແລະ ຊຸກຍູ້ໃຫ້ລັດຖະບານຂອງສາມປະເທດ ສືບຕໍ່ຮ່ວມມືກັນໃນຕໍ່ໜ້າ. ພ້ອມນັ້ນ, ຜູ້ເຂົ້າຮ່ວມກອງປະຊຸມຍັງໄດ້ຮັບຟັງການລາຍງານ ຈາກຜູ້ຕາງໜ້າຂອງ 5 ແຂວງທີ່ຢູ່ໃນເຂດສາມຫຼ່ຽມພັດທະນາ ຂອງ ສສ.ຫວຽດນາມ ລວມມີ: ແຂວງຢາລາຍ, ກອນຕູມ, ດັກລັກ, ດັກນົງ ແລະ ແຂວງບິງເຟືອກ ກ່ຽວກັບສະພາບລວມຕໍ່ກັບສະພາບການຈັດຕັ້ງປະຕິບັດວຽກງານດ້ານການພັດທະນາເສດຖະກິດ, ສັງຄົມ ແລະ ວຽກງານປ້ອງກັນຊາດ-ປ້ອງກັນຄວາມສະຫງົບ ໃນເຂດສາມຫຼ່ຽມພັດທະນາ CLV.
ພາຍຫຼັງການເຄື່ອນໄຫວເຮັດວຽກຢູ່ແຂວງທີ່ນອນຢູ່ໃນເຂດສາມຫຼ່ຽມພັດທະນາ, ສສ.ຫວຽດນາມແລ້ວ, ຄະນະກວດກາຮ່ວມສືບຕໍ່ເຄື່ອນໄຫວເຮັດວຽກຢູ່ດ່ານສາກົນເລ່ແທງ-ໂຮຢາດາບ ລະຫວ່າງ ສສ.ຫວຽດນາມ ແລະ ຣາຊະອານາຈັກກຳປູເຈຍ, ເເຂວງຣັດຕະນະຄີຣີ, ຊຽງແຕງ.