ໃນວັນທີ 28 ກັນຍາ 2023 ນີ້. ທີ່ສະພາປະຊາຊົນແຂວງ ອັດຕະປື ກອງເລຂາແຫຼ່ງທຶນຊ່ວຍເຫຼືອລ້າ ສະພາແຫ່ງຊາດຢ້ຽມຢາມ ແລະ ສໍາພາດເກັບກໍາຂໍ້ມູນ ກ່ຽວກັບລະບົບຂໍ້ມູນ-ຂ່າວສານ ນໍາໂດຍ: ທ່ານ ວິລະພົນ ສະຫວັດວົງ ຮອງຫົວໜ້າຫ້ອງການຄຸ້ມຄອງຫໍສະພາແຫ່ງຊາດ ຜູ້ຊີ້ນໍາວຽກງານໄອທີ. ມີທ່ານ ຊໍ ມິນ ເທັດຮັກສາການຜູ້ຈັດການໂຄງການ STEPS ພ້ອມດ້ວຍຄະນະ, ເຂົ້າຮວ່ມເຮັດວຽກມີຄະນະເລຂາທິການ, ຫົວໜ້າຂະແໜງ-ຮອງຂະແໜງ ແລະ ວີຊາການຮັບຜິດຊອບຂໍ້ມູນ-ຂ່າວສານ ແລະ ໄອທີ ຂອງສະພາປະຊາຊົນແຂວງອັດຕະປື.
ທ່ານ ວິລະພົນ ສະຫວັດວົງ ໄດ້ກ່າວຈຸດປະສົງວ່າ: ແມ່ນເປັນການສືບຕໍ່ຕາມຂັ້ນຕອນການເກັບກຳຂໍ້ມູນການປະເມີນຄວາມອາດສາມາດດ້ານໄອຊີທີຂອງສະພາປະຊາຊົນຂັ້ນແຂວງ 18 ແຂວງ ທົ່ວປະເທດ. ໂດຍຜ່ານການເກັບກຳຂໍ້ມູນໃນເບື້ອງຕົ້ນ ຜ່ານການຕອບແບບສອບຖາມຈາກ 18 ແຂວງແລ້ວ ທີມງານຜູ້ຊ່ຽວຊານດ້ານໄອຊີທີ ໄດ້ສັງລວມຂໍ້ມູນ ແລະ ຈັດປະເພດຄວາມພ້ອມດ້ານລະບົບໄອຊີທີຂອງແຕ່ລະສະພາປະຊາຊົນແຂວງ ໂດຍສາມາດຈັດເປັນ 03 ປະເພດ ຄື: ຄວາມພ້ອມດ້ານໄອຊີທີ ໜ້ອຍ, ກາງ ແລະ ຫຼາຍ ໂດຍແຕ່ລະປະເພດ ປະກອບມີ 6 ແຂວງ ຊຶ່ງສະພາປະຊາຊົນແຂວງ ອັດຕະປື ແມ່ນຈັດຢູ່ໜຶ່ງໃນບັນດາແຂວງທີ່ມີຄວາມພ້ອມໜ້ອຍ, ຜົນຂອງການຈັດປະເພດ ຕາມຜົນການຕອບແບບສອບຖາມນັ້ນ ແມ່ນຍັງບໍ່ທັນເປັນອັນຕັດສິນ, ຊັດເຈນ ແລະ ເປັນບ່ອນອີງໄດ້ເທື່ອ. ສະນັ້ນ, ມາເກັບກຳຂໍ້ມູນຈາກສະພາປະຊາຊົນ ແຂວງ ໂດຍເລືອກເອົາ 04 ແຂວງ ເພື່ອເປັນກຸ່ມຕົວຢ່າງ ແລະ ເປັນຕົວແທນໃຫ້ແກ່ແຕ່ລະປະເພດ ຄວາມພ້ອມດ້ານລະບົບໄອຊີທີ ແລະ ສິ່ງອຳນວຍຄວາມສະດວກດ້ານໄອທີ. ໃນນັ້ນ, ປະເພດຄວາມພ້ອມຫຼາຍ ເລືອກເອົາ ສະພາປະຊາຊົນນະຄອນຫຼວງວຽງຈັນ, ປະເພດກາງ ເລືອກເອົາ ສະພາປະຊາຊົນແຂວງ ອຸດົມໄຊ ແລະ ປະເພດໜ້ອຍ ແມ່ນເລືອກເອົາ 2 ຈຸດ ຄື ສະພາປະຊາຊົນແຂວງຫຼວງພະບາງ ແລະ ອັດຕະປື.
