(ສພຊ) – ຕາມວາລະການດໍາເນີນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ (ສພຊ) ຊຸດທີ IXໃນຕອນບ່າຍວັນທີ 20 ພະຈິກນີ້ ໂດຍການເປັນປະທານຂອງທ່ານ ປອ. ໄຊສົມພອນ ພົມວິຫານ ປະທານສະພາແຫ່ງ ຊາດ; ທ່ານ ພົອ. ວິໄລ ຫຼ້າຄຳຟອງ ຮອງນາຍົກລັດຖະມົນ ຕີ, ລັດຖະມົນຕີກະຊວງປ້ອງກັນຄວາມສະຫງົບ ໄດ້ລາຍ ງານກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຕາມມະຕິສະພາແຫ່ງ ຊາດ ສະບັບເລກທີ 110/ສພຊ, ລົງວັນທີ 21 ພະຈິກ 2023 ເຊິ່ງມີບາງຕອນໃຫ້ຮູ້ວ່າ: ນັບແຕ່ເດືອນ 01-11 ປີ 2024 ໃນຂອບເຂດທົ່ວປະເທດ ສາມາດແກ້ໄຂມ້າງລາຍຄະດີຢາເສບຕິດໄດ້ທັງໝົດ 3,395 ເລື່ອງ, ຈັບຜູ້ຖືກຫາໄດ້ 5,168 ຄົນ/ຍິງ 505 ຄົນ, ຕ່າງປະເທດ 199 ຄົນ/ຍິງ 19 ຄົນ; ຢຶດເຮໂຣອິນ ໄດ້ 380.96 ກິໂລ, ຢາບ້າ 81,030,733 ເມັດ ນໍ້າໜັກ 8,103.07 ກິໂລ, ຢາໄອສ໌ 4,816.17 ກິໂລ, ຢາຝິ່ນ 84.86 ກິໂລ, ກັນຊາ 3,583.24 ກິໂລ, ເຄຕາມິນ 33.14 ກິໂລ, ຢາອີ 2,584 ເມັດ ກັບ 61.44 ກິໂລ, ໂຄເຄນ 0.99 ກິໂລ, ແປ້ງຝຸ່ນ 10,092.84 ກິໂລ, ນໍ້າຢາສານເຄມີ 101 ຖັງ, ລົດໃຫຍ່ 77 ຄັນ, ລົດຈັກ 480 ຄັນ, ປືນ 10 ກະບອກ, ລູກປືນ 1,677 ລູກ. ຈາກນັ້ນ, ທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ ຕາງໜ້າຄະນະປະຈຳສະພາແຫ່ງ ຊາດ ໄດ້ປະກອບຄຳເຫັນຕໍ່ບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ.

ທ່ານປະທານກອງປະຊຸມໄດ້ເຈາະຈີ້ມ ແລະ ໃຫ້ທິດຊີ້ນຳແກ່ບັນດາທ່ານສະມາຊິກສະພາແຫ່ງຊາດ (ສສຊ) ໃນການຄົ້ນຄວ້າປະກອບຄໍາເຫັນຢ່າງມີຈຸດສຸມຕໍ່ບົດລາຍງານດັ່ງກ່າວ ພ້ອມທັງສະເໜີບັນດາທ່ານ ສສຊ ມີຄໍາຊັກຖາມເພີ່ມຕື່ມຕໍ່ບັນຫາທີ່ຍັງມີຄວາມສົນໃຈ; ຈາກນັ້ນ, ທ່ານ ພົອ. ວິໄລ ຫຼ້າຄຳຟອງ ກໍໄດ້ຊີ້ແຈງກັບທີ່ ເພື່ອໃຫ້ຄວາມກະ ຈ່າງແຈ້ງຕໍ່ບັນດາຄໍາຊັກຖາມ.

(ນາງ ອາລິນ ສຸພິມມະປະດິດ)