ວັນທີ 9 ພຶດສະພາ 2023 ກອງປະຊຸມຮັບຟັງການຊີ້ແຈງຜົນການທາບທາມຮ່າງກົດໝາຍ ຈໍານວນ 11 ສະບັບ ໄດ້ຈັດຂຶ້ນຢ່າງເປັນທາງການ(ຮູບແບບກອງປະຊຸມທາງໄກ) ໂດຍພາຍໃຕ້ການເປັນປະທານຂອງທ່ານ ສຈ.ປອ ຈະເລີນ ເຢຍປາວເຮີ ກໍາມະການສູນກາງພັກ, ຮອງປະທານສະພາແຫ່ງຊາດ, ປະທານກໍາມາທິການກົດໝາຍ, ມີບັນດາທ່ານຕາງໜ້າຄະນະຮັບຜິດຊອບສ້າງ ແລະ ປັບປຸງຮ່າງກົດໝາຍ, ບັນດາທ່ານສະມາຊິກສະພາແຫ່ງຊາດ, ສະພາປະຊາຊົນຂັ້ນແຂວງ ໃນຂອບເຂດທົ່ວປະເທດ ເຂົ້າຮ່ວມ.

ສະພາປະຊາຊົນແຂວງອຸດົມໄຊ, ໂດຍມີທ່ານ ຄໍາດີ ວົງລ້ອມ ຮອງເລຂາພັກແຂວງ, ປະທານສະພາປະຊາຊົນແຂວງ, ບັນດາທ່ານສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 04 ແຂວງອຸດົມໄຊ, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງ 7 ເມືອງ, ພະແນກການກ່ຽວຂ້ອງ, ຄະນະເລຂາທິການ ແລະ ຂະ      ແໜງກ່ຽວຂ້ອງ ພາຍໃນສະພາປະຊາຊົນແຂວງເຂົ້າຮ່ວມ, ຢູ່ທີ່ຫ້ອງປະຊຸມ ບໍລິສັດ ສະຕາໂທລະຄົມ(UNITEL) ສາຂາ ແຂວງອຸດົມໄຊ ແລະ ສາຂາ 6 ເມືອງ.

ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອປຶກສາຫາລື, ແລກປ່ຽນຄໍາເຫັນ ແລະ ຮັບຟັງການຊີ້ແຈງອະທິບາຍຂອງຄະນະຮັບຜິດຊອບສ້າງ ແລະ ປັບປຸງກົດໝາຍ ຕໍ່ບາງຄໍາເຫັນໃນກອງປະຊຸມທາບທາມຄໍາເຫັນໃສ່ຮ່າງກົດໝາຍ ຈໍານວນ 11 ສະບັບ ທີ່ຜ່ານມາ ແລະ ຕັ້ງຄໍາຖາມຕໍ່ບັນຫາເນື້ອໃນທີ່ບໍ່ທັນຈະແຈ້ງ ຫຼື ບໍ່ທັນເຂົ້າໃຈ.   ກອງປະຊຸມ, ໄດ້ຮັບຟັງຜູ້ຕາງໜ້າຄະນະຮັບຜິດຊອບສ້າງ ແລະ ປັບປຸງຮ່າງກົດໝາຍ ຂຶ້ນຊີ້ແຈງຜົນການປັບປຸງຮ່າງກົດໝາຍ ຈໍານວນ 11 ສະບັບ, ຕາມການປະກອບຄໍາເຫັນຂອງສະມາຊິກສະພາແຫ່ງຊາດ ແລະ ສະພາປະຊາຊົນແຂວງ ໃນຂອບເຂດທົ່ວປະເທດ, ພ້ອມດຽວກັນນັ້ນ ໄດ້ຮັບຟັງການເຜີຍແຜ່ແຈ້ງການດໍາເນີນການປະເມີນ ແລະ ຄົ້ນຄວ້າທາບທາມເນື້ອໃນຮ່າງກົດໝາຍວ່າດ້ວຍ ການຕິດຕາມກວດກາ ຂອງສະພາແຫ່ງຊາດ ແລະ ສະພາປະຊາຊົນແຂວງ. ຫຼັງຈາກນັ້ນ, ບັນດາທ່ານຜູ້ເຂົ້າຮ່ວມກອງປະຊຸມ ໄດ້ປະກອບຄໍາຄິດຄໍາເຫັນ, ສົນທະນາແລກປ່ຽນເຊິ່ງກັນ ແລະ ກັນ ຢ່າງກົງໄປກົງມາ ເພື່ອຮັບປະກັນເຮັດໃຫ້ເນື້ອໃນຂອງບັນດາຮ່າງກົດໝາຍ ສາມາດນໍາເຂົ້າພິຈາລະນາ ແລະ ຮັບຮອງ ໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ທີ່ຈະຈັດຂຶ້ນໃນມໍ່ໆນີ້ ແລະ ໄດ້ຮັບຜົນສໍາເລັດຕາມຄາດໝາຍທີ່ວາງໄວ້.ພາບ/ຂ່າວ: ແສງພອນ ອິນນະລົງ.