ຕອນເຊົ້າ ຂອງວັນທີ 8 ມີຖຸນາ 2023 ນີ້, ຢູ່ທີ່ຫ້ອງປະຊຸມສະພາປະຊາຊົນແຂວງສາລະວັນ ໄດ້ຈັດກອງປະຊຸມໃຫຍ່ຄັ້ງທີ VII ຂອງກໍາມະບານຮາກຖານ ສະພາປະຊາຊົນແຂວງສາລະວັນ ພາຍໃຕ້ການເປັນປະທານຂອງ ສະຫາຍ ພັທ ນາງ ທອງເຫຼືອງ ໂຄດປັນຍາ, ປະທານກໍາມະບານຮາກຖານ ສະພາປະຊາຊົນແຂວງ ສາລະວັນ, ໃຫ້ກຽດເຂົ້າຮ່ວມຂອງສະຫາຍ ຈິດຕະກອນ ສາຍສະໝຸດ ຮອງປະທານ ຄະນະບໍລິຫານງານສະຫະພັນກໍາມະບານແຂວງສາລະວັນ, ມີແຂກຮັບເຊີນຕາງໜ້າຄະນະກຳມະບານຮາກຖານອ້ອມຂ້າງແຂວງ, ມີຕາງໜ້າອົງການຈັດຕັ້ງມະຫາຊົນ ແລະ ຜູ້ແທນສົມບູນ ເຂົ້າຮ່ວມ ຈຳນວນ 39 ສະຫາຍ, ຍິງ 19 ສະຫາຍ.
ສະຫາຍ ສຸດທິໂສມ ແກ້ວໄຊຍະວົງ ຕາງໜ້າສະມາຊິກກໍາມະບານຮາກຖານ ສະພາປະຊາຊົນແຂວງສາລະວັນ ໄດ້ຜ່ານຮ່າງບົດສະຫຼຸບ ການເມືອງທັງສອງພາກ ພ້ອມທັງຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ ແລະ ທິດທາງແຜນການໃນຕໍ່ໜ້າ ເຊີ່ງເນື້ອໃນໄດ້ຕີລາຄາເຖິງສະພາບການຈັດຕັ້ງປະຕິບັດວຽກງານກຳມະບານຕະຫຼອດໃນໄລຍະ 5 ປີ ຜ່ານມາ ຍ່າງກົງໄປກົງມາ ແລະ ພາວະວິໄສ ພາຍໃຕ້ການນຳພາ-ຊີ້ນຳຂອງຄະນະພັກ, ຄະນະນໍາຂອງ ຫ້ອງການສະພາປະຊາຊົນແຂວງ ສະແດງອອກໃນການສະຫຼຸບຜົນງານໃນໄລຍະ 5 ປີຜ່ານມາ ກໍາມະບານຮາກຖານ ສະພາປະຊາຊົນ ແຂວງສາລະວັນ ໄດ້ຖືເອົາວຽກງານວິຊາສະເພາະຂອງຕົນເປັນລັກ,ໂດຍຕິດພັນກັບວຽກງານສຶກສາອົບຮົມການເມືອງ-ແນວຄິດ ດ້ວຍການຈັດຕັ້ງເຊື່ອມຊືມບັນດາແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ປະຫວັດມູນເຊື້ອສຳຄັນທາງປະຫວັດສາດຂອງພັກ, ຂອງຊາດ, ແລະ ອົງການຈັດຕັ້ງຕ່າງໆຢ່າງເປັນປົກກະຕິ, ນອກນັ້ນ; ຄະນະກໍາມະບານຮາກຖານສະພາປະຊາຊົນແຂວງ ຍັງໄດ້ນໍາພາສະມະຊິກກໍາມະບານພາຍໃນໜ່ວຍຂອງຕົນ ເຂົ້າຮ່ວມຮັບຟັງການປາຖະກະຖາວັນສໍາຄັນຂອງຊາດ, ຂອງພັກ ເປັນຕົ້ນ: ມູນເຊື້ອວັນກໍາມະກອນສາກົນ, ວັນສ້າງຕັ້ງກໍາມະບານລາວ, ວັນສ້າງຕັ້ງແມ່ຍິງລາວ ແລະ ວັນສໍາຄັນອື່ນໆ ໄດ້ທັງໝົດ 57 ຄັ້ງ ມີຜູ້ເຂົ້າຮ່ວມທັງໝົດ 1,032 ເທື່ອຄົນ, ຍິງ 414 ເທື່ອຄົນ, ສະມາຊີກກໍາມະບານໄດ້ເອົາໃຈໃສ່ໃນການໂຄສະນາເຜີຍແຜ່ກົດໝາຍຕ່າງໆ ຂຽນຂ່າວສານການເຄື່ອນໄຫວ ວຽກງານ ຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ເພື່ອອອກລາຍການວິທະຍຸກະຈາຍ ສຽງແຂວງສາລະວັນ ໃນລະບົບ FM 101,2 ໃນທຸກໆ ວັນເສົາ-ອາທິດແຕ່ເວລາ 17:30-18:00 ໂມງ ເຊິ່ງສາມາດໂຄສະນາເຜີຍແຜ່ກົດໝາຍ ແລະ ຂ່າວສານ ໄດ້ທັງໝົດ 667 ຂ່າວ, ໃນນັ້ນສົ່ງໃຫ້ກົມສື່ມວນຊົນສະພາແຫ່ງຊາດ ທັງໝົດ 251 ຂ່າວ, ຕິດພັນກັບການເຄື່ອນໄຫວປະຕິບັດພາລະບົດບາດ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ທີ່ເປັນສະມາຊິກກຳມະບານແຕ່ລະທ່ານ ກໍ່ໄດ້ເອົາໃຈໃສ່ເຄື່ອນໄຫວປະຕິບັດໜ້າທີ່ ດ້ວຍຄວາມຮັບຜິດຊອບສູງເຊິ່ງໃນໄລຍະຜ່ານມາສະມາຊິກກຳມະບານພວກເຮົາ ກໍ່ໄດ້ເຄື່ອນໄຫວເຮັດໜ້າທີ່ມີຜົນສຳເລັດໃນຫຼາຍດ້ານເປັນຕົ້ນ: ແມ່ນຜົນສໍາເລັດໃນການປະຕິບັດ 3 ພາລະບົດບາດ ຂອງສະພາແຫ່ງຊາດ ຊຸດທີ VIII, ສະມາຊິກສະພາປະຊາຊົນແຂວງສາລະວັນ ຊຸດທີ I, ຂະບວນການເລືອກຕັ້ງສະມາຊິກສະພາແຫ່ງຊາດ ຊຸດທີ IX, ສະມາຊິກສະພາປະຊາຊົນແຂວງສາລະວັນ ຊຸດທີ II ໄດ້ສຳເລັດ. ສະມາຊິກກຳມະບານກໍ່ໄດ້ເຄື່ອນໄຫວເຮັດໜ້າທີ່ການເມືອງຂອງຕົນ ດ້ວຍຄວາມຮັບຜິດຊອບສູງ, ຜ່ານການຈັດຕັ້ງປະຕິບັດຄືດັ່ງກ່າວໄດ້ເຮັດໃຫ້ສະມາຊິກກໍາມະບານມີແນວຄິດອຸ່ນອ່ຽນ ທຸ່ນທ່ຽງເຊື່ອໜັ້ນຕໍ່ການນໍາພາຂອງພັກ, ມີຄວາມຫ້າວຫັນໃນການປະຕິບັດໜ້າທີ່ວຽກງານ, ເປັນແບບຢ່າງໃນການປະຕິບັດລະບຽບກົດໜາຍ ເປັນເຈົ້າການໃນການເຂົ້າຮ່ວມຂະບວນການຕ່າງໆ ຢ່າງເປັນຂະບວນກວ້າງຂວາງ, ພ້ອມນີ້ໃນກອງປະຊຸມຍັງໄດ້ມອບໃບຢັ້ງຢືນໃຫ້ຄອບຄົວຕົວແບບຕື່ມອີກ, ໃນກອງປະຊຸມດັ່ງກ່າວ ຍັງໄຊ້ສິດ ປະຊາທິປະໄຕປ່ອນບັດຄັດເລືອກເອົາປະທານ, ຮອງປະທານ ແລະ ປະທານກວດກາຊຸດໃໝ່ຕື່ມອີກ ເຊິ່ງໃນກອງປະຊຸມເລືອກເອົາ ສະຫາຍ ສຸດທິໂສມ ແກ້ວໄຊຍະວົງ ເປັນປະທານກໍາມະບານຮາກຖານ ສະພາປະຊາຊົນແຂວງ, ເລືອກເອົາສະຫາຍ ຂັດຕິຍະຄໍາ ທອງສຸກັນ ເປັນຮອງປະທານ, ສະຫາຍ ນາງ ວິນິດໃສ ຊະນະສິດ ເປັນຄະນະປະທານ ແລະ ເລືອກເອົາສະຫາຍ ຂັດຕິຍະຄໍາ ທອງສຸກັນ ເປັນປະທານກວດກາ, ສະຫາຍ ຄໍາຜ່ອນ ຍີ່ວົງສາ ເປັນຮອງປະທານກວດກາ.

ໃນຕອນທ້າຍຂອງກອງປະຊຸມ ກໍ່ໄດ້ຮັບຟັງການມີຄຳເຫັນ, ໂອ້ລົມ ແລະ ຊີ້ທິດເຢືອງທາງ ຂອງສະຫາຍ ຈິດຕະກອນ ສາຍສະໝຸດ ຮອງປະທານ ຄະນະບໍລິຫານງານສະຫະພັນກໍາມະບານແຂວງ ເຊິ່ງທ່ານ ກໍ່ໄດ້ເໜັ້ນໜັກບາງບັນຫາໃຫ້ຄະນະປະທານຊຸດໃໝ່ ເອົາໃຈໃສ່ເປັນຕົນ ເເມ່ນວຽກສືກສາອົບຮົມການເມືອງ ນໍາພາແນວຄິດໃຫ້ໜັກແໜ້ນເຂັ້ມແຂງ, ນອກນີ້ ທ່ານກໍ່ຍັງຍ້ອງຍໍຊົມເຊີຍຕໍ່ຜົນງານໃນຫຼາຍໆດ້ານ ທີ່ທາງຄະນະພັກຮາກຖານຊຸດເກົ່າ ແລະ ອ້າຍນ້ອງພະນັກງານ ສະມາຊີກກໍາມະບານຮາກຖານ ສະພາປະຊາຊົນແຂວງ ຍາດມາໄດ້.

(ຂ່າວ: ນາງ ມິດດາວັັນ ແສງບົວລະພາ; ພາບ: ດີລໍາພົນ ພົມມະຈັັນ)