ຕອນເຊົ້າຂອງວັນທີ 14 ມິຖຸນາ 2023 ນີ້, ຢູ່ທີ່ຫ້ອງປະຊຸມສະພາປະຊາຊົນແຂວງສາລະວັນ ໄດ້ຈັດກອງປະຊຸມຕິດຕາມກວດກາການຈັດຕັ້ງປະຕິບັດຍຸດທະສາດການປົກປ້ອງສັງຄົມແຫ່ງຊາດ ແລະ ຜົນການຈັດຕັ້ງປະຕິບັດບັນດາມະຕິ ທີ່ສະພາປະຊາຊົນແຂວງຮັບຮອງໃນກອງປະຊຸມສະໄໝສາມັນເທື່ອທີ 4; ໂດຍການເຂົ້າຮ່ວມກອງປະຊຸມຂອງ ທ່ານ ນາງ ສູນໄຖ ໄຊຍະແສງ ກຳມະການພັກແຂວງ ຮອງປະທານສະພາປະຊາຊົນແຂວງ; ແລະ ປະທານກອງປະຊຸມຂອງທ່ານ ນາງ ທອງໃບ ໄຊຍະສານ ປະທານຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ ສະພາປະຊາຊົນແຂວງ, ບັນດາທ່ານຮອງປະທານຄະນະກຳມະການ, ຄະນະເລຂາທິການ; ບັນດາທ່ານຕາງໜ້າຈາກພະແນກການ ຂົງເຂດວັດທະນະທຳ-ສັງຄົມ ພ້ອມດ້ວຍພະນັກງານວິຊາການພາຍໃນ ສະພາປະຊາຊົນແຂວງເຂົ້າຮ່ວມ.

ກອງປະຊຸມໄດ້ຮັບຟັງລາຍງານຂໍ້ມູນຜົນການປະເມີນໄລຍະຕົ້ນ ຕາມດຳລັດ 348/ລບ ວ່າດ້ວຍມາດຕະການພົ້ນທຸກ ແລະ ມາດຕະການພັດທະນາ ປະຈໍາປີ 2023 ຂອງແຂວງສາລະວັນ ຈາກພະແນກອຸດສາຫະກຳ ແລະ ການຄ້າແຂວງ; ຮັບຟັງການລາຍງານຜົນການຈັດຕັ້ງປະຕິບັດຄວາມຄືບໜ້າ 11 ຕົວຊີ້ບອກ, ລາຍງານຄວາມຄືບໜ້າຕົວຊີ້ວັດ 2 ຄາດໝາຍ ທີ່ຈັດຕັ້ງປະຕິບັດຍັງບໍ່ທັນສຳເລັດ, ການຈັດຕັ້ງປະຕິບັດວຽກງານປະກັນສຸຂະພາບ, ພ້ອມນັ້ນກໍ່ຮັບຟັງການລາຍງານການຈັດຕັ້ງປະຕິບັດນິຕິກຳໃຕ້ກົດໝາຍ ຂໍ້ຕົກລົງ ວ່າດ້ວຍການຄຸ້ມຄອງຄຸນນຸະພາບນ້ຳດື່ມ ແລະ ນຳ້ກ້ອນ ທີ່ຜະລິດຈາກໂຮງງານ ພາຍໃນແຂວງສາລະວັນ ຈາກພະແນກສາທາລະນະສຸກແຂວງ; ຮັບຟັງການລາຍງານການຈັດຕັ້ງປະຕິບັດບັນດາຄາດໝາຍຂອງວຽກງານການສຶກສາ ໂດຍສະເພາະຂ້ໍມູນການປະລະການຮຽນຂອງນັກຮຽນທີ່ຍັງເປັນບັນຫາພາຍໃນແຂວງທີ່ຈະຕ້ອງສືບຕໍ່ແກ້ໄຂ; ຮັບຟັງການລາຍງານຂໍ້ມູນການຄຸ້ມຄອງແຮງງານພາຍໃນແລະຕ່າງປະເທດ ຈາກພະແນກແຮງງານແລະສະຫວັດດີການ-ສັງຄົມແຂວງ; ໂອກາດດັ່ງກ່າວ,ທ່ານປະທານກອງປະຊຸມໄດ້ຕັ້ງຄຳຖາມເຈາະຈີ້ມລົງເລິກເຂົ້າບາງບັນຫາ ໃຫ້ພາກສ່ວນຊີ້ແຈງອະທິບາຍເພິ່ມຕື່ມເຊີ່ງສະແດງໃຫ້ເຫັນຈຸດດີ ແລະ​ ຂໍ້ຄົງຄ້າງ ທີ່ຈະຕ້ອງໄດ້ສືບຕໍ່ຄົ້ນວ້າຫາທາງແກ້ໄຂໃນຕໍ່ຫນ້າໃຫ້ສຳເລັດ;

ຈຸດປະສົງຂອງກອງປະຊຸມ ເພື່ອເປັນການຮັບຟັງການລາຍງານບັນດາຂໍ້ສະດວກ ແລະ ຂໍ້ຫຍຸ້ງຍາກ ຂອງພາກສ່ວນທີ່ກ່ຽວຂ້ອງ ກ່ຽວກັບຜົນຂອງການຈັດຕັ້ງປະຕິບັດຍຸດທະສາດການປົກປ້ອງສັງຄົມແຫ່ງຊາດ ແລະ ການຈັດຕັ້ງປະຕິບັດບັນດາມະຕິ ທີ່ສະພາປະຊາຊົນແຂວງຮັບຮອງໃນກອງປະຊຸມສະໄໝສາມັນເທື່ອທີ 4 ໄລຍະທີ່ຜ່ານມາ ເພື່ອສັງລວມຂໍ້ມູນນຳເຂົ້າລາຍງານຕໍ່ກອງປະຊຸມສະໄມສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ທີ່ຈະຈັດຂຶ້ນໃນທ້າຍເດືອນມິຖຸນາ ທີ່ຈະມາເຖິງນີ້;

ພາບ-ຂ່າວ: ດີລຳພົນ ພົມມະຈັນ