ໃນວັນທີ 6 ກັນຍາ ຜ່ານມານີ້ ທ່ານ ດຣ ນາງ ວິພາວັນ ພົມວິຫານ ພັນລະຍາຂອງ ທ່ານ ປອ ໄຊສົມພອນ ພົມວິຫານ ກຳມະການກົມການເມືອງສູນກາງພັກ,ປະທານສະພາແຫ່ງຊາດ ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ໂຮງຮຽນເດັກກໍ່າພ້າແຂວງຫລວງພະບາງ ຈຸດປະສົງແມ່ນເພື່ອມາກວດກາເບີ່ງສະຖານທີ່ຈະປຸກສ້າງອາຄານຫໍພັກເພີ້ມເຕີມໃຫ້ແກ່ນ້ອງນັກຮຽນ ໃນໂອກາດດັ່ງກ່າວໄດ້ຮັບຟັງການລາຍງານໂດຍຫຍໍ້ ກ່ຽວກັບການບໍລິຫານວຽກງານ ແລະ ການເປັນຢູ່ຂອງນ້ອງນັກຮຽນ ຈາກອໍານວຍການໂຮງຮຽນ ຕາມການລາຍງານໃຫ້ຮູ້ວ່າ ໃນໂຮງຮຽນດັ່ງກ່າວມີຄູ-ອາຈານທັງໝົດ 38ທ່ານ, ຍິງ 27 ທ່ານ, ຄູສອນຕົວຈິງ 33 ທ່ານ, ຍິງ 24 ທ່ານ, ມີອາສາສະໜັກ 1 ທ່ານ, ຍິງ 1 ທ່ານ ມີນັກຮຽນລວມທັງໝົດ 414 ຄົນ, ຍິງ 168 ຄົນ, ຊັ້ນປະຖົມມີ 161 ຄົນ, ຍິງ 64 ຄົນ ຊັ້ນມັດທະຍົມຕອນຕົ້ນມີ 177 ຄົນ, ຍິງ 74 ຄົນ ແລະ ຊັ້ນມັດທະຍົມຕອນປາຍ 76 ຄົນ, ຍິງ 30 ຄົນ;
ປະກອບມີຕຶກອາຄານຮຽນທັງໝົດ 5 ຫຼັງ, ຫໍພັກ 6 ຫຼັງ, ສະໂມສອນ 1 ຫຼັງ, ຫ້ອງປະຊຸມ 1 ຫຼັງ, ເຮືອນຄົວລວມ 1 ຫຼັງ, ຫ້ອງສະໝຸດ 1 ຫຼັງ, ຫ້ອງວິທະຍາສາດ 1 ຫຼັງ, ຫ້ອງແພດ 1 ຫຼັງ, ຫ້ອງສິລະປະກຳ 1 ຫຼັງ, ຫ້ອງສິລະປະດົນຕຼີ 1 ຫຼັງ ແລະ ຫ້ອງພາລະ 1 ຫຼັງ. ສະພາບຫໍພັກນັກຮຽນແມ່ນຖືວ່າແອອັດຫລາຍ ແລະ ຍັງບໍ່ທັນພຽງພໍ ເຮັດໃຫ້ອາກາດ ພາຍໃນຫໍພັກ ອົບເອົ້າ ໂດຍສະເພາະແມ່ນລະດູຮ້ອນ, ຊີວິດການເປັນຢູ່ ຂອງນັກຮຽນຍັງມີຄວາມຫຍຸ້ງຍາກຫຼາຍຢ່າງ ຍ້ອນຄ່າຄອງຊີບສູງຂຶ້ນ ແຕ່ເງິນເບ້ຍລ້ຽງນັກຮຽນທີ່ໄດ້ຮັບແມ່ນບໍ່ພຽງພໍ ຊຶ່ງໄດ້ອາໄສແຕ່ສັງຄົມມາໃຫ້ການຊ່ວຍເຫຼືອເປັນບາງຄັ້ງຄາວ. ນອກນັ້ນທ່ານ ອໍານວຍການໂຮງຮຽນ ຍັງໄດ້ລາຍງານກ່ຽວກັບ ອຸປະກອນ ແລະ ສື່ການຮຽນ-ການສອນ ທີ່ຍັງບໍ່ທັນພຽງພໍ ກັບຄວາມຕ້ອງການ ເປັນຕົ້ນ ແມ່ນ ຫ້ອງຮຽນ, ຄອມພິວເຕີ ແລະ ອື່ນໆ. ຈາກນັ້ນ, ທ່ານ ດຣ ນາງ ວິພາວັນ ພົມວິຫານ ກໍ່ໄດ້ມີຄຳເຫັນຍ້ອງຍໍຊົມເຊີຍຕໍ່ກັບຄູອາຈານທີ່ສາມາດຍາດໄດ້ຜົນງານຫລາຍຢ່າງໃຫ້ແກ່ໂຮງຮຽນ, ທ່ານໄດ້ເນັ້ນໃສ່ການສ້າງແຜນການກໍ່ຄືການຂຽນໂຄງການກໍ່ສ້າງເພື່ອຂໍທຶນນຳຜູ້ໃຫ້ທຶນແມ່ນຕ້ອງໄດ້ຜ່ານການມີຄວາມເປັນເອກະພາບກັນຂອງທຸກພາກສ່ວນທີ່ກ່ຽວຂ້ອງເປັນຕົ້ນ:
ຄະນະນຳ ແລະ ຄູອາຈານພາຍໃນໂຮງຮຽນ, ສຶກສາເມືອງ-ສຶກສາແຂວງ ຈົນໄປເຖິງການນຳຂອງແຂວງຫລວງພະບາງ. ໃນໂອກາດດັ່ງກ່າວ, ທ່ານກໍ່ໄດ້ມອບອຸປະກອນການຮຽນ ແລະ ອາຫານແຫ້ງ ໃຫ້ທາງໂຮງຮຽນມັດທະຍົມສົມບູນເດັກກໍ່າພ້າ ແຂວງຫຼວງພະບາງ ລວມມູນຄ່າ 9.185.000ກີບ, (ເກົ້າລ້ານໜຶ່ງແສນແປດສິບຫ້າພັນກີບ) ແລະ ໄດ້ແນະນຳໃຫ້ເຮັດໜັງສືສະເໜີຫາມູນນິທິ ຂອງສະພາແຫ່ງຊາດ ເພື່ອການຊ່ວຍເຫຼືອ ສັງຄົມ ເພື່ອທີ່ເພີ່ນຈະໄດ້ມອບຄອມພິວເຕີ ຈຳນວນ 03 ຊຸດ ແລະ ເງິນຈໍານວນ 50,000,000 ກີບ(ຫ້າສິບລ້ານກີບ) ໃຫ້ແກ່ໂຮງຮຽນດັ່ງກ່າວອີກດ້ວຍ; ໃນຕອນທ້າຍຄະນະຢ້ຽມຢາມກໍ່ໄດ້ມີການເດີນສຳຫຼວດເບີ່ງພື້ນທີ່ດິນຕົວຈິງທີ່ຈະສ້າງອາຄານຫໍພັກຫລັງໃໝ່.
ຂ່າວ: ຄໍາຫຼ້າ ພອນພິລາ