ໃນວັນທີ 5 ກຸມພາ 2024 ຢູ່ທີ່ຫ້ອງປະຊຸມສະພາປະຊາຊົນແຂວງໄດ້ເປີດກອງປະຊຸມແລກປ່ຽນບົດຮຽນລະຫວ່າງຄະນະເລຂາທິການສະພາປະຊາຊົນແຂວງກັບຫ້ອງວ່າການແຂວງ ປະຈໍາປີ 2023 ໂດຍການປະທານຂອງທ່ານ ວຽງໄຊ ສີວິໄລ ຮອງປະທານສະພາປະຊາຊົນແຂວງ ຜູ້ຊີ້ນໍາວຽກງານຄະນະເລຂາທິການສະພາປະຊາຊົນແຂວງ, ໃຫ້ກຽດເຂົ້າຮ່ວມຂອງທ່ານ ສົມພອນ ສີອາໄພ ຫົວໜ້າຫ້ອງວ່າການແຂວງ ແລະ ທ່ານ ນາງ ສາຍພູເງິນ ອຸດົມສຸກ ເລຂາທິການສະພາປະຊາຊົນແຂວງ, ມີບັນດາທ່ານ ຮອງປະທານຄະນະກໍາມະການສະພາປະຊາຊົນແຂວງ, ຄະນະຫ້ອງວ່າການແຂວງ, ຄະນະເລຂາທິການ, ຫົວໜ້າ-ຮອງຫົວໜ້າຂະແໜງ, ພະນັກງານສະພາປະຊາຊົນແຂວງ ແລະ ຫ້ອງວ່າການແຂວງເຂົ້າຮ່ວມ.

ໃນທີ່ປະຊຸມໄດ້ຮັບຟັງການສະຫຼຸບຕີລາຄາການເຄື່ອນໄຫວວຽກງານໃນໄລຍະຜ່ານມາ ແລະ ທິດທາງແຜນການຕໍ່ໜ້າ ຂອງຄະນະເລຂາທິການສະພາປະຊາຊົນແຂວງ ແລະ ຫ້ອງວ່າການແຂວງ ເຊິ່ງໄລຍະຜ່ານມາໄດ້ມີຜົນສໍາເລັດຫຼາຍດ້ານເປັນຕົ້ນແມ່ນປະສານສົມທົບກັນໃນການກະກຽມຈັດກອງປະຊຸມຮ່ວມລະຫວ່າງສະພາປະຊາຊົນແຂວງກັບອົງການປົກຄອງແຂວງ, ເປັນໃນກາງໃນກາຍຊຸກຍູ້, ພົວພັນ ແລະ ປະສານງານກັບບັນດາພະແນກການ, ອົງການ, ກົມກອງ ທີ່ຢູ່ໃນຄວາມຮັບຜິດຊອບຂອງຕົນ, ເປັນໃຈກາງປະສານງານຮ່ວມກັນໃນການນໍາສົ່ງ ແລະ ຈໍລະຈອນເອກະສານ ເພື່ອໃຫ້ຄະນະປະຈໍາສະພາປະຊາຊົນແຂວງພິຈາລະນາຄົ້ນຄວ້າຕົກລົງບັນຫາສໍາຄັນພື້ນຖານໃດໜຶ່ງ, ປະສານງານຮ່ວມກັນໃນການປະຕິບັດວຽກງານພິທີການ ແລະ ຮັບແຂກການນໍາຂັ້ນສູງຈາກສະພາແຫ່ງຊາດ ທີ່ມາເຄື່ອນໄຫວວຽກງານຢູ່ແຂວງຊຽງຂວາງ ແລະ ໃນທິດທາງໃນຕໍ່ໜ້າເພື່ອໃຫ້ວຽກງານຂອງຄະນະເລຂາທິການ ແລະ ຫ້ອງວ່າການແຂວງໄດ້ເຄື່ອນໄຫວຢ່າງມີປະສິດທິພາບ ຈະໄດ້ສືບຕໍ່ກໍານົດລະບອບປະຊຸມຮ່ວມກັນ ເພື່ອໃຫ້ການປະຕິບັດໜ້າທີ່ເປັນເສນາທິການໃຫ້ດີກວ່າເກົ່າ ໂດຍສະເພາະປະຊຸມກັນກ່ອນ ເພື່ອກະກຽມເນື້ອໃນກອງປະຊຸມສະໄໝສາມັນແຕ່ລະຄັ້ງ, ເພີ່ມທະວີກົນໄກປະສານງານລະຫວ່າງຄະນະເລຂາທິການ ແລະ ຫ້ອງວ່າການແຂວງ ເພື່ອປະຕິບັດ ໜ້າທີ່ວຽກງານຮອບດ້ານໃຫ້ແກ່ການນໍາສະພາປະຊາຊົນແຂວງ ແລະ ການນໍາແຂວງ ໃຫ້ມີຄວາມວ່ອງໄວຂຶ້ນ, ຮັບປະກັນທາງດ້ານຫຼັກການໃນການປະສານງານໃຫ້ມີປະສິດທິພາບ ແລະ ປະສິດທິຜົນສູງກວ່າເກົ່າ. ນອກນີ້ຜູ້ແທນກອງປະຊຸມຍັງມີຄໍາເຫັນແລກປ່ຽນເຊິ່ງກັນ ແລະ ກັນເປັນຕົ້ນແມ່ນ: ການພົວພັນປະສານງານກັບພາກສ່ວນທີ່ກ່ຽວຂ້ອງໃນການກະກຽມເນື້ອໃນກອງປະຊຸມສະໄໝສາມັນແຕ່ລະຄັ້ງ, ການກວດກາເງິນຮ່ວງພັດທະນາທ້ອງຖິ່ນ, ການແກ້ໄຂບັນດາຄໍາສະເໜີຂອງປະຊາຊົນ, ການປັບປຸງກົນໄກປະສານງານໃຫ້ສະດວກ ແລະ ວ່ອງໄວຂຶ້ນກວ່າເກົ່າ ແລະ ບັນຫາອື່ນໆອີກ.

ສະພາປະຊາຊົນແຂວງຊຽງຂວາງ

ຂ່າວໂດຍ: ນາງ ສຸກສະຫວັນ ອິນທະແສງ