ໃນຕອນເຊົ້າ ວັນທີ 22 ມີນາ 2022 ນີ້, ການນໍາຂອງສະພາປະຊາຊົນ ແຂວງ ເຊກອງ ເຂົ້າຮ່ວມພິທີວາງພວງມາລາຢູ່ອານຸສາວະລີ ນັກຮົບນິລະນາມ ແລະ ວາງກະຕ່າດອກໄມ້ຢູ່ອານຸສອນສະຖານ ປະທານ ໄກສອນ ພົມວິຫານ ຜູ້ນໍາທີ່ແສນ ເຄົາລົບຮັກຂອງປວງຊົນລາວທັງຊາດ ເນື່ອງໃນໂອກາດ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 67 ປີ (22/3/1755-22/3/2022) ເຊິ່ງນໍາໂດຍ ສະຫາຍ ເຫລັກໄຫລ ສີວິໄລ ເລຂາພັກ ແຂວງ ເຈົ້າແຂວງ ເຊກອງ, ມີບັນດາສະຫາຍ ຄະນະປະຈໍາພັກແຂວງ, ກໍາມະການພັກແຂວງ, ຫົວໜ້າ ກອງບັນຊາການ ປກຊ – ປກສ, ສະມາຊິກສະພາແຫ່ງຊາດ ປະຈໍາເຂດທີ 16 ແຂວງເຊກອງ, ສະມາຊິກສະພາປະຊາຊົນແຂວງ, ເຈົ້າເມືອງ 4 ຕົວເມືອງ, ຫົວໜ້າພະແນກການ ແລະ ອະດີດການນໍາຂອງແຂວງເຂົ້າຮ່ວມ. 
ພິທີວາງພວງມາລາ ແລະ ກະຕ່າດອກໄມ້ໃນຄັ້ງນີ້, ກໍເພື່ອສະແດງເຖິງຄວາມກະຕັນຍູຮູ້ບຸນຄຸນ ແລະ ຈາລຶກຄຸນງາມຄວາມດີຂອງວິລະຊົນແຫ່ງຊາດ, ນັກຮົບແຂ່ງຂັນ, ນາຍ ແລະ ພົນທະຫານ ແລະ ປະຊາຊົນລາວ ບັນດາເຜົ່າ ທີ່ໄດ້ເສຍສະຫຼະເລືອດເນື້ອ ແລະ ຊີວິດ ໃນພາລະກິດຕໍ່ສູ້ກູ້ຊາດຕ້ານຈັກກະພັດຜູ້ຮຸກຮານ ທັງເກົ່າ ແລະ ໃໝ່ ໃນເມືອກ່ອນ, ເພື່ອຍາດເອົາເອກະລາດມາໃຫ້ປະເທດຊາດ ແລະ ປະຊາຊົນລາວ ແລະ ສະແດງຄວາມຮູ້ບຸນຄຸນ ແລະ ຈົ່ງຮັກພັກດີຕໍ່ຜູ້ນໍາປະຕິວັດທີ່ໄດ້ເສຍສະຫຼະເຫື່ອແຮງ, ສະຕິປັນຍາ ເພື່ອພາລະກິດປົດປ່ອຍຊາດອອກຈາກແອກຄອບຄອງຂອງຈັກກະພັດຕ່າງດ້າວ. 
ພ້ອມທັງ, ສະແດງຄວາມຮູ້ບຸນຄຸນ ແລະ ຄວາມຈົ່ງຮັກພັກດີຕໍ່ທ່ານ ປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກຂອງປວງຊົນລາວທັງຊາດ ເຊິ່ງທ່ານ ໄດ້ອຸທິດເຫື່ອແຮງ ແລະ ສະຕິປັນຍາ ຕະຫຼອດຊີວິດເຂົ້າໃນພາລະກິດປະຕິວັດນໍາພາປະຊາຊົນລາວຕໍ່ສູ້ຕ້ານຈັກກະພັດຜູ້ຮຸກຮານ ຈົນສາມາດຍາດໄດ້ໄຊຊະນະ, ລົບລ້າງ ລະບອບລາຊາທິປະໄຕ ແລະ ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ ປີ 1975.
#ຂ່າວ: ນາລີວັນ