ໂອກາດນີ້, ທ່ານ ນ ແສງອາລຸນ ວົງສາທິການ ເລຂາທິການສະພາປະຊາຊົນແຂວງ ໄດ້ລາຍງານສະພາບລວມໂດຍຫຍໍ້ກ່ຽວກັບການຈັດຕັ້ງປະຕິບັດວຽກງານລະບົບຂໍ້ມູນ-ຂ່າວສານ ແລະ ໄອທີ ໃຫ້ຊາບວ່າ: ການຫັນເປັນທັນສະໄໝ ແມ່ນວຽກໜຶ່ງທີ່ມີຄວາມສໍາຄັນຫຼາຍ ແມ່ນການນໍາໃຊ້ເຕັກໂນໂລຊີ (ICT) ຫຼືໃນປະຈຸບັນເອີ່ນກັນວ່າ ດີຈີຕອນ (Digital) ເຂົ້າເປັນກົນໄກ, ປະສານງານ, ຊຸກຍູ້ສົ່ງເສີມ ແລະ ເປັນເຄື່ອງມືອັນສໍາຄັນໃນການຂັບເຄື່ອນການປະຕິຮູບຂະບວນການບໍລິຫານໃຫ້ແກ່ການຈັດຕັ້ງປະຕິບັດວຽກງານຂອງສະພາປະຊາຊົນຂັ້ນແຂວງ ໃຫ້ມີຄວາມສະດວກ, ວ່ອງໄວ ແລະ ມີປະສິທິພາບ ດີຂື້ນເປັນກ້າວໆ, ຕະຫຼອດໄລຍະຜ່ານມາການຈັັດຕັ້ງປະຕິບັດວຽກງານ ໄອທີ ໃນການເປັນເສນທິການໃຫ້ແກ່ສະພາປະຊາຊົນຂັ້ນແຂວງ ໄດ້ເອົາໃຈໃສ່ປະຕິບັດ ປະສານງານ ແລະ ອໍານວຍຄວາມສະດວກຫຼາຍດ້ານເປັນຕົ້ນ: ການນໍາໃຊ້ອີນເຕີເນັດ, ລະບົບກອງປະຊຸມທາງໄກ, ການຈັບເວລາປະກອບຄໍາເຫັນຜ່ານລະບົບອອນລາຍ ວີຄອກ (v-clock) ໃນກອງປະຊຸມສະໄໝສາມັນ, ລະບົບເຄື່ອງລົງຄະແນນສຽງຮັບຮອງມະຕິໃນກອງປະຊຸມສະໄໝສາມັນ, ການກະຈ່າຍຂ່າວສານການເຄື່ອນໄຫວ ສສຊ-ສສຂ ຜ່ານສື່ອອນລາຍ ເຟສບຸກ Facebook, ແອັບພີເຄຊັນ ລາວນາ ຂອງສະພາແຫ່ງຊາດ, ການຈັດລາຍການວິທະຍຸ, ການປະສານງານ ແລະ ການເຂົ້າເຖິງຂໍ້ມຸນ-ຂ່າວສານ ຜ່ານລະບົບ ອີເມວ (Emai), ວັອດແອັບ (whatapp),ຈີແຊັດ (G-Chat), ກູໂກດາຍ (Google drive), ຄິວອາໂຄັດ (QR code) ແລະ ອື່ນໆ.
ຈາກນັ້ນ, ໄດ້ສົນທະນາແລກປ່ຽນເຊິ່ງກັນ ແລະ ກັນ ແລະ ເຂົ້າຢ້ຽມຊົມ ບັນດາສິ່ງອຳນວຍຄວາມສະດວກ ເປັນຕົ້ນ ເຄື່ອງມືດ້ານໄອຊີທີ, ຫໍສະໝຸດ ແລະ ຫ້ອງເຮັດວຽກ ຂອງສະພາປະຊາຊົນແຂວງ ເພື່ອເກັບກຳໄດ້ສະພາບຕົວຈິງ ເພື່ອເປັນຂໍ້ມູນ ໃນການເຮັດບົດລາຍງານການປະເມີນ ແລະ ຍັງຈະສ້າງແຜນຍຸດທະສາດດ້ານໄອຊີທີ ເພື່ອເປັນບ່ອນອີງໃນການສະໜັບສະໜູນໃນກອບຂອງໂຄງ.
(ວິນັດ)