(ສພຊ) – ຕອນບ່າຍວັນທີ 23 ຕຸລາຜ່ານມາ ທີ່ສະພາແຫ່ງຊາດ, ທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມພົບປະຂອງທ່ານ ມອນເດີ ບູເດນ (Monder Bouden) ຮອງປະທານສະພາປະຊາຊົນແຫ່ງຊາດ (ສະພາຕໍ່າ) ແຫ່ງ ສາທາລະນະລັດ ປະຊາທິປະໄຕ ປະຊາຊົນ ອານເຊຣີ; ໃນໂອ ກາດນີ້, ທ່ານ ປອ. ໄຊສົມພອນ ພົມວິຫານ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການເດີນທາງມາເຂົ້າຮ່ວມກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ (AIPA) ຄັ້ງທີ 45 ຂອງທ່ານ ມອນເດີ ບູເດນ ພ້ອມດ້ວຍຄະນະ ເຊິ່ງເປັນການໃຫ້ກຳລັງໃຈ ແລະ ສະໜັບສະໜູນການປະຕິບັດພັນທະສາກົນຂອງສະພາແຫ່ງຊາດລາວໃນນາມປະທານໄອປາ ກໍຄືເປັນເຈົ້າພາບກອງປະຊຸມ AIPA ຄັ້ງທີ 45 ໄດ້ຮັບຜົນສຳເລັດຢ່າງຈົບງາມ, ທັງເປັນການປະກອບສ່ວນເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີລະຫວ່າງສອງປະເທດ ໃຫ້ນັບມື້ນັບຂະຫຍາຍຕົວ ແລະ ເປັນຮູບປະທຳຍິ່ງໆຂຶ້ນ.
ທ່ານ ມອນເດີ ບູເດນ ກໍໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີລະຫວ່າງ 2 ປະເທດ ກໍຄືລະຫວ່າງສອງອົງການນິຕິບັນຍັດຂອງ ອານເຊຣີ-ລາວ ພ້ອມທັງແຈ້ງສະພາບການທີ່ພົ້ນເດັ່ນຂອງປະເທດ, ສະພາຜູ້ແທນປະຊາຊົນແຫ່ງຊາດ, ຜົນຂອງການພົບປະສອງຝ່າຍກັບທ່ານ ຄຳໃບ ດຳລັດ ຮອງປະທານສະພາແຫ່ງຊາດ ແລະ ບັນຫາອື່ນໆ ໃຫ້ໄດ້ຮັບຊາບໂດຍຫຍໍ້.
ການພົວພັນຮ່ວມມືລະຫວ່າງສອງປະເທດໃນຕະຫຼອດໄລຍະຜ່ານມາ ໄດ້ມີການຂະຫຍາຍຕົວກ້າວຂຶ້ນຢ່າງເປັນລຳດັບ, ສປປລາວ ແລະ ສປປອານເຊຣີ ໄດ້ສ້າງຕັ້ງສາຍພົວພັນການທູດນຳກັນໃນວັນທີ 15 ພຶດສະພາ 1973 ໂດຍມີສະຖານທູດອານເຊຣີ ປະຈຳນະຄອນຫຼວງຮ່າໂນ້ຍ, ສສ.ຫວຽດນາມ ຮັບຜິດຊອບ ສປປລາວ, ສ່ວນ ສປປລາວ ມີສະຖານເອກອັກຄະລັດຖະທູດທີ່ຝຣັ່ງ ຮັບຜິດຊອບອານເຊຣີ; ການພົວພັນລະຫວ່າງສອງປະເທດໃນດ້ານການເມືອງ ແລະ ການຮ່ວມມືໃນເວທີສາກົນ ແມ່ນຢູ່ໃນລະດັບປົກກະຕິ, ຜູ້ນຳຂອງສອງປະເທດມີການແລກປ່ຽນການພົບປະກັນໃນໂອກາດເຂົ້າຮ່ວມກອງປະຊຸມສາກົນ. ສປປລາວ ໄດ້ສະໜັບສະໜູນອານເຊຣີ ໃນການສະໝັກເຂົ້າເປັນສະມາຊິກສະພາຄວາມໝັ້ນຄົງສິດທິມະນຸດຂອງອົງການສະຫະປະຊາຊາດ (ສປຊ) ໄລຍະປີ 2023-2025 ໃນຂົງເຂດອາຟຣິກາ ແລະ ສະໜັບສະໜູນອານເຊຣີ ໃນການລົງສະໝັກເຂົ້າເປັນສະມາຊິກຂອງຄະນະກຳມະການຕ່າງໆໃນຂອບວຽກງານຂອງ ສປຊ ຄື: ຄະນະກຳມະການກົດໝາຍສາກົນ (International Law Commission) ສົກປີ 2023-2027, ສະມາຊິກຂອງຄະນະກຳມະການຊີດໍ (CEDAW) ສົກປີ 2023-2026 , ສະມາຊິກສະພາສິດທິມະນຸດ (Human Rights Council) ສົກປີ 2023-2025 ແລະ ສະມາຊິກບໍ່ຖາວອນຂອງສະພາຄວາມໝັ້ນຄົງ ສປຊ (UNSC) ສົກປີ 2024-2025.
ເພື່ອສືບຕໍ່ການພົວພັນຮ່ວມມືລະຫວ່າງສອງອົງການນິຕິບັນຍັດ, ສອງຝ່າຍມີຄວາມເຊື່ອໝັ້ນວ່າໃນຕໍ່ໜ້ານີ້ ຈະມີການແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງ, ກຳມາທິການ, ຄະນະເລຂາທິການ ແລະ ຄະນະມິດຕະພາບລັດຖະສະພາຂອງສອງປະເທດ ຫຼື ອາດຈະພົບປະກັນຜ່ານລະບົບເອເລັກໂຕຣນິກ; ສືບຕໍ່ແລກປ່ຽນຄຳເຫັນ, ຮ່ວມມື, ຊ່ວຍເຫຼືອ ແລະ ສະໜັບສະໜູນເຊິ່ງກັນແລະກັນໃນເວທີລັດຖະສະພາພາກພື້ນ ແລະ ສາກົນ.
ຫຼັງຈາກພົບປະ, ຄະນະຜູ້ແທນອານເຊຣີ ຍັງໄດ້ຢ້ຽມຊົມຫ້ອງປະຊຸມໃຫຍ່ ແລະ ຫ້ອງມູນເຊື້ອຂອງສະພາແຫ່ງຊາດລາວອີກດ້ວຍ.
(ສອນສັກ ວັນວິໄຊ)