ທ່ານ ປອ. ໄຊສົມພອນ ພົມວິຫານ ກ່າວວ່າ: ຈຸດປະສົງລະດັບຄາດໝາຍຕົ້ນຕໍໃນການປະເມີນຜົນການຈັດຕັ້ງປະຕິບັດລັດຖະທຳມະນູນເທື່ອນີ້ ແມ່ນແນໃສ່ສະຫຼຸບຕີລາຄາໃຫ້ເຫັນໄດ້ຜົນສຳເລັດ, ດ້ານດີ, ດ້ານອ່ອນ-ຂໍ້ຄົງຄ້າງ, ສາ ເຫດ ແລະ ບົດຮຽນໃນການຈັດຕັ້ງປະຕິບັດລັດຖະທຳມະນູນສະບັບປີ 2015 ຂອງບັນດາອົງການອຳນາດລັດຂັ້ນຕ່າງໆ ຕະຫຼອດໄລຍະເກືອບ 10 ປີທີ່ຜ່ານມາ; ພ້ອມກັນນີ້, ໃຫ້ເຫັນໄດ້ໝວດ, ມາດຕາ ຫຼື ບົດບັນຍັດຂອງລັດຖະທຳມະນູນ ທີ່ບໍ່ສອດຄ່ອງ ເຊິ່ງຕ້ອງປັບປຸງ ຫຼື ເພີ່ມໃໝ່ ທັງເປັນເກັບກຳ, ສັງລວມຄວາມເຫັນ ແລະ ຂໍ້ສະເໜີຕ່າງໆຂອງບຸກຄົນ, ນິ ຕິບຸກຄົນ ແລະ ການຈັດຕັ້ງ ເພື່ອເປັນຂໍ້ມູນຕົວຈິງໃຫ້ແກ່ການຄົ້ນຄວ້າ ແລະ ປັບປຸງລັດຖະທຳມະນູນ.

ທ່ານປະທານກອງປະຊຸມ ໄດ້ສະເໜີປຶກສາຫາລື, ແລກປ່ຽນຄວາມເຫັນກັບບັນດາປະທານສະພາແຕ່ລະແຂວງໃນການຕົກລົງວັນ, ເວລາ ດຳເນີນກອງປະຊຸມສະໄໝສາມັນເທື່ອທີ 7 ແລະ ກອງປະຊຸມປະເມີນຜົນການຈັດຕັ້ງປະຕິ ບັດລັດຖະທຳມະນູນຢູ່ແຂວງ ໃຫ້ລະອຽດຈະແຈ້ງ; ຊີ້ນຳຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ ແລະ ຄະນະປະຈຳສະພາປະຊາຊົນຂັ້ນແຂວງ ເປັນເຈົ້າການຊ່ວຍຊີ້ນຳການກະກຽມສະຖານທີ່, ເປົ້າໝາຍເຂົ້າຮ່ວມ ແລະ ສິ່ງອຳນວຍຄວາມສະດວກໃຫ້ແກ່ການດຳເນີນກອງປະຊຸມ ໂດຍມີການແຕ່ງຕັ້ງ ຫຼື ມອບໝາຍໃຫ້ຄະນະເລຂາທິການສະ ພາປະຊາຊົນຂັ້ນແຂວງ ຮັບຜິດຊອບຊ່ວຍກະກຽມວຽກງານຕົວຈິງດ້ານຕ່າງໆ ໃຫ້ຮັບປະກັນການດຳເນີນກອງປະຊຸມການປະເມີນຜົນການຈັດຕັ້ງປະຕິບັດລັດຖະທຳມະນູນ ໄດ້ຮັບຜົນດີ ແລະ ສຳເລັດທັນຕາມກຳນົດເວລາ; ສຳລັບຄະນະຮັບຜິດຊອບກອງປະຊຸມນັ້ນ, ຄະນະກຳມະການລະດັບຊາດປັບປຸງລັດຖະທຳມະນູນ ຈະແຕ່ງຕັ້ງ ແລະ ມອບໝາຍໃຫ້ຄະນະກຳມະການຈຳນວນໜຶ່ງ, ກອງເລຂາ ແລະ ອະນຸກຳມະການຕ່າງໆ ຂອງຄະນະກຳມະການລະດັບຊາດ ລົງສົມທົບເພື່ອຈັດຕັ້ງປະຕິບັດຕົວຈິງຢູ່ແຕ່ລະແຂວງ.

(ຂ່າວ-ພາບ: ນາງ ອາລິນ ສຸພິມມະປະດິດ)